شىققان ءورت سۇرلەمگە جانە قويمالارعا قاۋىپ ءتوندىردى. وبەكت كەزەكشىسى ءورت تۋرالى حابارلاما العاننان كەيىن بىردەن «101» قىزمەتىن جانە ەلەۆاتوردىڭ مەملەكەتتىك ەمەس ورتكە قارسى قىزمەتىن شاقىردى. سودان كەيىن داۋىس زورايتقىش بايلانىسىمەن جۇمىسشىلاردى قۇلاقتاندىردى.
ءبىرىنشى كەزەكتە ەلەۆاتور جۇمىسشىلارىن ەۆاكۋاتسيالاۋ جانە بۇكىل عيماراتتى ەلەكتر جەلىسىنەن اجىراتۋ جۇمىستارى ۇيىمداستىرىلدى. حابار الا سالا قيقۋلاتىپ, شارتتى ءورت شىققان جەرگە قۇتقارۋ جاساقتارى كەلىپ جەتتى. توتەنشە جاعداي ورىن العان جەردە جەدەل شتاب قۇرىلىپ, قۇرامىنا نىساننىڭ ماماندارى كىردى. ۇرىستا تۇرىس جوق. ءورت سوندىرۋشىلەر تەز ارادا ءورتتى سوندىرۋگە كىرىستى. ءتىلسىز جاۋمەن ارپالىس كەزىندە ءورت ءسوندىرۋ بولمەسىندە مۇنارا قىزمەتكەرلەرىنەن «زارداپ شەككەن» ادام تابىلدى. ونى قۇتقارۋشىلار ءتۇتىن ايماعىنان ەۆاكۋاتسيالاپ, اپاتتىق مەديتسينا ورتالىعىنىڭ دارىگەرلەرىنە جەتكىزدى. ول جەردە اق حالاتتىلار «تۇتىنگە ۋلانعان» ادامعا العاشقى كومەك كورسەتىپ, جانىن امان الىپ قالدى.
«وقيعا» بولعان جەرگە بارلىعى 10 بىرلىك ارنايى تەحنيكا جانە 40-تان استام قۇتقارۋشى ماماندار تارتىلدى. «قىزىل جالىننىڭ» بەتىن قايتارۋ ءۇشىن 4 بىرلىك تەحنيكا جانە ەلەۆاتوردىڭ مەملەكەتتىك ەمەس ورتكە قارسى قىزمەتى جۇمىلدىرىلدى.
كاسىبي مامانداردىڭ ۇيلەسىمدى ءىس-قيمىلدارىنىڭ ارقاسىندا ء«ورت» جەدەل ءسوندىرىلدى. قۇتقارۋشىلار كەپتىرۋ مۇناراسىنىڭ گالەرەياسىنا ء«ورتتى» جىبەرمەي ۇستاپ قالدى. ءسويتىپ دايىندىقتارى ساقاداي ساي ماماندار 49 مىڭ توننا اۋىلشارۋاشىلىق ءونىمىن امان ساقتاپ قالدى.
– ەلەۆاتورلارداعى ءورت بولا قالسا, تەحنولوگيالىق ويىقتاردىڭ, تاسىمالداۋ تاسپاسى جانە جەلدەتۋدىڭ تارماقتالعان جەلىلەرىنىڭ كوپتىگىنەن وتتىڭ تەز تارالۋى مۇمكىن. وقۋ-جاتتىعۋدا ءوزارا جەدەل قيمىلداۋ, زارداپ شەككەندەرگە كومەك كورسەتۋ پىسىقتالدى, – دەپ ءتۇسىندىردى وبلىستىق توتەنشە جاعدايلار دەپارتامەنتىنىڭ ء«ورت ءسوندىرۋ جانە اپاتتىق قۇتقارۋ قىزمەتى» مەكەمەسى باستىعىنىڭ ورىنباسارى ازامات مۇقاشەۆ.
ءورت ءسوندىرۋ قىزمەتىنىڭ جەكە قۇرامىنىڭ دايىندىق دەڭگەيى, نىساننىڭ اكىمشىلىگى مەن قىزمەت كورسەتۋ پەرسونالىنىڭ ءىس-قيمىلدارى «جاقسى» دەپ باعالاندى.
وسكەمەن
