تۇركىستان وبلىسىنىڭ اكىمى ومىرزاق شوكەەۆتىڭ باستاماسىمەن قولعا الىنعان «قامقورلىق» جوباسى سارىاعاش اۋدانىنا قاراستى داربازا اۋىلدىق وكرۋگىندە جالعاسىن تاپتى. اۋىلدىق وكرۋگتەگى جاناشىر كاسىپكەرلەر مەن اۋىل جاستارى دەمەۋشىلىك جاساپ, كومەككە مۇقتاج تاعدىر تاۋقىمەتىن تارتقان جانداردىڭ ءبىرى, 8 بالانىڭ اناسى رىسكۇل تورىباەۆاعا 6 بولمەلى ءۇي سالىپ بەردى. جاقسىلىققا ۇمتىلعان جاندار ارقىلى باسىبايلى باسپانا بۇيىرعان وتباسىنداعى بالالاردىڭ قۋانىشىندا شەك جوق. جىلدار بويعى قيىندىقتان قۇتىلعان انانىڭ ايتار العىسى ايرىقشا. كوپبالالى وتباسى مەملەكەت تاراپىنان اتاۋلى الەۋمەتتىك كومەكپەن قامتىلعان.
«قامقورلىق» باعدارلاماسىن Nur Otan پارتياسىنىڭ وبلىستىق فيليالى مەن وبلىس اكىمدىگى بىرلەسە ۇيلەستىرىپ كەلەدى. يگى شارا تۇرعىندار تاراپىنان جوعارى باعالانىپ وتىر. باعدارلاما اۋدان, قالالارداعى تۇرمىس تاۋقىمەتىن تارتقان وتباسىلارعا جان-جاقتى قامقورلىق كورسەتۋ ارقىلى كەدەيلىك شەڭبەرىنەن شىعۋعا مۇمكىندىك بەرەدى. مۇنداي وتباسىلاردى انىقتاۋ ءۇشىن قۇرىلعان ارنايى كوميسسيا قۇرامىندا اۋىل اقساقالدارى مەن جەرگىلىكتى بەلسەندىلەر بار. كەشەندى باعدارلاما اياسىندا 2 مىڭعا جۋىق ادامعا كومەك بەرىلدى. وتباسىلارعا ازىق-ت ۇلىك, كيىم-كەشەك, ماتەريالدىق كومەك كورسەتىلۋدە. ونىڭ ىشىندە 35 وتباسىنا تۇرعىن ءۇي الىپ بەرىلسە, 100-گە جۋىق ادام تۇراقتى جۇمىسپەن قامتىلىپ, 178 ادام قوعامدىق جۇمىسقا تارتىلعان.
اكىمدىك پەن ساياسي ۇيىم تاراپىنان قولعا الىنعان قايىرىمدىلىق شاراسىنا قاراپايىم تۇرعىندار دا قولداۋ كورسەتۋدە. مىسالى, جۋىردا كەلەس اۋدانىنا قاراستى قازاقستان اۋىلىنىڭ ازاماتتارى جالعىزباستى اناعا باسپانا سىيلادى. جانى جومارت جاندار مۇنداي يگى ءىستى مەكتەپ بىتىرگەندەرىنە 20 جىل تولۋىنا وراي ۇيىمداستىرىپ وتىر. بەس بالانىڭ اناسى ق.سالىمباەۆا باسپانا الا الماي كەلە جاتقانىنا بىرنەشە جىل بولعان. قامكوڭىل انا وسىنداي قۋانىشقا كەنەلتىپ وتىرعان №33 «جۋانتوبە» جالپى ورتا مەكتەبىنىڭ تۇلەكتەرىنە ەرەكشە العىسىن ءبىلدىردى.
«قايىرىمدىلىق جاساساڭ, قايىرىن ءوزىڭ كورەسىڭ», دەيدى قازاق xالقى. قايىرىمدىلىق – ىزگىلىگىن, تازا نيەتىن, ادامگەرشىلىك قارىم-قاتىناسىن كورسەتەتىن ادامداردىڭ ءبىر-بىرىنە دەگەن سۇيىسپەنشىلىگى مەن كومەگى. ءاربىر ازامات ءوز ەلىنە, تۋعان جەرىنە قاشان دا قامقورلىق تانىتىپ ءجۇرۋى كەرەك دەگەن ويدامىز. اسىرەسە قازىرگىدەي ىندەت ابىگەرگە سالىپ جاتقاندا جانى جومارت جاندار بىرلەسىپ مۇقتاج ازاماتتارعا قول ۇشىن سوزىپ تۇرسا, ەلدىگىمىزدى كورسەتەر ەدى», دەيدى مەكتەپ تۇلەكتەرى.
بۇدان بولەك, «جۋانتوبە» ءبىلىم ۇياسىنىڭ تۇلەكتەرى قارجى جيناپ, اۋىلدىق وكرۋگ اۋماعىنداعى مازاراتتىڭ 250 شارشى مەتر اۋماعىن قورشاپ, اۋىلداعى ورتالىق مەشىتتىڭ اۋلاسى مەن كىرەبەرىس بولمەسىنە جوندەۋ جۇمىستارىن جۇرگىزدى.
تۇركىستان وبلىسى
