كۇزدىڭ قارا سۋىعى. قىرباق قار ءبىر جاۋىپ ەرىپ جاتقان ءولارا مەزگىل. ءتۇس قايتا ەۆگەني دوماشەۆ تايىنتى اۋىلىنان وسكەمەنگە قاراي جولعا شىققان. ءجۇز شاقىرىم بولار-بولماس ەكى ارا قويىن-قولاتتى, ورمان-توعايلى اڭ-قۇسى شۋلاعان كورىكتى جەر.
بۇرالاڭ جولدا زۋلاپ كەلە جاتقان ە.دوماشەۆ ءبىر بەلەستەن اسقاندا جولعا قاراي جورتقان قوڭىرقاي اڭدى بايقايدى. العاشىندا يت پە دەپ تە ويلاعان. جاقىنداي كەلە سىلەۋسىننىڭ بالاسى ەكەنىن بايقايدى. فوتواپپاراتىن ارقاشان سايلاپ جۇرەتىن ول جول جيەگىنە توقتاي قالىپ, ءتۇز تاعىسىن ءۇش-ءتورت رەت فوتوعا ءتۇسىرىپ ۇلگەرگەن. قوڭىر اڭ اسىقپاي-ساسپاي قارا جولدان سىرعي باسىپ ءوتىپ, قالىڭ جىنىسقا ەنىپ جوعالعان. جانكەشتى فوتوگراف ارتىنان تۇرا جۇگىرگەنىمەن, قاراسىن قايتىپ بايقاماعان.
– ول كەزدە قاۋىپتىڭ بارىن ەستەن شىعارىپ الىپپىن. قۋىپ بارىپ, تاعى ءبىر-ەكى كادر جاسايمىن با دەپ ويلاعام. سوندا كۇشىگىن قورعايمىن دەپ, الدىمنان ەنەسى شىقسا, بىتكەن جەرىم سول ەدى, – دەيدى وزىندىك قولتاڭباسى بار كاسىبي فوتوگراف ەۆگەني دوماشەۆ.
البەتتە, سىلەۋسىن – جىرتقىش اڭ. بەتپە-بەت كەلىپ قالعان اڭنىڭ ءوزى ودان وڭاي قۇتىلا قويماس. مىسىق تۇقىمداس بولعانىمەن, ءبىتىمى شومبال, مىقتى كەلەدى. تۇرقى 90-105 سم, سالماعى 15-20 كيلو بولادى. كوبىنەسە ۇساق اڭ-قۇستارمەن قورەكتەنەدى. قۇلاعىندا قىلشىقتى شاشاعى, ەكى ۇرتىندا ءساندى ساقالى بار بۇل جىرتقىشتىڭ سانى جەر بەتىندە از. سوندىقتان دا حالىقارالىق تابيعات قورعاۋ وداعىنىڭ جانە قازاقستاننىڭ قىزىل كىتابىنا تىركەلىپ, اۋلاۋعا قاتاڭ تىيىم سالىنعان.
سىلەۋسىندى جول-جونەكەي سۋرەتكە تۇسىرگەن ەۆگەني دوماشەۆتىڭ ىزىنە زايسان وڭىرىندە قاسقىر دا تۇسكەن ەكەن. ايتۋىنشا, بۇرىندارى اڭشىلارمەن بىرگە ساۋىر-سايقان تاۋىن ارالاپ جۇرگەن. قارۋلانعان اڭشىلار ءسال ۇزاپ كەتكەنى سول, سوڭىنان ىلەسە سىبدىر ەستىلەدى. دالا جانۋارىنىڭ كەلە جاتقانىن سەزىپ, ءجۇرىسىن جىلدامداتادى. ابىروي بولعاندا, قارۋلانعان اڭشىلارعا بەلگى بەرىپ ۇلگەرگەن. اڭشىلار دا كاسىبي. كوپ ۇزاماي ورماننىڭ سۇر جەندەتىن سۇلاتىپ ءتۇسىرىپتى. سويتسە ەسىك پەن توردەي ارلان ەكەن.
فوتوگراف ءاۋ باستا انيماليستىك جانردا سۋرەت تۇسىرۋمەن اۋەستەنىپ كورگەن. بىراق ءساتتى سۋرەتتەر شىقپاعان سوڭ پەيزاج جانرىنا كوشكەن. ال بۇگىندە قالانىڭ قۇرىلىسىنا قاتىستى فوتو تۇسىرۋمەن شۇعىلدانىپ ءجۇر.
شىعىس قازاقستان وبلىسى
