بۇل بۇرىن وزبەكستان ەلشىلىگى عيماراتى بولعان ەڭسەلى, اق شاڭقان ءۇي. ەگەر الماتىنىڭ كۇزگى اۋا رايى قولايلى بولىپ جاتسا, بىلەكتەي بۇرىم كۇزدىڭ سوڭعى كۇندەرىنە دەيىن ءىلۋلى تۇرا بەرمەك. شاشباۋ تاعىلعان بۇرىم ايەلدەردىڭ قاتاڭ تۇرمىس شىرماۋىندا قالعان شاراسىزدىعىن بەينەلەيدى. Art Prospect اياسىندا ىسكە اسىرىلعان «شاش» جوباسىنىڭ اۆتورى – الماتىلىق سۋرەتشى مەرۋەرت قۋناقوۆا.
«بۇل يدەيا كارانتين كەزىندە ويعا كەلدى. اسىرەسە وسى بۇكىل الەم جاپپاي وقشاۋلانعان تۇستا تۇرمىستىق زورلىق-زومبىلىق وقيعالارى كوبەيدى. ەۋروپادا ءتىپتى «ماسكا-19» دەگەن ارنايى كود ويلاپ تاپتى. ياعني دارىحاناعا كەلگەن ايەلدەر وسى ارقىلى وزىنە قاۋىپ ءتونىپ تۇرعانىن جەتكىزىپ, ايەلدەرگە كومەك كورسەتىلگەن ەدى», دەيدى سۋرەتشى.
ول ايەلدەر مەن قىز بالالاردىڭ قۇقىقتارىن قورعاۋعا جانە ولاردىڭ مۇمكىندىكتەرى اۋقىمىن كەڭەيتۋگە باعىتتالعان اعارتۋ باعىتىنداعى ءىس-شارالار ەلىمىزدە اۋىق-اۋىق كوتەرىلگەنىمەن, جالپى بۇقارالىق سيپاتقا يە ەمەس ەكەنىن ايتادى. «قازاقستاندا, وكىنىشكە قاراي, كارانتين كەزىندە تۇرمىستىق زورلىق-زومبىلىق جاعدايى كۇردەلى بولدى. دەگەنمەن مەنىڭ ويىمشا, بۇل تاقىرىپ ءبىزدىڭ ەلدە اسا ءبىر ۋشىعا قويماعانداي كورىندى. پاندەميا كەزىندە ءبىزدىڭ بيلىك ىندەت ماسەلەسىنە شۇعىل نازار اۋدارىپ, ءتىپتى وسى تاقىرىپتا قابىرعا سۋرەتتەرى دە جاسالدى», دەيدى مەرۋەرت قۋناقوۆا.
Art Prospect – جىل سايىن وتەتىن قوعامدىق ونەر فەستيۆالى. وسى ۋاقىتقا دەيىن فەستيۆالعا الەمنىڭ جيىرما شاقتى ەلىنەن 250-دەن استام سۋرەتشى قاتىسىپ, شىعارماشىلىق قوزعالىستى جاڭاشا جانداندىردى. مۇنداعى ماقسات – سۋرەتشىلەرگە جانە جەرگىلىكتى تۇرعىندارعا قالالىق ورتانى زەرتتەۋگە, ونىڭ ەستەتيكالىق, تاريحي, مادەني جانە الەۋمەتتىك ولشەمدەرىن انىقتاۋعا جانە قايتا پايىمداۋعا مۇمكىندىك بەرۋ. «مەنىڭ ويىمشا, سۋرەتشى ءۇشىن ەمپاتيا وتە ماڭىزدى. وزگەلەردىڭ ماسەلەسىنە ەشۋاقىتتا بەيجاي قاراماڭىز. «شاش» يدەياسىن تۋدىرعان دا وسىنداي كوزقاراس», دەيدى مەرۋەرت.
مەرۋەرت كوتەرىپ وتىرعان ايەل ماسەلەسىن ونەر ارقىلى ۇندەۋ يدەياسى قۇرمەتتەۋ, قۇقىق بەرۋ جانە قورعاۋ سەكىلدى تۇعىرلى ۇستانىمداردى نەگىزگە الادى. وسى تۇستا مۇحتار اۋەزوۆتىڭ: «ادام بالاسىنىڭ ادامشىلىق جولىنداعى تاپپاق تاراقياتى ايەل حالىنە جالعاسادى. سول سەبەپتى, ايەلدىڭ باسىنداعى تۇمان ايىقپاي, حالىققا ادامشىلىقتىڭ باقىتتى كۇنى كۇلىپ قارامايدى. ال قازاق مەشەل بولىپ قالامىن دەمەسەڭ, تاعىلىمىڭدى, بەسىگىڭدى تۇزە! ونى تۇزەيىم دەسەڭ, ايەلدىڭ ءحالىن تۇزە!» دەگەن تاعىلىمدى ءسوزى قوعام تالابىنا اينالعانداي. ەندەشە, قازاق قىزىنىڭ باسىنان ءبىر تال شاش تۇسپەسىنشى!..
