وبلىس پوليتسەيلەرى قىلمىستىق ءىستى ەلەكتروندى فورماتتا جۇرگىزۋ جونىنەن رەسپۋبليكا بويىنشا العاشقى ورىندا تۇر. ءىستى اشىق جۇرگىزۋدىڭ بارلىق تالاپتارى ساقتالادى. وسى سالاداعىلاردىڭ اراسىنان سىبايلاستىققا نەمەسە تەرىس قىلىققا جول بەرگەندەرگە قاتىستى قاتاڭ شارالار قولدانىلادى. مەملەكەت باسشىسىنىڭ تاپسىرماسىمەن ادامنىڭ جەكە باسىنا قارسى جاسالعان قىلمىسقا, مال ۇرلىعى مەن كەيبىر باسقا دا قىلمىستارعا جازا كۇشەيدى. وسىعان دەيىن بىرەۋدىڭ مۇلكىن ۇرلاعان نەمەسە مالىن قولدى ەتكەندەر زالالىن وتەپ, قۇتىلىپ كەتىپ جاتاتىن. زاڭ تالابى قاتايعاسىن, ۇرىلاردىڭ دا اياعىن تارتا باستاعانى بايقالادى.
– بىلتىر وبلىس ورتالىعىنداعى بەلگىلى كاسىپكەردىڭ ۇيىنە قاراقشىلىق شابۋىل جاساعاندار تولىق ۇستالىپ, بيىل ولارعا قاتىستى سوت ۇكىمى شىقتى. قاراقشىلار سالعان دەنە جاراقاتىنان ءۇي يەسى قايتىس بولدى. قازاقستاننىڭ ءار تۇكپىرىنە بوي تاسالاپ كەتكەن قىلمىسكەرلەر تولىق ۇستالدى. كەلتىرىلگەن ماتەريالدىق زالال وتەلدى. قاراقشىلار الدى 24, سوڭى 4 جىلدان ارقالاپ كەتتى. وسى ءىستى تەرگەپ-تەكسەرۋ بارىسىندا دەپارتامەنت تەرگەۋشىسى ا.جاۋەنوۆ كاسىبي شەبەرلىك تانىتقانىن ايرىقشا ايتقىمىز كەلەدى, – دەيدى دەپارتامەنت باستىعىنىڭ ورىنباسارى, پوليتسيا پولكوۆنيگى بايجان بايگەلدى.
جالپى, قىلمىستىڭ تومەندەگەنى بايقالعانىمەن كەيبىر جەكەلەگەن تۇرلەرى جيىلەپ تۇر. دەپارتامەنتتەگىلەر اسىرەسە الاياققا الداناتىندار ءالى دە كوپ ەكەندىگىن ايتادى. ەسكەرتۋ, الدىن الۋ جۇمىستارى جۇيەلى تۇردە اتقارىلىپ جاتقانىمەن ينتەرنەت الاياقتاردىڭ قاقپانىنا تۇسەتىندەر ازايماي تۇر.
تەحنيكا دامىعان سايىن جۇرتتى الداپ, تابىس تاباتىندار دا ءادىس-ايلاسىن جەتىلدىرىپ كەلەدى. مىسالى, قازىر الەۋمەتتىك جەلىدە «بانك پەن شاعىن نەسيە ۇيىمدارىنىڭ كرەديتىن جاۋىپ بەرەمىن» دەگەن جارناما تولىپ تۇر. سولارعا سەنىپ, ايتقان اقشاسىن اۋدارىپ, الدانىپ قالىپ جاتقاندارى قانشاما. تۋىستارى مەن تانىستارىنىڭ اتىنا ونلاين نەسيە راسىمدەپ, ولاردى ميلليونداعان قارىزعا باتىرىپ جاتقاندار دا كەزدەسىپ قالادى.
سولاردىڭ ءبىرى وبلىس تۇرعىنىنا «بالاڭدى «قازاقمىس» مەكەمەسىنە جۇمىسقا ورنالاستىرىپ بەرەمىن» دەگەن ۋادە بەرگەن. ارينە, تەگىن ەمەس. ەكى اراداعى دەلدالدىق قىزمەتى ءۇشىن 7 ميلليون تەڭگەگە جۋىق اقشا العان. تانىسىنىڭ ايتقان ۋاقىتى ۇزاپ بارا جاتقاسىن اقشا بەرگەن تۇرعىن پوليتسەيلەرگە ارىز جازىپ, سول بويىنشا قازاقستان رەسپۋبليكاسى قىلمىستىق كودەكسىنىڭ 190-بابىنىڭ 3-بولىگى بويىنشا سوتقا دەيىنگى تەرگەپ-تەكسەرۋ جۇرگىزىلگەن. وقيعانىڭ ءمان-جايى انىقتالۋدا.
قازان ايىنىڭ باسىندا قالالىق پوليتسيا باسقارماسىنىڭ كەزەكشى بولىمىنە وبلىس ورتالىعىنىڭ تۇرعىنى الاياقتىق فاكتىسى تۋرالى ارىزدانىپ, وندا كوكتەمدە ءبىر تانىسىنا 5 245 000 تەڭگە بەرگەنىن جازادى. الگى تانىسى وسى اقشاعا قولجەتىمدى باعامەن باسپانا ساتىپ الۋعا, ءسىڭلىسىن ۋنيۆەرسيتەتكە تۇسىرۋگە كومەك كورسەتەتىنىن ايتىپ انت-سۋ ءىشىپتى. جەدەل-ىزدەستىرۋ شارالارى بارىسىندا وبلىس ورتالىعىنىڭ بۇرىن سوتتى بولعان 28 جاستاعى تۇرعىنى ۇستالدى. الاياقتاردىڭ اراسىندا ارزان پاتەر الىپ بەرۋگە, جۇمىسقا ورنالاستىرۋعا, جەڭىل تابىس تابۋعا شاقىراتىندار كوپ. ءوزىن پوليتسيا قىزمەتكەرىمىن دەپ تانىستىرىپ, بىرەۋدىڭ تەلەفونىن الىپ كەتكەن دە وقيعا كەزدەسكەن. ارينە, جۇرتتى جەر سيپاتىپ كەتكەندەردىڭ ءبارى جازاسىن الدى. بيىل «گارانت 24 لومبارد» جشس-ءنىڭ وسىنداي قارجىلىق پيراميداسىنىڭ قاقپانىنا تۇسكەندەردىڭ سانى 2242 ادامعا جەتىپتى. دەپارتامەنت تەرگەۋشىلەرى وسى ءىستى مۇقيات قاراپ, سوتقا دەيىنگى تەرگەپ-تەكسەرۋ جۇرگىزىلۋدە.
الەۋمەتتىك جەلىنى جۇرتتى الداۋعا پايدالاناتىن پىسىقايدىڭ ءبىرى بىلتىر «Whats App» مەسسەندجەرى ارقىلى «ايلۋنا گولد» دەگەن اتاۋمەن بىرنەشە توپ اشادى. سول ارقىلى قىسقا مەرزىمدە از اقشا سالىپ, قوماقتى قارجى تابۋعا بولاتىنى تۋرالى جارناما تاراتادى.
– قارجى اينالىمىنان ءسال دە بولسا حابارى بار ادام 1 اپتانىڭ ىشىندە سالعان قارجىسىن 60 پايىز ۇستەماقىمەن قايتارامىن دەگەنگە كۇدىكپەن قارايدى عوي. بىزدە سوعان يمانداي سەنەتىندەر كوپ ەكەن, اينالدىرعان 2 ايدىڭ ىشىندە وڭاي ولجادان دامەلى 345 تۇرعىن «Qiwi كوشەلەك» پەن «Kaspi Gold» بانكومات كارتاسى ارقىلى الگى ازاماتشاعا 534 ملن تەڭگەدەن استام قارجى اۋدارىپ بەرگەن. بۇل قىلمىس تا اشىلىپ, ءىسى سوتتا قارالدى. بىراق جەڭىل اقشادان دامەلىلەردىڭ دەسى سوندا قايتپاي تۇر, – دەيدى دەپارتامەنت باستىعىنىڭ ورىنباسارى.
پوليتسەيلەر بۇل باعىتتا ءتۇسىندىرۋ جۇمىستارىن جۇرگىزىپ كەلەدى. ولاردىڭ ايتۋىنشا, الاياقتاردىڭ قۇربانى بولماس ءۇشىن جاڭا تانىسىڭىزدىڭ ءىس-ارەكەتى نەمەسە ءسوزى كۇدىك تۋدىرسا, ەڭ الدىمەن ونىڭ كىم ەكەندىگىن انىقتاۋعا تىرىسقان ءجون. كۋالىك, سەنىمحات, سەرتيفيكات سەكىلدى قۇقىق بەلگىلەيتىن قۇجاتتارىن كورسەتۋىن تالاپ ەتۋ دە ارتىقتىق ەتپەيدى. ءىستىڭ ءمان-جايىن انىقتاعانعا دەيىن وعان اقشا بەرمەگەن جانە ەشقانداي قۇجاتقا قول قويماعان دۇرىس. تۇرعىندار الدانىپ قالعاننىڭ وزىندە دەرەۋ قۇقىق قورعاۋ ورگاندارىنا حابارلاسقانى ابزال. ونى كەشىكتىرسەڭىز كۇماندى ىسپەن اينالىساتىنداردى انىقتاۋ قيىنعا تۇسەدى.
– سونىمەن قاتار قۇجاتتاردى راسىمدەۋدە, نەسيەلەر مەن تۇرعىن ءۇي, الەۋمەتتىك كومەك الۋدا كۇماندى قىزمەتتەرىن ۇسىناتىن بەيتانىس ادامدارعا قۇلاي سەنۋدىڭ قاجەتى جوق. ونىڭ ورنىنا اتالعان ماسەلەلەردى شەشۋدىڭ زاڭدى جولىن قاراستىرۋ كەرەك,– دەيدى سۇحباتتاسىمىز.
ارينە, قۇقىق قورعاۋشىلار قۇقىقبۇزۋشىلىقتىڭ الدىن الۋعا, قىلمىس جاسالعان جاعدايدا شارا قولدانۋعا مىندەتتى. بىراق الاياققا جەم بولماۋ ەڭ الدىمەن وزىمىزگە بايلانىستى. قۇقىقتىق ساۋاتىمىزدى كوتەرىپ, قاي نارسەگە دە سەرگەك قاراساق اركىمگە الداناتىندار دا, بارىن سولارعا بەرىپ, بارىنەن باز كەشكەندەي كۇيگە تۇسەتىندەر دە ازايار ەدى.
قىزىلوردا
