ۇكىمەت • 28 قازان، 2020

حالىقتى تازا اۋىز سۋمەن قامتۋ – ستراتەگيالىق مىندەت

24 رەت كورسەتىلدى

پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا ەلدى مەكەندەردى سۋمەن جابدىقتاۋ جانە سۋ بۇرۋ ماسەلەسى قارالدى. بۇل ماسەلە جونىندە يندۋستريا جانە ينفراقۇرىلىمدىق دامۋ ءمينيسترى ب.اتامقۇلوۆ، ەكولوگيا، گەولوگيا جانە تابيعي رەسۋرستار ءمينيسترى م.مىرزاعاليەۆ، جامبىل وبلىسىنىڭ اكىمى ب.ساپارباەۆ، پاۆلودار وبلىسىنىڭ اكىمى ءا.سقاقوۆ، قوستاناي وبلىسى اكىمىنىڭ ءبىرىنشى ورىنباسارى گ.نۇرمۇحامبەتوۆا بايانداما جاسادى.

ينفوگرافيكانى جاساعان امانگەلدى قياس، «ەQ»

 

حالىقتى سۋمەن جابدىقتاۋ 92،6%-عا دەيىن جەتكىزىلدى

يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆتىڭ مالىمەتىنشە، ەلىمىزدە 2000 جىلداردان باستاپ حالىقتى اۋىز سۋمەن جانە سۋ بۇرۋ قىزمەتىمەن قامتاماسىز ەتۋ بويىنشا ماقساتتى ساياسات جۇرگىزىلىپ كەلەدى. 20 جىل ىشىندە «اۋىز سۋ»، «اق بۇلاق»، «وڭىرلەردى دامىتۋ»، «نۇرلى جول» باعدارلامالارى اياسىندا 48،2 مىڭ شاقىرىم ينجەنەرلىك جەلى سالىندى. ناتيجەسىندە حالىقتى سۋمەن جابدىقتاۋ دەڭگەيى 92،6%-عا جەتتى.

«بيىل 2020-2025 جىلدارعا ارنالعان «نۇرلى جەر» باعدارلاماسىن ىسكە اسىرۋعا كىرىستىك. باعدارلاما اياسىندا 2025 جىلعا قاراي حالىقتى تولىقتاي ساپالى اۋىز سۋمەن قامتاماسىز ەتۋ مىندەتى تۇر» دەدى ب.اتامقۇلوۆ.

ەلباسىنىڭ كەزىندە بەرگەن تاپسىرماسىنا ساي اۋىلداردى سۋمەن جابدىقتاۋ جۇيەسىن دامىتۋعا جىل سايىن كەمىندە 100 ملرد تەڭگە قاراجات بولىنۋدە. بيىل قالالار مەن اۋىلداردا سۋمەن جابدىقتاۋ جانە سۋ بۇرۋ جەلىلەرىن دامىتۋعا رەسپۋبليكالىق بيۋدجەتتەن 113،6 ملرد تەڭگە ءبولىندى، 303 جوبا ىسكە اسىرىلۋدا.

ۆەدومستۆو باسشىسىنىڭ ايتۋىنشا، سۋمەن قامتاماسىز ەتۋدىڭ الەۋمەتتىك ماڭىزى زور. مەملەكەت باسشىسى تازا اۋىز سۋعا قول جەتكىزۋ دەڭگەيىن بارلىق وڭىردە تەڭەستىرۋ قاجەتتىگىن بىرنەشە رەت اتاپ كورسەتتى. «نۇرلى جەر» باعدارلاماسى اياسىندا اۋىلداردى ساپالى جانە قاجەتتى مولشەردە سۋمەن جابدىقتاۋ قىزمەتىمەن كەزەڭ-كەزەڭىمەن قامتۋ جونىندە جوسپار ازىرلەندى. سوندىقتان وڭىرلەر حالىقتى سۋمەن قامتاماسىز ەتۋ ءۇشىن وسى جوسپاردى كەيىنگە قالدىرماي، ءتيىمدى شارالار قابىلداۋى كەرەك. ەلباسىنىڭ باستاماسىمەن قازىرگى تاڭدا «اۋىل – ەل بەسىگى» باعدارلاماسى ىسكە اسىرىلۋدا. اۋىلداردى سۋمەن جابدىقتاۋ جۇيەسىن دامىتۋ اتالعان باعدارلامامەن ۇيلەستىرىلگەن.

«قازىر رەسپۋبليكا بويىنشا بار­لىعى 6 341 اۋىل بار. ونىڭ ىشىندە 4 078 اۋىل ورتالىقتاندىرىلعان سۋمەن جاب­دىق­تالعان، 279 اۋىلدا كەشەندى بلوك-مودۋل­دەر ورناتىلعان. 1 146 اۋىلدا ورتالىق­تاندىرىلعان سۋمەن جابدىقتاۋ جۇيەسى سالىنىپ جاتىر. حالىق سانى از اۋىلداردا (200-دەن از ادام تۇراتىن 838 اۋىلدا) ءوز ەلىمىزدە وندىرىلگەن سۋ تازارتاتىن كەشەندى بلوك-مودۋلدەر ورناتىلادى» دەپ حابارلادى ب.اتامقۇلوۆ.

«نۇرلى جەر» باعدارلاماسى اياسىندا بارلىق قارجىلاندىرۋ كوزىنەن سۋمەن جابدىقتاۋ جانە سۋ بۇرۋ جۇيەلەرىن سالۋعا جانە رەكونسترۋكتسيالاۋعا 934 ملرد تەڭگە كوزدەلگەن.

«اۋىلداردىڭ سۋمەن جابدىقتالۋىنا مونيتورينگ جۇرگىزۋ ماقساتىندا ينتەراك­تيۆتى كارتا ازىرلەپ، ىسكە قوستىق. وندا كوپتەگەن پارامەتر بويىنشا ناقتى جاعداي كورسەتىلگەن. ورتالىق جانە جەرگىلىكتى اتقارۋشى ورگاندار اراسىنداعى قىزمەت پەن قۇزىرەتتىلىكتى ءبولۋ بويىنشا زاڭ جوباسى ازىرلەندى. جەرگىلىكتى اتقارۋشى ورگاندارعا بەرىلگەن اۋىز سۋدىڭ 1 تەكشە مەترى ءۇشىن تولەم مولشەرىن ازىرلەۋ جونىندەگى نورمالاردى، سونداي-اق تىزبەنى بەكىتۋ جونىندەگى قىزمەتتى بەرۋ جوسپارلانىپ وتىر» دەپ ءتۇسىندىردى مينيستر.

زاڭ جوباسىندا كورسەتىلگەن شارالاردى ىسكە اسىرۋ مىناداي مۇمكىندىكتەر بەرەدى: سالىنعان وقشاۋ جۇيەلەردى تىزىمگە ەنگىزۋدى جەدەلدەتەدى; وڭىرلەرگە اۋىز سۋمەن جابدىقتاۋعا ارنالعان سۋبسيديا ءبولۋ مەن الۋدى تەزدەتەدى; وبلىس بويىنشا ورتاشا تاريف پەن ءوڭىردىڭ الەۋمەتتىك-ەكونوميكالىق دامۋىن ەسكەرە وتىرىپ، 1 تەكشە مەتر اۋىز سۋ ءۇشىن حالىقتىڭ تولەمىن رەتتەيدى.

«تاپسىرماعا سايكەس ەلىمىزدىڭ 53 قالا­سىندا كارىزدىك-تازارتۋ قوندىرعىلارىن سالۋ جانە جاڭعىرتۋ جوبالارىن ىسكە اسىرۋ ءۇشىن دايىندىق جۇرگىزىپ جاتىرمىز. حالىقارالىق قارجى ۇيىمدارىمەن (ازيا دامۋ بانكى، ەۋروپا قايتا قۇرۋ جانە دامۋ بانكى) شامامەن 330 ملرد تەڭگە مولشەرىندە بيۋدجەتتەن تىس قاراجات تارتۋ بويىنشا كەلىسىمگە كەلدىك» دەدى مينيستر.

بەس قالادا (بالقاش، جاڭاتاس، جەز­قازعان، ساتپاەۆ، ستەپنوگورسك) كارىزدىك-تازارتۋ قوندىرعىلارىن سالۋ مەن رەكونس­ترۋكتسيالاۋ بويىنشا تەحنيكالىق-ەكو­نوميكالىق نەگىزدەمە ازىرلەندى. ساراپتاما وڭ قورىتىندىسىن بەردى. بۇل جوبالاردى شامامەن 40 ملرد تەڭگە مولشەرىندە ازيا دامۋ بانكى قارىزى ەسەبىنەن ىسكە اسىرۋ جوسپارلانعان.

«التى قالا (اقتوبە، اياگوز، قاپشاعاي، قاراعاندى، پريشاحتينسك، ريددەر) بويىنشا تەحنيكالىق-ەكونوميكالىق نەگىزدەمە ازىرلەنىپ، ساراپتاماعا جىبەرىلدى. قۇنى شامامەن 90 ملرد تەڭگە بولاتىن بۇل جوبالاردى ەۋروپالىق قايتا قۇرۋ جانە دامۋ بانكىنىڭ قاراجاتى ەسەبىنەن ىسكە اسىرۋ جوسپارلانعان. الەمدەگى پاندەمياعا بايلانىستى جوبالاردى ىسكە اسىرۋ 2021 جىلدىڭ ءبىرىنشى جارتىجىلدىعىنا اۋىس­تىرىلدى» دەپ تۇيىندەدى مينيستر.

ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ قازىرگى ۋاقىتتا رەسپۋبليكا بويىنشا جالپى ۇزىندىعى 15،5 مىڭ شاقىرىم بولاتىن 74 توپتىق سۋ قۇبىرلارى بار ەكەنىن ايتتى. ونىڭ ىشىندە رەسپۋبليكالىق مەنشىكتە 13 مىڭ شاقىرىمدى قۇرايتىن 37 توپتىق سۋ قۇبىرلارى تىركەلگەن. بۇلار جالپى 1،1 ملن ادامى بار 608 اۋىلدىق ەلدى مەكەندى ساپالى اۋىز سۋمەن قامتاماسىز ەتۋدە.

ءمينيستردىڭ ايتۋىنشا، 2019-2020 جىلدار ارالىعىندا ءتيىستى قارجى ءبولىنىپ، الەۋمەتتىك ماڭىزى بار بىرقاتار توپ­تىق سۋ قۇبىرلارى بويىنشا قۇرىلىس جۇمىس­تارى اياقتالدى. اتاپ ايتساق، 2019 جى­لى پاۆلودار وبلىسىنداعى ماي، بەلو­ۆود جانە قاراعاندى وبلىسىنداعى جاي­رەم-قاراجال توپتىق سۋ قۇبىرلارى پاي­دالانۋعا بەرىلدى. ال 2020 جىلى الماتى وبلىسىنداعى قاسكەلەڭ، قىزىلوردا وبلى­سىنداعى تالاپ جانە جيدەلى، سولتۇستىك قازاقستان وبلىسىنداعى پرەسنوۆ (ەكىنشى كەزەگى)، باتىس قازاقستان وبلىسىنداعى جىمپيتى توپتىق سۋ قۇبىرلارى بويىنشا بارلىق جۇمىستار اعىمداعى جىلدىڭ سوڭىنا دەيىن اياقتالىپ، پايدالانۋعا بەرىلەتىن بولادى.

«ناتيجەسىندە بۇعان دەيىن ساپالى سۋى بولماعان 37 اۋىلدىق ەلدى مەكەن بويىنشا جاڭادان سۋ قۇبىرلارى سالىنىپ، 46 مىڭعا جۋىق تۇرعىن تازا اۋىز سۋمەن قامتاماسىز ەتىلەدى» دەدى مينيستر.

ماسەلەنى ۇكىمەت باسشىسى اسقار ما­مين قورىتىندىلادى. پرەمەر-مينيستر اتاپ وتكەندەي، بۇگىنگى تاڭدا ورتالىق­تان­دىرىلعان سۋمەن جابدىقتاۋ قالالاردا – 97،2%، اۋىلداردا – 86،4%-دى قۇراي­دى. 100% ورتالىقتاندىرىلعان سۋمەن جاب­دىقتاۋ سولتۇستىك قازاقستان، ماڭعىس­تاۋ جانە اتىراۋ وبلىستارىندا، اۋىل­دار بو­يىنشا الماتى (98،8%)، اتىراۋ (98،4%) جانە قىزىلوردا (97،2%) وب­لىس­تارىندا قامتاماسىز ەتىلەدى. ورتالىق­تان­دىرىلعان سۋمەن جابدىقتاۋعا قولجە­تىم­دىلىك بويىنشا تومەن كورسەتكىشتەر قوس­تاناي (61،1%)، جامبىل (72،6%) جانە پاۆلودار (73،3%) وبلىستارىندا بايقالادى.

53 قالادا كارىزدىك تازارتۋ قۇرى­لىس­تارىن سالۋ، رەكونسترۋكتسيالاۋ جانە جاڭعىرتۋ بويىنشا جۇمىس جۇرگىزىلۋدە، قار­جىلاندىرۋ كوزدەرى (ادب جانە ەقدب زايمدارى) ايقىندالدى، جوبالىق قۇجات­تامانى دايىنداۋ جۇرگىزىلۋدە. «حالىقتى تازا اۋىز سۋمەن جابدىقتاۋ ماسەلەسى ۇكىمەتتىڭ ستراتەگيالىق مىندەتى جانە حا­لىقتىڭ ءومىر ءسۇرۋ ساپاسىن جاقسارتۋعا تىكەلەي اسەر ەتەدى. ءار اكىمدىكتىڭ ەلدى مەكەندەرگە ءتيىستى ينفراقۇرىلىمدى جەتكىزۋ بويىنشا ناقتى جوسپارى بولۋى كەرەك» دەدى ا.مامين.

ۇكىمەت باسشىسى «نۇرلى جەر» مەم­لە­كەتتىك باعدارلاماسىن ىسكە اسىرۋ قورى­تىندىسى بويىنشا 2025 جىلعا قاراي حالىقتىڭ 100% تازا اۋىز سۋمەن قام­تا­ماسىز ەتىلەتىنىن اتاپ ءوتتى. وسى ماسە­لەدەگى ماڭىزدىسى، توپتىق سۋ قۇ­بىر­لا­رىنىڭ ينفراقۇرىلىمىن جاساۋ جانە اۋىلداردىڭ شەكاراسىنا دەيىن جەت­كىزۋ كەرەك. بۇل جۇمىس جەلىلەردى ەلدى مەكەن­دەر­دىڭ ىشىندە تارتۋمەن ۇيلەسىمدى جۇرگى­زىلۋى قاجەت. پرەمەر-مينيستر جوبا­لار­دىڭ شى­عىن­دارىن قىسقارتىپ، جەرگىلىكتى قام­تۋدى دامىتۋ ماقساتىندا سۋمەن جاب­دىق­تاۋ جانە سۋ بۇرۋ جوبالارىن ىسكە اسىرۋ كەزىندە جوبالاۋ-سمەتالىق قۇجاتتامانىڭ تيپتىك جوبالارىن، سونداي-اق وتاندىق وندىرۋشىلەردىڭ ماتەريالدارىن پايدالانۋدى تاپسىردى.

ەكولوگيا مينيسترلىگىنە توپتىق سۋ قۇبىرلارىن باسقارۋ جۇيەسىن ودان ءارى جەتىلدىرۋ بويىنشا شارالار قابىلداپ، ولاردى سالۋ جانە رەكونسترۋكتسيالاۋ جوبالارىن ۋاقتىلى ىسكە اسىرۋدى قامتاماسىز ەتۋ تاپسىرىلدى. بۇل رەتتە 2021 جىلدىڭ سوڭىنا دەيىن 197 مىڭ تۇرعىنى بار 38 ەلدى مەكەنگە سۋ جۇرگىزۋدى كوزدەيتىن، ۇزاق­قا سوزىلعان ءۇش جوبانىڭ قۇرىلىسىن اياق­تاۋ قاجەت ەكەنى اتاپ ءوتىلدى. يندۋستريا، ۇلت­تىق ەكونوميكا، قارجى، ەكولوگيا، دەن­ساۋ­لىق ساقتاۋ مينيسترلىكتەرىنە حالىق ءۇشىن تاريفتەردىڭ ارتۋىنا جول بەرمەۋ ماق­ساتىندا قىزمەت كورسەتۋدى جانە قارىز­دى وتەۋدى ەسكەرۋمەن كارىزدىك تازارتۋ قۇرى­لىستارىن سالۋ جانە رەكونسترۋكتسيالاۋ جوبالارىن ىسكە اسىرۋ تەتىگىن زاڭ جۇزىندە بەكىتۋدى قامتاماسىز ەتۋ تاپسىرىلدى.

 

جۇمىسپەن قامتۋدىڭ جول كارتاسى جاڭارتىلادى

سونداي-اق ۇكىمەت وتىرىسىندا جۇ­مىس­پەن قامتۋدىڭ جول كارتاسىن ىسكە اسىرۋ بارىسى قارالدى. ەڭبەك جانە حالىق­تى الەۋمەتتىك قورعاۋ ءمينيسترى ب.نۇ­رىمبەتوۆ، شىعىس قازاقستان وبلىسىنىڭ اكىمى د.احمەتوۆ جانە قىزىلوردا وبلى­سىنىڭ اكىمى گ.ابدىقالىقوۆا بايانداما جاسادى.

«بيىل داعدارىسقا قارسى قابىلدانعان شا­رالاردى ىسكە اسىرۋ حالىقتىڭ جۇمىس­پەن قامتىلۋىن ساقتاۋعا ىقپال ەتتى. جۇ­مىس­­پەن قامتۋدىڭ جول كارتاسى قازاقستان­دىق­تاردىڭ جۇمىسى مەن تابىسىن ساقتاۋعا سەپ­­تىگىن تيگىزدى، ەلەۋلى الەۋمەتتىك-ەكونو­مي­كالىق تيىمدىلىگىن كورسەتتى» دەدى ا.مامين.

جۇمىسپەن قامتۋدىڭ جول كارتا­سىنىڭ شەڭبەرىندە شامامەن 6 600 الەۋمەتتىك، كوممۋنالدىق جانە كولىكتىك ينفراقۇرىلىم وبەكتىسى سالىنىپ جاتىر. جوبالار اياقتالعان سوڭ، ساباقتاس سالالاردا 100 مىڭعا جۋىق جۇمىس ورنى قۇرى­لاتىن بولادى. جول كارتاسىنىڭ جوبالارىن ىسكە اسىرۋ ءۇشىن قاجەتتى تاۋارلاردىڭ، جۇمىستار مەن قىزمەتتەردىڭ شامامەن 90%-ى وتاندىق وندىرۋشىلەردەن ساتىپ الىندى. 19 مىڭعا جۋىق بيزنەس سۋبەكتىسى 488 ملرد تەڭگەگە تاپسىرىس الدى، كەمىندە 114 مىڭ جۇمىس ورنى ساقتالدى. 

پرەمەر-مينيستر جۇمىسپەن قامتۋدى قولداۋ شارالارىن ىسكە اسىرۋ قارقىنى اتىراۋ، شىعىس قازاقستان، جامبىل، قىزىلوردا وبلىستارىندا، نۇر-سۇلتان جانە شىمكەنت قالالارىندا جوعارى ەكەنىن اتاپ ءوتتى. ۇكىمەت باسشىسى اكىمدىكتەرگە جول كارتاسىنىڭ جوسپارلى كورسەتكىشتەرىنە قول جەتكىزۋ بويىنشا جۇمىستى جانداندىرۋدى تاپسىردى. ەڭبەك مينيسترلىگىنە مۇددەلى مەملەكەتتىك ورگاندارمەن جانە اكىمدىكتەرمەن بىرلەسىپ، وسى جىلدىڭ سوڭىنا دەيىن 2021 جىلعا ارنالعان جۇمىسپەن قامتۋدىڭ جول كارتاسىن جاڭارتۋ جانە وندا تۇراقتى جۇمىس ورىندارىن قۇرۋعا باسا ءمان بەرۋ مىندەتتەلدى. بۇل رەتتە جوبالاردىڭ باسىم بولىگى اياقتالعاندىقتان، جۇمىسىنان بوساپ قالاتىن ادامداردى جۇمىسپەن قامتۋ قاجەتتىگى اتاپ ءوتىلدى. وسىعان وراي ۇلتتىق ەكونوميكا مينيسترلىگىنە مۇد­دەلى مەملەكەتتىك ورگاندارمەن جانە اكىمدىك­تەرمەن بىرلەسىپ، وسى جىلدىڭ سوڭىنا دەيىن بارلىق مەملەكەتتىك باعدارلامالاردىڭ جۇمىس ورىندارىن قۇرۋ بويىنشا ينديكاتورلارىن جاڭارتۋ، ءتيىستى ستاتيستيكالىق ەسەپكە الۋ جۇيەسىن ەنگىزۋ، سونداي-اق جۇمىس ورىندارىن قۇرۋدىڭ وڭىرلىك كارتالارىن ازىرلەپ، بەكىتۋ تاپسىرىلدى.

 

2021 جىلعا ارنالعان زاڭ جوبالاۋ جۇمىستارى

ۇكىمەت وتىرىسىندا ۇكىمەتتىڭ زاڭ جوبالاۋ جۇمىستارىنىڭ 2021 جىلعا ارنالعان جوسپارى قارالدى. بۇل ماسەلە جونىندە ادىلەت ءمينيسترى م.بەكەتاەۆ بايانداما جاسادى. جوسپار بيرجالىق ساۋدانى، سىبايلاس جەمقورلىققا قارسى ءىس-قيمىلدى، جەر قاتىناستارىن، كولىكتى، قۇقىق قورعاۋ قىزمەتى مەن گەودەزيانى، كارتوگرافيانى، ۆولونتەرلىك قىزمەت پەن قايىرىمدىلىقتى، بيولوگيالىق قاۋىپسىزدىكتى نىعايتۋدى جانە باسقا دا ماسەلەلەردى قامتيدى.

مارات بەكەتاەۆ ايتىپ وتكەندەي، ۇكىمەتتىڭ زاڭ جوبالاۋ جۇمىستارىنىڭ 2021 جىلعا ارنالعان جوسپار جوباسى پرەزيدەنت پەن مەملەكەتتىڭ ستراتەگيالىق قۇجاتتارىندا ايقىندالعان مىندەتتەر نەگىزىندە ازىرلەنگەن. جوسپار 19 زاڭ جوباسىن ازىرلەۋدى كوزدەيدى.

«ولار ساقتاندىرۋ جانە باعالى قاعازدار نارىعىن رەتتەۋگە، بيرجالىق ساۋدا، كولىك، جەر قاتىناستارى، سىبايلاس جەمقورلىققا قارسى ءىس-قيمىل، قۇقىق قورعاۋ قىزمەتى، گەودەزيا، كارتوگرافيا جانە كەڭىستىكتىك دەرەكتەر، ۆولونتەرلەر قىزمەتى جانە قايىرىمدىلىق، يننوۆاتسيالىق جانە عىلىمي-تەحنيكالىق دامۋ، بيولوگيالىق قاۋىپسىزدىك جانە باسقا دا سالالاردى ودان ءارى دامىتۋعا باعىتتالعان» دەدى مينيستر.

2021 جىلى ءۇش جاڭا زاڭ جوباسىن ازىرلەۋ كوزدەلىپ وتىر. ولار «گەودەزيا، كارتوگرافيا جانە كەڭىستىكتىك دەرەكتەر تۋرالى»، «اسكەري پوليتسيا ورگاندارى تۋرالى» جانە «قازاقستان رەسپۋبليكاسىنىڭ بيولوگيالىق قاۋىپسىزدىگى تۋرالى» زاڭ جوبالارى. سونداي-اق الداعى جىلى مەملەكەت باسشىسىنىڭ 2020 جىلعى 1 قىركۇيەكتەگى «جاڭا جاعدايداعى قازاقستان: ءىس-قيمىل كەزەڭى» اتتى جولداۋىن ىسكە اسىرۋ جونىندەگى جالپىۇلتتىق ءىس-شارالار جوس­پارىنان تۋىندايتىن ەكى زاڭ جوباسى پارلامەنتكە ەنگىزىلەدى. ولار «قازاقستان رەسپۋبليكاسىنىڭ بيرجالىق ساۋدانى دامىتۋ جانە جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سىبايلاس جەمقورلىققا قارسى ءىس-قيمىل ماسەلەلەرى بويىنشا وزگەرتۋلەر مەن تولىقتىرۋلار ەنگىزۋ تۋرالى» زاڭ جوبالارى. جوسپار جوباسىندا كوزدەلگەن 19 زاڭ جوباسىنىڭ ىشىنەن پارلامەنتكە 2021 جىلدىڭ ءى جارتىجىلدىعىندا 5، ال ءىى جارتىجىلدىعىندا 14 زاڭ جوباسىن ەنگىزۋ جوسپارلانىپ وتىر. «قۇقىقتىق اكتىلەر تۋرالى» زاڭعا سايكەس جوسپار جوباسى مەملەكەت باسشىسىمەن كەلىسىلۋى ءتيىس. وسىعان وراي جوسپار جوباسىن پرەزيدەنت اكىمشىلىگىنە ەنگىزۋ ۇسىنىلادى» دەدى مينيستر.

ماسەلەنى ۇكىمەت باسشىسى اسقار مامين قورىتىندىلادى. «كەلەسى جىلى مەملەكەت باسشىسىنىڭ 2020 جىلعى 1 قىركۇيەكتەگى جولداۋىنان تۋىنداعان ەكى زاڭ جوباسىن پارلامەنتكە ەنگىزۋىمىز قاجەت. بۇل – بيرجالىق ساۋدانى دامىتۋ جانە سىبايلاس جەمقورلىققا قارسى ءىس-قيمىل ماسەلەلەرى تۋرالى زاڭ جوبالارى. 2021 جىلدىڭ جوسپارىنا سونداي-اق ءۇش جاڭا زاڭ جوباسى ەنگىزىلدى. بۇل گەودەزيا، بيولوگيالىق قاۋىپسىزدىك جانە اسكەري پوليتسيا تۋرالى زاڭ جوبالارى» دەدى ا.مامين وسى ماسەلەگە وراي.

پرەمەر-مينيستر مۇددەلى مەم­لە­كەتتىك ورگانداردىڭ ءبىرىنشى باسشىلارى­نا زاڭ جوبالارىنىڭ ساپاسىنا جانە ولار­دىڭ ۇكىمەت پەن پارلامەنتكە ۋاقتىلى ەنگىزىلۋىنە ەرەكشە نازار اۋدارۋدى تاپسىردى.

 

سوڭعى جاڭالىقتار

ەرلىككە تولى سۋرەتتەر

رۋحانيات • بۇگىن، 13:05

كيىكتەردىڭ تولدەۋ كەزەڭى باستالدى

فوتوگالەرەيا • بۇگىن، 12:07

«بارىستىڭ» العاشقى ترانسفەرى

حوككەي • بۇگىن، 08:50

«ءان» بە، «ءۇن» بە؟

رۋحانيات • بۇگىن، 08:36

جۋرناليست قاسىم

رۋحانيات • بۇگىن، 08:34

ءسوز سويىل: ءازىل-وسپاق

رۋحانيات • بۇگىن، 08:32

دالالىق وركەنيەت تاعىلىمى

تاريح • بۇگىن، 08:23

بالاباقشانىڭ جوعىنان بارى جاقسى

ايماقتار • بۇگىن، 08:18

كاسىپكە باۋلۋ – قاسيەتتى بورىش

ايماقتار • بۇگىن، 08:16

اتى-جونىمىزگە اباي بولايىق

قوعام • بۇگىن، 08:14

ءۇي ىشىندەگى ۇيلەسىم

پىكىر • بۇگىن، 08:06

قوي باققان وزار...

ايماقتار • بۇگىن، 08:03

ۇقساس جاڭالىقتار