ەسكە الساق, قانە, وزگە دە ەرەن جانداردى
قازاق ولەڭىندە وزىندىك ورنەگى بار اقىن ادىلبەك ءابايدىلدانوۆ ەدى. سول اقىنعا ارنالعان كەش قازاقستان جازۋشىلار وداعىنىڭ استانا بولىمشەسىنىڭ ۇيىمداستىرۋىمەن ەلورداداعى ۇلتتىق اكادەميالىق كىتاپحانادا ءوتتى. العاشقى ءسوزدى بولىمشە باسشىسى, مەملەكەتتىك سىيلىقتىڭ لاۋرەاتى نەسىپبەك ايت ۇلى الىپ, تاياۋدا عانا جارىق كورگەن اقىننىڭ تاڭدامالى جيناعى تۋرالى وي تولعادى. بۇل ەڭبەك وزگە ەمەس, ارتىندا قالعان قىزى بوتاگوز بەن كۇيەۋ بالاسى جۇنىسبەكتىڭ تالپىنىسىمەن جارىق كورگەنىن تىلگە تيەك ەتتى.
ەسكە الساق, قانە, وزگە دە ەرەن جانداردى
قازاق ولەڭىندە وزىندىك ورنەگى بار اقىن ادىلبەك ءابايدىلدانوۆ ەدى. سول اقىنعا ارنالعان كەش قازاقستان جازۋشىلار وداعىنىڭ استانا بولىمشەسىنىڭ ۇيىمداستىرۋىمەن ەلورداداعى ۇلتتىق اكادەميالىق كىتاپحانادا ءوتتى. العاشقى ءسوزدى بولىمشە باسشىسى, مەملەكەتتىك سىيلىقتىڭ لاۋرەاتى نەسىپبەك ايت ۇلى الىپ, تاياۋدا عانا جارىق كورگەن اقىننىڭ تاڭدامالى جيناعى تۋرالى وي تولعادى. بۇل ەڭبەك وزگە ەمەس, ارتىندا قالعان قىزى بوتاگوز بەن كۇيەۋ بالاسى جۇنىسبەكتىڭ تالپىنىسىمەن جارىق كورگەنىن تىلگە تيەك ەتتى.
بەلگىلى اقىن سەرىك تۇرعىنبەكوۆ ۇمىت قالىپ بارا جاتقان اقىننىڭ ارتىندا قالعان مۇراسىن جيناقتاپ شىعارعان ۇرپاعىنا شىنايى العىسىن ءبىلدىرىپ, ادىلبەك ءابايدىلدانوۆتىڭ ولەڭدەرى مەن پوەمالارىنا تالداۋ جاسادى. اسىرەسە, بوستاندىق جولىندا مەرت بولعان «قىران» پوەماسىنداعى قىران تۇلعاسىنا ەرەكشە توقتالدى. ودان كەيىن «جارىسقا جاراتىلعان جاراۋ اتتاي», دەپ «ادىلبەك تۋرالى اۋەن» اتتى ولەڭىن وقىدى. قارىمدى قالامگەر, كوركەمسوز شەبەرى سۇلتان ورازالى «ءادىلبەكتى ەس جيىپ ەسكە ءتۇسىرىپ جاتقانىمىز يگىلىكتى ءىس. ادىلبەك سياقتى زامانداستارىمىز ۇمىت قالىپ, تاريحقا اينالىپ بارا جاتقاندا ەلگەزەكتىك تانىتقان مىنا قادام قاي-قايسىمىزدى دا ويلاندىرۋى ءتيىس. ادىلبەك كەسكىندى دە, كەلبەتتى, سۇلۋ تورىداي سىمباتتى جىگىتتىڭ تورەسى ەدى. ول بار بولعانى 44 جىل ءومىر ءسۇردى. بىراق ارتىنا قالدىرعان مۇراسى مول. مەن وسى ارادا اقىننىڭ نەبىر ايتۋلى تۇستاستارى بولعانىن, ولاردىڭ قاتارىندا: ءىزتاي مامبەتوۆ, بەكەن ابدىرازاقوۆ, نۇرسۇلتان الىمقۇلوۆ, ءشامىل مۇحامەدجانوۆ, ەركەش يبراھيم, تاعى باسقالار بار ەدى. سولاردى دا وسىلاي ەسكە ءتۇسىرىپ, كەش وتكىزسەك, كەيىنگى ۇرپاققا تانىستىرساق, ازاماتتىق پارىزىمىزدى ادال اتقارعان بولار ەدىك», دەپ ءسوز اياعىن ءتۇيدى.
مەملەكەتتىك سىيلىقتىڭ لاۋرەاتى, جازۋشى قويشىعارا سالعارا ۇلى ادىلبەك ءابايدىلدانوۆتىڭ سىرشىل جىرلارىنا, اسىرەسە, ەل مەن جەردى تولعاعان پوەمالارىنا ەرەكشە نازار اۋداردى. رەجيسسەر ساۋلەبەك اسىلحان اقىن ولەڭدەرىنەن ۇزىندىلەر وقىپ, قالامگەر ماتكارىم اكىمجانوۆ كەيىپكەرلەرگە كەڭىنەن توقتالدى.
كەش انمەن ورنەكتەلىپ, كۇيمەن كومكەرىلىپ وتىردى.
سۇلەيمەن مامەت,
«ەگەمەن قازاقستان».
