وبلىستىق قوعامدىق دەنساۋلىق باسقارماسىنىڭ باسشىسى مارات پاشيموۆ وڭىردە كوروناۆيرۋس ينفەكتسياسىنىڭ ىقتيمال بەلەڭ الۋ جاعدايلارى ەسكەرىلە وتىرىپ, مەديتسينالىق ۇيىمداردا 6 مىڭعا جۋىق توسەكتىك ورىنمەن قامتۋ قاراستىرىلعانىن ايتادى.
«اۋرۋحانالاردا ماتەريالدى-تەحنيكالىق بازا جاقسارتىلدى. وكپەنى جاساندى تىنىستاندىرۋ اپپاراتتارىنىڭ سانى 65 پايىزعا ارتتى. سونىمەن قاتار قۋاتتىلىعى مىقتى 80 وكسيگەن اپپاراتى الىندى. وتتەگى كونتسەنتراتورلارىنىڭ سانى 900 بىرلىككە جەتىپ, بۇگىندە ءوسىم 95%-دى قۇراپ وتىر. قوسىمشا 5 رەنگتەن جانە 1 كومپيۋتەرلىك توموگراف اپپاراتتارىن الدىق. اۋرۋحانا ايماقتارىنان سالىنعان وتتەگى ستانسالارى دا ەكى ەسەگە ارتتى. كورشى ەلدەرمەن شەكارالاس سارىاعاش پەن ماقتاارال اۋداندارىندا كارانتيندىك ستاتسيونارلىق ورىنداردى دايارلاپ قويدىق. بۇدان بىلاي شەكارادان وتكەن ءاربىر ازاماتتىڭ قولىندا COVID-19 ينفەكتسياسىنا تەكسەرىلگەن اناليز قورىتىندىسى بولۋى ءتيىس. بولماعان جاعدايدا جەرگىلىكتى دارىگەرلەر ولاردان اناليز الىپ, ستاتسيونارعا جاتقىزادى. ءدال قازىرگى ۋاقىتتا سارىاعاشتاعى ستاتسيوناردا 10 ازامات جاتىر. جالپى, وبلىس كولەمىندە ناۋقاستارعا ارنالعان 6500 توسەكتىك-ورىن دايىن تۇر. بارلىق مەكەمەلەردە 2-3 ايلىق ءدارى-دارمەك قورى جاساقتالعان. قازىر وبلىستا ەپيدەميالىق احۋال تۇراقتى, ينفەكتسيالىق ستاتسيوناردا ەكى ناۋقاس ەم قابىلداۋدا. ولاردىڭ جاعدايى تۇراقتى», دەيدى م.پاشيموۆ.
وبلىستىڭ باس دارىگەرى سونداي-اق جىل سوڭىنا دەيىن 122 جەدەل جاردەم كولىگى بەرىلەتىنىن جەتكىزدى. ياعني وڭىردەگى جەدەل جاردەم كولىكتەرى 100 پايىز جاڭارادى. ودان بولەك جاقىن كۇندەرى 12 جىلجىمالى مەديتسينالىق كەشەن ءوڭىردىڭ شالعاي اۋىلدارىنا بارىپ قىزمەت كورسەتپەك. مەديتسينالىق اۆتوكەشەن ۋدز, رەنتگەن اپپاراتتارى, زەرتحانامەن جابدىقتالعان. اۋىل تۇرعىندارى مۇندا اناليز تاپسىرىپ, دارىگەرلەردىڭ تەكسەرۋىنەن وتە الادى.
العاشقى تولقىندا 1400-گە جۋىق پاتسيەنتتى ەمدەپ, كوروناۆيرۋس جۇقتىرعان جۇكتى ايەلدى دە امان-ەسەن بوساندىرىپ العان كەنتاۋ قالالىق اۋرۋحاناسى دا ناۋقاستارعا ساپالى مەديتسينالىق كومەك كورسەتۋگە دايىن. اۋرۋحانانىڭ باس دارىگەرى گۇلبانۋ سىزدىقوۆا 580 ورىن ءازىر تۇرعانىن ايتادى. «بۇگىندە وبلىس بويىنشا 8 وتتەگى ستانساسى ىسكە قوسىلعان. سونىڭ ءبىرى وسى كەنتاۋ اۋرۋحاناسىندا ورنالاسقان. ستانسانى جەرگىلىكتى مەتسەنات بەكبولات بەكەنوۆ ءوز قاراجاتىنا سالىپتى. قۇنى 60 ملن تەڭگەلىك ستانسا تاۋلىگىنە 250 وتتەگى باللونىن تولتىرا الادى. قاجەت بولعان جاعدايدا وزگە دە مەكەمەلەردى وتتەگىمەن قامتاماسىز ەتە الامىز», دەيدى باس دارىگەر.
«ناۋرىز ايىنان باستاپ وبلىستىق قوعامدىق دەنساۋلىق باسقارماسى تاراپىنان 75 ملن تەڭگەگە دەيىن ءدارى-دارمەك بەرىلدى. اۋرۋحانادا 10 دانا وكپەنى جاساندى تىنىستاندىرۋ اپپاراتى, 47 وتتەگى كونتسەنتراتورى بار. ەلۋ توسەكتىك ورىنعا ارنالعان ينفەكتسيالىق گوسپيتال ناۋقاستاردى قابىلداۋعا تولىعىمەن دايىن. بىزدە مامان تاپشىلىعى جوق. جالپى, 520 مەديتسينا قىزمەتكەرىمىز بار. ونىڭ 57-ءسى دارىگەر, 220 ورتا بۋىندى قىزمەتكەر», دەيدى گۇلبانۋ جۇماعاليقىزى.
ال ارىس قالالىق ورتالىق اۋرۋحاناسى جەكە قورعانىس كيىمدەرى مەن ءدارى-دارمەكتىڭ ەكى ايلىق قورىمەن قامتاماسىز ەتىلگەن. جانساقتاۋ بولىمىندە 9 وكپەنى جاساندى تىنىستاندىرۋ اپپاراتى, قوسىمشا 50 وتتەگى وكسيگەنەراتورى جانە باسقا دا قاجەتتى مەديتسينالىق قۇرال-جابدىقتار ورناتىلعان. قاندا وتتەگىنىڭ قانشالىقتى قانىققانىن انىقتايتىن پۋلسوكسيمەتردىڭ 144 داناسى الىنعان. وسى قۇرالدىڭ كومەگىمەن دارىگەرلەر ناۋقاستىڭ جاعدايى قانشالىقتى اۋىر نەمەسە قاناعاتتانارلىق ەكەنىن انىقتاي الادى. ساتۋراتسياسى 93-تەن تومەن پاتسيەنتتەر بىردەن جانساقتاۋ بولىمىنە جاتقىزىلادى ەكەن. اۋرۋحانادا 40 پروۆيزورلىق توسەكتىك ورىن مەن 20 ناۋقاسقا ارنالعان ينفەكتسيالىق گوسپيتال دايىن تۇر. جالپى, قازىر ارىستا كوروناۆيرۋس ينفەكتسياسىمەن كۇرەسكە جۇمىلدىرىلعان 19 ءموبيلدى توپ حالىققا قىزمەت كورسەتۋدە.
ورداباسى اۋداندىق اۋرۋحاناسى دا ىندەتتىڭ ەكىنشى تولقىنىنا دايىن. ەمدەۋ مەكەمەسى جەكە وتتەگى ستانساسى, 23 وكپەنى جاساندى تىنىستاندىرۋ اپپاراتىمەن جاساقتالعان. اۋرۋحانانىڭ ەسكى عيماراتىن تولىق جوندەۋدەن وتكىزگەن ۇجىم ەندى كوروناۆيرۋس ينفەكتسياسىن وزدەرى انىقتاي الادى. سەبەبى مۇندا ىندەتتى انىقتايتىن زەرتحانا ىسكە قوسىلدى. پتر سىناماسى بويىنشا انىقتايتىن زەرتحانانىڭ تاۋلىگىنە 500-گە جۋىق تەست قابىلداۋعا مۇمكىندىگى بار. الداعى ۋاقىتتا ارىس قالاسى مەن بايدىبەك اۋداندارىنان سىناما قابىلداۋ جوسپارلانۋدا. وبلىس بويىنشا مۇنداي 12 زەرتحانا جۇمىس ىستەۋدە.
وڭىردە بۇگىندە حالىققا قىزمەت كورسەتىپ جۇرگەن 23 429 مەديتسينا قىزمەتكەرىنىڭ 5 مىڭنان استامى – دارىگەر, قالعاندارى – ورتا بۋىن ماماندارى. ستاتيستيكالىق دەرەكتەرگە سۇيەنسەك, تۇركىستان وبلىسىندا – 31, شىمكەنت قالاسىندا 21 اق حالاتتى ابزال جان پاندەميا كەزىندە اجال قۇشقان.
تاياۋدا «وڭتۇستىك» مەديتسينا قىزمەتكەرلەرى قاۋىمداستىعى» قوعامدىق بىرلەستىگىنىڭ ۇيىمداستىرۋىمەن پاندەميا كەزىندە كوز جۇمعان مەديتسينا قىزمەتكەرلەرىنە قۇرمەت كورسەتىلىپ, «دارىگەرلەر اللەياسىنداعى» تاقتايشالارعا گۇل شوقتارى قويىلدى. شىمكەنت قالاسىنداعى اباي ساياباعىندا ورنالاسقان وتەۋبويداق تىلەۋقابىل ۇلىنىڭ ەسكەرتكىشى الدىنا جينالعان قاۋىم ءبىر مينۋت ۇنسىزدىكپەن دارىگەرلەردى ەسكە الىپ, قۇران باعىشتادى. تۇركىستان وبلىسى جانە شىمكەنت قالاسىنداعى مەديتسينا مەكەمەلەرىندە قىزمەت ەتىپ, جۇمىس بارىسىندا قازا تاپقان اق حالاتتىلاردىڭ ەت جاقىندارى مەن تۋىستارى دارىگەر انتى جازىلعان تاقتايشا الدىنا گۇل شوقتارىن قويدى. ۇيىمداستىرۋشىلاردىڭ ايتۋىنشا, ءىس-شارا قىزمەت بابىندا اۋرۋدان كوز جۇمعان مەديتسينا قىزمەتكەرلەرىنە قۇرمەت كورسەتۋ ماقساتىندا وتكىزىلىپ وتىر. سونداي-اق ۇل-قىزدارى نەمەسە اتا-انالارى ولاردى ماقتان ەتىپ, ەرلىككە پارا-پار ەڭبەكتەرىن باعالاپ ءجۇرسىن, تۋىستارىنا رۋحاني دەمەۋ بولسىن دەگەن نيەتپەن ارنايى مەدالداردى قازا تاپقان مەديتسينا قىزمەتكەرلەرىنىڭ تۋىستارىنا بەرۋ ۇيعارىلىپتى. بۇل ورايدا, ء«ومىر ءۇشىن», «التىن دارىگەر» جانە «مەيىرىم» مەدالدارى تابىس ەتىلدى. مىسالى, ورداباسى اۋداندىق اۋرۋحاناسىندا 35 جىل تاپجىلماي مەيىربيكە بولعان ورىنكۇل قۇرالبەكوۆانىڭ «مەيىرىمىن» قىزى ەلميرا الۋعا كەلىپتى.
«انامنىڭ قازاسى جۇرەگىمە قاتتى باتتى. مەنى دە جاستايىمنان مەديتسينا سالاسىنا باۋلىعان انام ەدى. قازىر انامىڭ ءىزىن قۋىپ, سول اۋرۋحانادا قىزمەت ەتىپ ءجۇرمىن. پاندەميا كەزىندە تەراپيا بولىمىنە ناۋقاستار وتە كوپ ءتۇستى. انام ەڭبەك دەمالىسىنا دا سول ءۇشىن كەشىگىپ شىقتى. جۇمىس بارىسىندا كەيدە ءۇزىلىسسىز جۇمىس ىستەپ ءجۇردى. «ناۋقاس كوپ, ال مامان جەتىسپەيدى. سوندىقتان مەن جۇمىستا بولۋىم كەرەك» دەپ ىسىنە ادالدىق تانىتتى. ماۋسىم ايىندا مەديتسينا قىزمەتكەرلەرى كۇنىندە وبلىس اكىمى ومىرزاق شوكەەۆتىڭ العىس حاتىن العان بولاتىن. سول كۇنى اۋىرىپ, مازاسى بولماي تۇرعان. بۇل ونىڭ كوزى تىرىسىندە العان سوڭعى ماراپاتى ەكەنىن قايدان بىلەيىك. ءۇش كۇننەن كەيىن انام اۋىرىپ, قايتىس بولدى», دەپ كوزى جاساۋراعان ەلميرا قورعان اناسىنىڭ ەڭبەگىن باعالاعان ۇيىمداستىرۋشىلارعا العىسىن ءبىلدىردى.
سونداي-اق قوعامدىق بىرلەستىك وكىلدەرى كوروناۆيرۋستان كوز جۇمعان مەديتسينا قىزمەتكەلەرىنىڭ ءومىرى مەن قيىندىققا تولى قىزمەت جولدارىن باياندايتىن ەلەكتروندى كىتاپ ازىرلەپ جاتقاندارىن جەتكىزدى.
ايتا كەتەلىك, اق حالاتتى جانداردىڭ ەرەن ەڭبەگىنىڭ ناتيجەسىندە وڭىردە قاۋىپتى ىندەتتى جۇقتىرعان 3 331 ناۋقاس تولىق جازىلىپ شىققان. جالپى, سوڭعى مالىمەتتەرگە سايكەس پاندەميا بەلەڭ العالى وبلىستا COVID-19 ينفەكتسياسى راستالعان 3 395 جاعداي تىركەلدى. ولاردىڭ 2 355-ىندە اۋرۋ سيمپتومسىز وتكەن.
تۇركىستان وبلىسى
