التىنبەكتىڭ العىرلىعى مەن وزىنە دەگەن سەنىمى, تاباندىلىعى مەن تالپىنىسى تالاي بيىكتەردى باعىندىرىپ, جەڭىسكە جەتۋىنە ىقپال ەتكەن. ول 2013 جىلى الماتى قالاسىندا وتكەن ستۋدەنتتەر كونفەرەنتسياسىندا «ۇزدىك بايانداماشى» اتالىمىن, ستۋدەنتتەر مەن جاس عالىمداردىڭ حالىقارالىق كونفەرەنتسياسىندا «ۇزدىك جوبا» نوميناتسياسىن ەنشىلەپ, جاس پەداگوگتەردىڭ ء«وز جۇلدىزىڭدى جاق» قالالىق بايقاۋىندا ءى ورىن, «جاڭا مەكتەپتە – جاڭاشىل ۇستاز» ءىىى رەسپۋبليكالىق جاس پەداگوگتار بايقاۋىندا ءى ورىندى جەڭىپ العان.
بۇگىندە «جاس ۇستازدار» قاۋىمداستىعىنىڭ توراعاسى. قاۋىمداستىقتىڭ نەگىزگى ماقساتى – جاس ۇستازدى قولداۋ, وعان باعىت-باعدار بەرۋ, قوعامدىق ءىس-شارالارداعى بەلسەندىلىگىن ارتتىرۋ. ونىڭ قۇرىلۋ تاريحى بار, دەيدى ءبىزدىڭ كەيىپكەر.
«بىلتىر اقمولا وبلىسى, ششۋچينسك قالاسىندا ورنالاسقان «بالداۋرەن» وقۋ-ساۋىقتىرۋ ورتالىعىندا ءبىلىم جانە عىلىم مينيسترلىگىنىڭ ۇيىمداستىرۋىمەن «جاڭا مەكتەپتە – جاڭاشىل مۇعالىم» اتتى ءىىى رەسپۋبليكالىق جاس مۇعالىمدەر سايىسىنا الماتى قالاسىنىڭ اتىنان 3 مۇعالىم جولداما الىپ, ءوز باعىمىزدى سىناپ, جۇلدەلى ءى جانە ءىىى ورىنعا يە بولدىق. سايىسقا رەسپۋبليكانىڭ ءار تۇكپىرىنەن 58 جاس مۇعالىم قاتىستى. كونكۋرس بارىسى ءبىزدى جارىستىرىپ قانا قويماي, ءوزارا تاجىريبە الماستىردى. ءۇش كۇنگە ۇلاسقان بۇل كونكۋرستا دۇنيەتانىمى كەڭ قاتارلاستارىمدى كورىپ, ءبىلىم سالاسىنداعى كوش تىزگىنىن ۇستايتىن جاس مامانداردىڭ بارىنا كوزىم جەتتى», دەيدى ا.سۇلتانقۇلوۆ.
سونىمەن قاتار ول ششۋچينسكىدەن العان شابىتى الماتى قالاسىندا جالعاسىپ, ىرگەلى ىستەر اتقارۋعا جول اشقانىن جەتكىزدى.
«وسىنداي ءبىلىم جولىندا جۇرگەن جاس پەداگوگتەردىڭ باسىن قوسىپ, ولارعا دۇرىس باعىت-باعدار بەرەتىن ۇيىم قۇرساق دەگەن وي پايدا بولدى. وسى ۇسىنىسىمىزدى الماتى قالاسىنىڭ ءبىلىم باسقارماسى, ءبىلىم بەرۋدەگى جاڭا تەحنولوگيالاردىڭ قالالىق عىلىمي-ادىستەمەلىك ورتالىعىنىڭ باسشىسىنا ۇسىندىق. باسشىلىق بىردەن قولدادى. ارمان ىسكە استى. «جاس ۇستازدار» قاۋىمداستىعى قۇرىلدى. قاۋىمداستىقتىڭ نەگىزگى ماقساتى – جاس ۇستازدى قولداۋ, وعان باعىت-باعدار بەرۋ, قوعامدىق ءىس شارالارداعى بەلسەندىلىگىن ارتتىرۋ. قاۋىمداستىق قالالىق ادىستەمەلىك كابينەتپەن, اۋداندىق ءبىلىم باسقارماسىمەن جانە مەكتەپ اكىمشىلىگىمەن تىكەلەي جۇمىس ىستەيدى. قالالىق ادىستەمەلىك ورتالىق ادىسكەرلەرى قاۋىمداستىقتاعى جاس ماماندارمەن تىعىز بايلانىسىپ, ادىستەمەلىك تۇرعىدان قيىندىق تۋعان جاعدايدا اركەز جانىمىزدان تابىلادى», دەيدى جاس مامان.
ءيا, زامان ءوز اعىمىمەن قارقىنداپ دامۋدا. سايكەسىنشە ۇستازدىق قىزمەت تە جاڭاشىلدىقتى تالاپ ەتەدى. مەكتەپ قابىرعاسىندا تاعايىندالعان تالىمگەر جاس مامانعا جۇمىس بابىن تۇسىندىرسە, جاستار جاستارعا جاڭاشىلدىقتى ۇيرەتەدى. رۋحاني جاڭعىرۋ ۇستىندەگى جاس ەلگە ەنەرگياسى مەن يدەياسى مول جاس ماماننىڭ بەرەرى كوپ-اق. تەك وسى قىزمەت جولىنىڭ العاشقى ۋاقىتىنداعى قيىندىقتارعا توتەپ بەرسە بولعانى. قاۋىمداستىقتىڭ اتقارعان جۇمىستارىن تىزبەلەي كەلە التىنبەك مۇرزاتاي ۇلى ۇستازدىق قىزمەتتى ابىرويمەن الىپ ءجۇرۋ ءۇشىن ارداگەر ۇستازدارمەن بايلانىستا بولۋ ماڭىزدى ەكەنىن اتاپ ءوتتى.
«جاس ۇستازداردىڭ تۇلعالىق دامۋى ماقساتىندا قازاقستاننىڭ تۇڭعىش ەڭبەك ەرى, «وتان» وردەنىنىڭ يەگەرى اياگۇل ميرازوۆامەن كەزدەسۋ وتكىزدىك. شارا بارىسىندا جالىندى جاستاردىڭ بولاشاعىنا سەنىم وياندى. ايرىقشا اتاپ وتەتىن تاعى ءبىر جايت, الماتى قالاسى جاس پەداگوگتەرى اباي مۇراسىن ناسيحاتتاۋدىڭ جاڭا جوباسىن باستادى. اباي قۇنانباي ۇلىنىڭ 175 جىلدىعى اياسىندا ءوتىپ جاتقان «اباي وقۋلارى» چەلەندجىندە اباي ولەڭدەرى وقىلىپ, جاس ۇرپاقتىڭ دۇرىس قابىلداۋى ماقساتىندا سول ولەڭدەرگە تۇسىندىرمە جۇرگىزىلدى», دەيدى جاس ۇستاز.
اتالعان قاۋىمداستىق الماتى قالاسى ءبىلىم باسقارماسىنىڭ قولداۋىمەن «ىسكەر ۇستاز» جانە «جاس ۇستازدار» قاۋىمداستىعىمەن بىرلەسىپ ءارتۇرلى كەزدەسۋ ۇيىمداستىرعان.
«ۇستازدىق مىنەز-ق ۇلىق ماماندىقتى مەڭگەرۋ بارىسىندا قالىپتاسۋى ءتيىس. الەمدى اۋرەلەگەن پاندەميا ەلىمىزدى دە اينالىپ وتكەن جوق. ءبىلىم بەرۋ قاشىقتان وقىتۋ جۇيەسىنە كوشتى. شىڭدالىپ ۇلگەرمەگەن جاس مامان سىنعا تۇسكەن كەزەڭدە ادىستەمەلىك كابينەت پەن قاۋىمداستىق كومەككە كەلدى. ادىستەمەلىك ورتالىق ۇلگى رەتىندەگى قىسقا مەرزىمدى ساباق جوسپارلارىمەن قامتاماسىز ەتتى. ۇستازدىق قىزمەتتىڭ ەڭبەگى كورىنبەي قالىپ جاتادى. دەگەنمەن قاشاندا جەمىسى بيىك باعالاناتىنى انىق. وسى تاراپتان بارشا ۇستازداردىڭ, اتا-انالار, شاكىرتتەردىڭ رۋحىن كوتەرۋگە تالماي ەڭبەكتەنۋىمىز كەرەك. «قاشىقتان وقىتۋدا وقۋشىلاردىڭ جەتىستىگىن باعالاۋدىڭ ءتيىمدى تاجىريبەسى» ۆەبينارىندا «Quizizz» باعدارلاماسى جونىندە تولىق اقپارات بەرىلدى», دەيدى ا.سۇلتانقۇلوۆ.
قاۋىمداستىق قىسقا مەرزىم ىشىندە جوعارى ناتيجەلەرگە قول جەتكىزىپ ۇلگەرگەن. دالىرەك ايتساق, جاس مامانداردىڭ وزدەرىنە دەگەن سەنىمدىلىكتەرى كۇشەيىپ, باسقا قىرلارىنان تانىلا باستاعان, ماماندىققا دەگەن قىزىعۋشىلىقتارى ارتىپ, رەسپۋبليكالىق, قالالىق كونكۋرستاردىڭ جۇلدەگەرلەرى اتانعان, قوعامدىق شارالاردى ۇيىمداستىرۋداعى بەلسەندىلىكتەرى ارتقان.
«تاريحتىڭ ءار كەزەڭىندە ۇستازدىڭ الار ورنى بولەك بولعان. ولار ءوز مىندەتتەرىن اتقارىپ شىقتى. جاھاندانۋ كەزەڭى قازىرگى جاس ۇستازداردىڭ قولىندا. رۋحاني جاڭعىرعان جاستاردى جان-جاقتى قولداۋ كەرەك. سوندا عانا كەيىنگى تولقىن ۇرپاقتىڭ ۇلتجاندى ءھام پاتريوت بولىپ تاربيەلەنەتىنىنە سەنىمىمىز مول بولادى. ءسوزىمنىڭ سوڭىن قازاق ءالىپبيىنىڭ نەگىزىن قالاۋشى, اعارتۋشى احمەت بايتۇرسىن ۇلىنىڭ سوزىمەن اياقتاعىم كەلەدى: «قازاققا قىزمەت قىلامىن دەگەن جاستارعا جالعىز-اق ايتارىم: ىستەگەن ىستەرىڭ حالىق ءۇشىن بولسىن. مەنىڭ ءىسىم تاريحتىڭ سىنىنا تۇسەر, بىراق ءوز تاجىريبەمشە. جاستار ءتۇزۋ جولمەن بارادى. مەنىڭ سۇيەنىشىم وسى». مەنىڭ دە سۇيەنىشىم وسى», دەيدى ءبىزدىڭ كەيىپكەر.
الماتى قالاسى, بوستاندىق اۋدانى, №94 گيمنازياسىنىڭ فيزيكا ءپانى مۇعالىمى جانسايا نۇرالىقىزى قاۋىمداستىقتا ءجۇرىپ كوپتەگەن ماسەلەلەرىم ءوز شەشىمىن تاپتى دەيدى.
«مەن 2019-2020 وقۋ جىلىندا مەكتەپ تابالدىرىعىن مۇعالىم رەتىندە اتتادىم. ارينە, جۇمىس بارىسىندا وزىندىك قيىندىقتار كەزدەستى. سول ماسەلەلەردىڭ ءبىراز بولىگىن وسى قاۋىمداستىقتا ءجۇرىپ, شەشىمىن تاپتىم. ءوزىم سياقتى جاس ارىپتەستەرىممەن دە ءبولىسىپ, ءبىر-بىرىمىزگە قولداۋ بىلدىردىك. قاۋىمداستىق جۇمىسى قىزۋ جۇرۋدە. شىعارماشىلىق جولىنداعى ءارتۇرلى شارالار بىزگە قوسىمشا موتيۆاتسيا بەرەدى. ۇستازدىق قىزمەتكە دەگەن قىزىعۋشىلىعىمدى ودان سايىن ارتتىرادى. قاۋىمداستىق جۇمىسى عۇمىرلى بولىپ, ءوز جالعاسىن تابادى دەپ سەنەمىن. وسەمىن, ورلەيمىن دەگەن جاستارعا وسىنداي ورتا اۋاداي قاجەت», دەيدى جاس مامان.
