حح عاسىردىڭ سوڭى مەن ءححى عاسىردىڭ باسىندا قازاقستان قۇراماسى سارى قۇرلىقتاعى ەڭ بەلدى كوماندالاردىڭ ءبىرى بولعانى بەلگىلى. سول كەزدەرى ءبىزدىڭ جىگىتتەر قاتارىنان ەكى مارتە ازيا چەمپيوناتىندا جەڭىس تۇعىرىنا كوتەرىلىپ, ءوز جانكۇيەرلەرىن قۋانتتى. اتاپ ايتساق, 1999 جىلى مالايزيادا قولا مەدالدى قورجىنعا سالدىق. توپتىق تۋرنيردە تابىستى ونەر كورسەتكەن جەرلەستەرىمىز جارتىلاي فينالدا وڭتۇستىك كورەيادان (3:8) ۇتىلعانىمەن, ءۇشىنشى ورىن ءۇشىن كەزدەسۋدە جاپونيانى (2:2, پەنالتيدەن – 4:3) جەڭدى. 2000 جىلى تايلاندتا كۇمىس مەدالدى يەلەندىك. بۇل جولى وڭتۇستىك كورەيامەن (3:3) تەڭ ءتۇسىپ, جارىس قوجايىندارى (4:3) جانە سينگاپۋرگە (19:0) سان سوقتىردىق. جارتىلاي فينالدا تاعى دا جاپونداردان (9:6) باسىم تۇستىك. فينالدا يرانعا (1:4) ەسە جىبەردىك. وسى تابىسىنىڭ ارقاسىندا قازاقستاندىق فۋتزالشىلار الەم چەمپيوناتىندا كۇش سىناسۋ مۇمكىندىگىنە يە بولدى.
ارادا بىرنەشە اي وتكەننەن سوڭ وتانداستارىمىز سوناۋ امەريكا قۇرلىعىندا ورنالاسقان گۆاتەمالاعا اتتاندى. تۇساۋكەسەر كەزدەسۋىن داڭقتى برازيلياعا قارسى وتكىزگەن فۋتزالشىلارىمىز 1:12 ەسەبىمەن ويسىراي ۇتىلدى. كەلەسى كەزدەسۋدە گۆاتەمالادان (5:6) جەڭىلدىك. ءۇشىنشى ماتچتا پورتۋگالياعا (2:6) جول بەردىك. وسىلايشا ءۇش كەزدەسۋدە دە جەڭىلىستىڭ كەرمەك ءدامىن تاتقان جەرلەستەرىمىز ءۇشىن بۇل جارىس اياقتالدى. ءبىزدىڭ توپتان برازيليا مەن پورتۋگاليا ەكىنشى كەزەڭگە جولداما الدى. وزگە توپتاردا مىنا كوماندالار وزدى: «ۆ» توبى – نيدەرلاند پەن مىسىر, «س» توبى – رەسەي مەن حورۆاتيا جانە «D» توبى – يسپانيا مەن ارگەنتينا.
العاشقى سىناقتان سۇرىنبەي وتكەن سەگىز كوماندا تاعى دا ءتورت-تورتتەن ەكى توپقا ءبولىنىپ, جارىستى جالعاستىردى. سولاردىڭ اراسىنان برازيليا مەن رەسەي جانە يسپانيا مەن پورتۋگاليا جارتىلاي فينالعا شىقتى. بۇل مەجەدە يسپاندىقتار رەسەيلىكتەردى (3:2) قاپى قالدىرسا, برازيليالىقتار پورتۋگاليالىقتاردىڭ (8:0) تاس-تالقانىن شىعاردى. فينالدىق سايىستا وڭتۇستىك امەريكانىڭ وعىلاندارى مەن پيرەنەي تۇبەگىنىڭ تۇلەكتەرى كەزدەستى. بۇل باسەكەدە برازيليا قۇراماسى باسىم تۇسەتىنىنە كوپشىلىكتىڭ ەش كۇمانى بولعان جوق. ويتكەنى وسىعان دەيىن وتكەن ءۇش الەم چەمپيوناتىنىڭ ۇشەۋىندە دە ايتۋلى مەملەكەتتىڭ ورەندەرى قارسىلاس شاق كەلتىرمەي, باس جۇلدەنى ولجالاعان ەدى. بىراق بۇل جولى يسپانيانىڭ باعى جاندى. ۇزاق ۋاقىت بويى تارازى باسى تەڭسەلىپ تۇرعان تارتىستا ولار 4:3 ەسەبىمەن جەڭىس تويىن تويلادى. ءۇشىنشى ورىن ءۇشىن كەزدەسۋدە پورتۋگاليا رەسەيدىڭ وسال تۇسىن تاپتى. ەسەپ – 4:2.
جارىستىڭ قورىتىندىسى بويىنشا برازيليالىق مانۋەل توبياس ەڭ ۇزدىك ويىنشى دەپ تانىلدى. ءدال وسى اياق دوپ شەبەرى مەرگەندەر كوشىن دە باستادى. 29 جاستاعى پەرنامبۋكۋ شتاتىنىڭ تۋماسى گۆاتەمالادا قارسىلاستار قاقپاسىن 29 مارتە ءدال كوزدەدى. وسىلايشا ول قاتارىنان ەكىنشى مارتە فۋتزال ونەرىندەگى ەڭ مارتەبەلى سىيلىقتاردى يەلەندى. 1996 جىلى يسپانيادا ۇيىمداستىرىلعان دۇنيەجۇزىلىك دوپ دوداسىندا دا توبياسقا تەڭ كەلەر ەشكىم تابىلماعان ەدى.
ءيا, گۆاتەمالادادا ءبىزدىڭ جىگىتتەردىڭ ويسىراي ۇتىلعانى راس. بىراق ول كەزدە الەم چەمپيوناتىنا قاتىسۋدىڭ ءوزى زور مارتەبە ەدى. سوندىقتان دا «وسىعان دا شۇكىر» دەدىك. ودان كەيىن ۋەفا-نىڭ قاناتىنىڭ استىنا وتتىك. سودان قازاقستان فۋتزالى ءوسىپ-وركەندەپ, جاڭا دەڭگەيگە كوتەرىلدى. 2016 جىلى سەربيادا وتكەن ەۋروپا بىرىنشىلىگىندە قولا مەدالدى يەلەنسەك, كولۋمبياداعى الەم چەمپيوناتىنىڭ پلەي-وفف باسەكەلەرىندە ونەر كورسەتۋىمىز جوعارىدا ايتىلعان ءسوزىمىزدىڭ ايقىن دەلەلى. ال 2018 جىلى سلوۆەنياداعى قارت قۇرلىقتىڭ باستى دوداسىندا ءتورتىنشى ورىنعا تابان تىرەدىك. مىنە, وسى دەرەكتەر-اق فۋتزالدى سەرىك ەتكەن سايىپقىراندارىمىزدىڭ وسال ەمەستىگىن اڭعارتسا كەرەك.
دەرەك
- الەم چەمپيوناتى وسىعان دەيىن سەگىز مارتە ۇيىمداستىرىلدى. بۇل باسەكەلەر 1989 جىلى نيدەرلاندتا, 1992 جىلى گونكونگتا, 1996 جىلى يسپنايادا, 2000 جىلى گۆاتەمالادا, 2004 جىلى قىتايدا, 2008 جىلى برازيليادا, 2012 جىلى تايلاند جانە 2016 جىلى كولۋمبيادا ءوتتى.
- ايتۋلى دوپ دوداسىندا ەڭ كوپ جۇلدە العان كوماندا – برازيليا. ولار بەس مارتە چەمپيوندىق تۇعىرعا كوتەرىلسە (1989, 1992, 1996, 2008, 2012), تاعى ءبىر كۇمىس (2000) پەن ءبىر قولا (2004) مەدالعا يەلىك ەتتى. ەكى رەت (2000, 2004) يسپانيانىڭ باق جۇلدىزى جاندى. پيرەنەي تۇبەگى تۇلەكتەرىنىڭ قورجىنىندا تاعى ءۇش كۇمىس (1996, 2008, 2012) پەن ءبىر قولا (1992) بار. ارگەنتينانىڭ ءبىر مارتە (2016) اسىعى الشىسىنان ءتۇسىپ, باس جۇلدەنى ولجالادى.
- الەم چەمپيوناتتارىندا يتاليا (2004), رەسەي (2016), اقش (1992), نيدەرلاند (1989) قۇرامالارى فينالدا ونەر كورسەتسە, يتاليا ەكى رەت (2008, 2012) جانە رەسەي (1996), اقش (1989), پورتۋگاليا (2000), يران (2016) فۋتزالشىلارى قولا مەدالعا قول جەتكىزدى.
- ءار كەزدەرى الەمدىك دوپ دوداسىنىڭ ەڭ ۇزدىك ويىنشىسى اتاعى مىنا جىگىتتەرگە بۇيىردى: 1989 جىل – ۆيك حەرمانس (نيدەرلاند), 1992 جىل – جورجينو (برازيليا), 1996 جىل – مانۋەل توبياس (برازيليا), 2000 جىل – مانۋەل توبياس (برازيليا), 2004 جىل – فالكاو (برازيليا), 2008 جىل – فالكاو (برازيليا), 2012 جىل – نەتو (برازيليا) جانە 2016 جىل – فەرناندو ۆيلگەلم (ارگەنتينا).
- ءار كەزدەرى الەمدىك دوپ دوداسىنىڭ سۇرمەرگەن شابۋىلشىسى اتاعىن جەڭىپ العان ويىنشىلار مىنالار: 1989 جىل – لاسلو جاداني (ماجارستان) – 7 گول, 1992 جىل – سايد رادجابي شيرازي (يران) – 16 گول, 1996 جىل – مانۋەل توبياس (برازيليا) – 14 گول, 2000 جىل – مانۋەل توبياس (برازيليا) – 19 گول, 2004 جىل – فالكاو (برازيليا) – 13 گول, 2008 جىل – پۋلا (رەسەي) – 16 گول, 2012 جىل – ەدەر ليما (رەسەي) – 9 گول جانە 2016 جىل – ريكاردينو (پورۋگاليا) – 12 گول.
