كورمەگە 1997-2020 جىلدار ارالىعىندا تۋعان سۋرەتشىنىڭ وتىزعا جۋىق جۇمىسى قويىلدى. شىعارماشىلىعىنىڭ العاشقى كەزەڭىن حح عاسىردىڭ 90-جىلدارى سوڭىنداعى تۋىندىلارى بەينەلەيدى. سوڭعى ونجىلدىقتاعى جۇمىستار اۆتوردىڭ شىعارماشىلىق دامۋىن, ورلەۋىن ايگىلەيدى.
قازاقباي اجىبەك ۇلى قىلقالام شەبەرلەرىنىڭ شىعارماشىلىق ىزدەنىستەرىنىڭ باستى جەلىسىن – قازاق حالقىنىڭ ءداستۇرلى باستاۋلارى مەن رۋحاني مۇراسىنىڭ جاندانۋىن بەينەلەيدى. تاۋەلسىزدىك ءداۋىرى بوياۋى قازاقباي قىلقالامىنىڭ ۇشقىرلىعىندا ايقىن سەزىلەدى, ەرتە كەزەڭدەگى جۇمىس تاسىلىنەن ايتارلىقتاي ەرەكشەلەنەدى. سالتاناتتى جيىندى اشقان ەلباسى كىتاپحاناسىنىڭ ديرەكتورى ءامىرحان راحىمجانوۆ سۋرەتشىنى قازىرگى قازاقستاننىڭ بەينەلەۋ ونەرىنىڭ كوش باسىندا كەلە جاتقان سۋرەتشىلەردىڭ بىرەگەيى دەپ اتاپ ءوتتى.
«سارىارقانىڭ توسىنەن ورىن تەپكەن ەلوردامىزدىڭ العاشقى بەينەسىن ەلباسىمەن بايلانىستىرا بىلگەن قازاقبايدىڭ شىعارماشىلىعى قاشاندا الىستان ەرەكشە سويلەپ تۇرادى. اۆتور وزىندىك قولتاڭباسى بار ونەرلى جان, ول ءوز جۇمىستارىندا حالىقتىڭ مادەنيەتىن, ەلىمىزدىڭ مادەني قۇندىلىقتارىن ونىڭ ۇلتتىق يدەياسىن ۋاقىت پەن قازىرگى ءومىردىڭ ءوزارا استاسىپ جاتقانىن شىنايى سۋرەتتەيدى. كورمەگە قىلقالام شەبەرىنىڭ تۇڭعىش پرەزيدەنت – ەلباسى كىتاپحاناسىنىڭ قورىندا ساقتالعان بۇرىنعى جۇمىستارى مەن الەمدىك قاۋىمداستىقتى تولعاندىرعان كوزقاراستار تۇرعىسىنان العاندا ادامزاتتى ويلاندىراتىن جاڭا دۇنيەلەرى, تۋعان حالقىنىڭ ۇلتتىق بەينەسىن سومداعان تىڭ تۋىندىلارى دا قويىلدى», دەدى ءامىرحان راحىمجانوۆ.
ال بەلگىلى سۋرەتشى كاميل مۋللاشەۆ اۆتوردىڭ استانانىڭ العاشقى قالىپتاسۋ جىلدارىنداعى ەڭبەگىنە ايرىقشا توقتالىپ, ەشكىمگە ۇقسامايتىن دارالىعىن سۋرەتشىنىڭ ىشكى باي دۇنيەسىمەن بايلانىستىردى.
«قىلقالام شەبەرى رەتىندە ول قازاقستاننان تىس جەرلەردە بۇرىننان تانىمال. باسقا ەلدەردەگى كەسكىندەمەنىڭ جانكۇيەرلەرى قازاق حالقىنىڭ مادەنيەتى مەن تاريحىن قازاقباي اجىبەك ۇلىنىڭ سۋرەتتەرىنەن بىلەتىنى وتە ماڭىزدى. اۆتور جۇمىستارىنىڭ ءبىر ەرەكشەلىگى – حالىققا جاقىن, ونىڭ تۋىندىلارىندا ءبىر جىلىلىق بار, بوياۋلارى قانىق. ونىڭ شىعارمالارى سۇلۋلىققا قۇشتار ءار ادامنىڭ جۇرەگىنەن ورىن الادى», دەپ اتاپ ءوتتى ول.
بۇگىنگى تاڭدا قازاقباي اجىبەك ۇلى – قالىپتاسقان اۆتور, قازاقستان سۋرەتشىلەر وداعىنىڭ مۇشەسى, كوپتەگەن سىيلىقتىڭ, سونىڭ ىشىندە ارنايى سىيلىقتىڭ لاۋرەاتى. ءا.قاستەەۆتىڭ (1999 ج.), «دارىن» مەملەكەتتىك جاستار سىيلىعىنىڭ (2001 ج.) يەگەرى. سۋرەتشىنىڭ وزىندىك ءستيلىن قالىپتاستىرۋدا س.مامبەەۆ, ق.تەلجانوۆ, ش.ساريەۆ, س.ايتباەۆ, ت.توعىزباەۆ جانە باسقا دا كورنەكتى قازاقستاندىق شەبەرلەردىڭ شىعارماشىلىعىمەن تانىسۋ ۇلكەن ءرول اتقاردى.
سۋرەتشىنىڭ جۇمىستارى «اقوردا» رەزيدەنتسياسىندا, ەلباسى كىتاپحاناسىنىڭ مۋزەيىندە, ءا.قاستەەۆ اتىنداعى مەملەكەتتىك بەينەلەۋ ونەرى مۋزەيىنىڭ كوللەكتسيالارىندا, گ.ايتيەۆ اتىنداعى قىرعىز ۇلتتىق بەينەلەۋ ونەرى مۋزەيىندە جانە الەم ەلدەرىنىڭ جەكە كوللەكتسيالارىندا ساقتاۋلى. قازاقباي اجىبەك ۇلىنىڭ شىعارماشىلىعى تۋرالى «دالا ءپاستورالى», «كەسكىندەمەشى» اتتى تەلەۆيزيالىق فيلمدەر ءتۇسىرىلدى. قازىرگى ۋاقىتتا سۋرەتشى پروفەسسور, استانا حالىقارالىق ۋنيۆەرسيتەتىنىڭ جوعارى ونەر مەكتەبىنىڭ وقىتۋشىسى, سونىمەن قاتار «استانا وپەرا» كەاق ديرەكتورلار كەڭەسىنىڭ تاۋەلسىز ديرەكتورى بولىپ قىزمەت اتقارادى.
