دەمالىس كۇنى قالامىن كۇرەككە ايىرباستاعان ءتورتىنشى بيلىك وكىلدەرى اباي داڭعىلىنىڭ بويىنا 200 ۇيەڭكى اعاشىنىڭ كوشەتىن وتىرعىزدى. يگىلىكتى باستاماعا ءۇن قوسقان جۋرناليستەر قاۋىمى بۇگىن ەككەن تالشىبىعىمىز سايالى بايتەرەككە اينالسا دەگەن تىلەكتە. «الماتىباسجوسپار» مەكەمەسى عيماراتىنىڭ الدىنداعى بۇل ورىن بۇدان بىلاي جۋرناليستەر الاڭقايى دەپ اتالماق. اللەيا اباي داڭعىلىنىڭ بويىمەن, گاگارين داڭعىلىنان جاروكوۆ كوشەسىنە دەيىن سوزىلىپ جاتىر. بۇقارالىق اقپارات قۇرالدارىنىڭ رەداكتسيالارى وزدەرىنىڭ كوشەتتەرىنە ماڭدايشالار ورناتىپ, ەسىمدەرىن جازىپ قالدىرۋدى دا ۇمىتپادى.
– قالامىزدا اعاش ەگۋ ماۋسىمى قىزۋ ءجۇرىپ جاتىر. باق وكىلدەرى دە بۇل ىسكە ءوز ۇلەستەرىن قوستى. بيىل ءبىر ماۋسىمدا 250 مىڭ اعاش ەگەمىز. بۇل – سوڭعى 20 جىلداعى رەكوردتىق كورسەتكىش. بىلتىر جانە الدىڭعى جىلدارى ءبىر ماۋسىمدا ەڭ كوپ دەگەندە 40 مىڭ كوشەت وتىرعىزعان ەدىك. ءبىز باسا نازارعا الىپ وتىرعان ءبىر نارسە – اعاشتى ەگىپ قانا قويماي, ونى كۇتىپ باپتاۋ. بۇرىن اعاش ەگىلسە, ول تۋرالى ۇمىتىلىپ كەتەتىن. ەڭ ءبىرىنشى جىل – جاۋاپتى كەزەڭ. سەبەبى, ءدال سول كەزدە وسىمدىك جاقسى كۇتىمدى تالاپ ەتەدى. اعاش تا ادام بالاسى سياقتى, ونى ۇنەمى باپتاپ وتىرۋ كەرەك. بۇگىن ۇيەڭكى كوشەتتەرىن وتىرعىزدىق. بۇل اعاش باياۋ وسەدى. تامىرى تەرەڭ بويلامايدى. اعاش ەگىلەتىن كەزدە بىرنەشە فاكتور ەسكەرىلەدى. ماسەلەن, ينجەنەرلىك جەلىلەر, سۋ, ەلەكتر, تەلەفون جەلىلەرى. ءبىز قالانى وسىعان بايلانىستى بىرنەشە ايماققا بولدىك. ءار ايماققا ءتان اعاشتار بار. بۇگىنگى اللەياعا دەندرولوگتاردىڭ پىكىرىن ەسكەرە وتىرىپ ۇيەڭكى تاڭدالدى, – دەيدى الماتى قالالىق جاسىل ەكونوميكا باسقارماسىنىڭ باسشىسى ناتاليا ليۆينسكايا.
باسقارمانىڭ ماماندارى باق قىزمەتكەرلەرىنە اعاشتاردى كۇتۋ مەن باپتاۋ ەرەجەلەرىن سيپاتتايتىن پاراقشالار تاراتتى. تالاپ بويىنشا, ءار اعاش جىلىنا 72 رەت سۋعارىلۋى كەرەك.
الماتى
