سۋرەتتى تۇسىرگەن اۆتور
«قازگيدرومەت» رمك وكىلدەرىنىڭ ۇزاقمەرزىمدى بولجامىنا سايكەس, بيىلعى قاراشادا اۋانىڭ ورتاشا تەمپەراتۋراسى ادەتتەگىدەي, ال جەلتوقساننان كەلەر جىلدىڭ قاڭتارىنا دەيىن اۋا تەمپەراتۋراسى نورمادان 1°س جوعارى بولادى دەپ كۇتىلۋدە. وسى كەزەڭدە وبلىستىڭ سولتۇستىگىندە, سولتۇستىك-باتىسىندا جاۋىن-شاشىن مولشەرى ادەتتەگى نورمادان جوعارى بولۋى ىقتيمال.
سينوپتيكتەردىڭ بولجامىنا سايكەس, قار باسىپ قالاتىن 314 ۋچاسكە بەلگىلەنگەن. ونىڭ 69-ى ۇزاقتىعى 192,6 شاقىرىم بولاتىن رەسپۋبليكالىق جانە 245-ءى جالپى ۇزىندىعى 302,314 شاقىرىمدى قۇرايتىن وبلىستىق ماڭىزداعى اۆتوجولدار. بۇل جولداردىڭ بويىنا 19 جىلىتۋ بەكەتتەرى ۇيىمداستىرىلعان.
– بارلىق قار قۇرساۋىندا قالاتىن جول ۋچاسكەلەرىندە ۇزىندىعى 17 مىڭ مەتردەن اساتىن قار توقتاتاتىن قالقاندار ورناتىلدى. رەسپۋبليكالىق كۇرە جولدا 4 مەديتسينالىق-قۇتقارۋ بەكەتى جۇمىس ىستەيتىن بولادى. سونىمەن قاتار ولار جىلىتۋ پۋنكتتەرى قىزمەتىن دە اتقارادى. ال جولداردىڭ جاعدايىنا كەلەر بولساق, رەسپۋبليكالىق ماڭىزى بار تراسسالاردىڭ قار تازالاۋ تەحنيكاسى 90%-عا دايىن, – دەدى «قازاقاۆتوجول» جشس وبلىستىق فيليالىنىڭ باس ينجەنەرى بولات جۇرتپاەۆ.
قار تازالايتىن تەحنيكالار قاتارىندا اۆتوگرەيدەرلەر, شنەكوروتورلار, شىنجىر تاباندى جانە دوڭگەلەكتى تراكتورلار, تيەگىشتەر, اۆتوتۇسىرگىشتەر بار. بۇلاردىڭ جالپى سانى 500 بىرلىكتەن اسادى. سونداي-اق 19 مىڭ توننادان استام كوكتايعاققا قارسى ماتەريالدار قورى جانە 844 ۋاقىتشا جول بەلگىسى دايىندالعان. قولايسىز اۋا رايى جاعدايى كەزىندە جەدەل ءوزارا ارەكەتتەسۋ ءۇشىن قىزمەتتەر اراسىندا جوسپارلار ازىرلەنگەن.
بريفينگ بارىسىندا وڭىردە 100 شاقىرىمنان استام جول قار كوشكىنىنە ۇشىراۋى مۇمكىن ەكەندىگى دە ايتىلدى. ويتكەنى شىعىس ءوڭىرى – قار كوشكىنى ءجيى جۇرەتىن قاۋىپتى اۋماقتاردىڭ ءبىرى. كوشكىن قاۋپى بار ۋچاسكەلەردە كوشكىن ءتۇسۋ قاۋپىن ازايتۋدا اتقارىلعان جۇمىستار جانە قىسقى كەزەڭگە دايىندىق تۋرالى وبلىستىق تجد ازاماتتىق قورعانىس باسقارماسىنىڭ باستىعى تيمۋر ديداحمەتوۆ مالىمدەدى. ونىڭ ايتۋىنشا, قازىرگى كەزدە وبلىس اۋماعىندا قار كوشكىنى قاۋپى بار 497 ۋچاسكە انىقتالىپ وتىر. سونىڭ ىشىندە 336 ۋچاسكە جول نىساندارى ادامداردىڭ ومىرىنە اسا قاۋىپتى دەپ سانالادى. تجد بولجاۋىنشا, 105 شاقىرىم اۆتوكولىك جولى قار كوشكىنى قۇرساۋىندا قالۋى مۇمكىن اۋماق.
– قاراشادان باستاپ كۇن سايىن كوشكىن قاۋپى بار ۋچاسكەلەرگە تەكسەرۋ جۇرگىزەمىز. بارلىق اقپاراتتاردى جيناپ, تالداۋدى جانە قاۋىپتى تابيعي اپاتتار مەن توتەنشە جاعدايدى باقىلاپ, ءتيىستى شەشىم قابىلداۋدى تاۋلىك بويى 6 ديسپەتچەرلىك بەكەت جۇزەگە اسىرادى. وبلىس تۇرعىندارىن ەسكەرتۋ ماقساتىنداعى قالقاندار مەن «ساق بولىڭىزدار, قار كوشكىنى قاۋپى بار ايماق» دەگەن جازۋى بار پلاكاتتار ورناتىلدى. بيىل «زۋبوۆكا» تاۋىندا قار توقتاتاتىن قالقاندارعا جوندەۋ جانە اباتتاندىرۋ جۇمىستارى جۇرگىزىلدى. 10 نۇكتەدە قار ۇستايتىن 66 قالقان تۇرعىزىلدى, – دەدى تيمۋر ديداحمەتوۆ.
وبلىستىق تج دەپارتامەنتى «قازگيدرومەتتىڭ» ايماقتىق فيليالىمەن بىرلەسىپ, ۇيالى بايلانىس وپەراتورلارى كومەگىمەن SMS حابارلامالار جىبەرۋ جانە كەز كەلگەن ازامات پايدالانا الاتىن DARMEN ءموبيلدى قوسىمشاسى ارقىلى داۋىلدى, قولايسىز اۋا رايى جاعدايىن ەسكەرتۋ بويىنشا اقپاراتتار تاراتاتىن بولادى.
قىستا اپاتتىق-قۇتقارۋ ءىس-قيمىلدارىن جۇرگىزۋ ءۇشىن تجد رەزەرۆىندە 150-دەن استام تەحنيكا بار. ونىڭ ىشىندە قار قۇرساۋىندا ءجيى قالاتىن اۋداندارعا جۇمىلدىرۋعا ارنالعان ءورت ءسوندىرۋ اۆتوتسيستەرنالارىنان, جول تالعامايتىن, ۆاحتالىق كولىكتەردەن باسقا, بايلانىس جانە جارىق بەرۋ كولىكتەرى, سونداي-اق «نيۆا-مارش», «ترەكول», «شەرپ» سىندى تەحنيكالار قىس ماۋسىمىنا ساقاداي ساي.
بۇدان باسقا شۇعىل كومەك كورسەتۋ ءۇشىن وسكەمەن اۋەجايىندا «قازاۆياقۇتقارۋ» بولىمشەسىنىڭ ءبىر «ەۆروكوپتەر-145» تىكۇشاعى دايىن تۇر. وبلىستىق تج قىزمەتى جەكە قۇرامىنىڭ سانى ەكى مىڭنان اسادى.
قىستىڭ كۇنى جولعا شىقپاس بۇرىن بارلىعىن مۇقيات جوسپارلاپ, كەز كەلگەن جاعدايعا دايىن بولعان ءجون. ءار اۆتوكولىكتە شۇعىل جاعدايدا ادام ءومىرىن قۇتقاراتىن زاتتار بولۋى ءتيىس. مىسالى, شامدار, ارقان, دوڭگەلەكتەرگە ارنالعان شىنجىرلار, كۇرەك سىندى قاجەتتى زاتتار.
شىعىس قازاقستان وبلىسى
