وقيعا • 26 قازان، 2020

تەرەكتىدە 11 مىڭ گەكتار جەر قايتارىلدى

23 رەت كورسەتىلدى

باتىس قازاقستان وبلىسىندا اۋىلشارۋاشىلىق جەرلەردى سول جەردە ناقتى شارۋامەن اينالىساتىن كاسىپورىندارعا، شارۋا قوجالىقتارىنا بەرۋ، جەردى دۇرىس پايدالانبايتىن يەلەرىنەن قايتارۋ ءۇردىسى جولعا قويىلعان.

– ءبىزدىڭ تەرەكتى اۋدانى اۋىل شارۋاشىلىعىن دامىتۋعا وتە قولايلى ءوڭىر. اۋداننىڭ بارلىق جەر كولەمىنىڭ 63 پايىزى، ياعني 501 992 گەكتارى اۋىل شارۋاشىلىعى ماق­ساتىنداعى جەرلەر ساناتىنا جاتادى. ءبىز وسى القاپ­تاردى بارىنشا ءتيىمدى پايدالانۋ ماسەلەسىنە كوڭىل ءبولىپ وتىرمىز، – دەيدى تەرەكتى اۋدانىنىڭ اكىمى ارمان وتەعۇلوۆ.

ءيا، اۋداندا 238 948 گا القاپ ەگىستىككە قولايلى ساناتقا جاتادى. 2020 جىلى وڭدەلگەن ەگىستىك القابىنىڭ كولەمى 146 مىڭ گەكتارعا جۋىق. ءسۇر جەر 18،4 مىڭ گا دەگەندە، اۋدان ديقاندارى ءۇشىن ءالى پايدالانىلماعان مۇمكىندىك بار ەكەندىگى كورىنىپ تۇر. جالپى بوسالقى جەر قورى – 137 788 گەكتار. سونىڭ ىشىندە جايىلىم – 105 568 گا، وڭدەلمەگەن ەگىستىك جەرلەر – 5 451 گا، شابىندىق – 16 422 گا، كوپجىلدىق ەكپە اعاشتار – 116 گا، باقشا – 32 گا جانە باسقا جەرلەر – 10 199 گەكتاردى قۇرايدى ەكەن.

مەملەكەت باسشىسى قاسىم-جومارت توقاەۆ «كىم جۇمىس ىستەسە، جەر سونىڭ يەلىگىندە بولۋى كەرەك» دەگەن بولاتىن. يگەرىلمەي جاتقان جانە يگەرىلۋى ماقساتقا ساي ەمەس جەرلەردى كەرى قايتارۋ ماسەلەسى تەرەكتى اۋدانىندا قاتاڭ باقىلاۋعا الىندى. جەردى يگەرە الماعان جانە جالداۋ مەرزىمى اياقتالعان كاسىپكەرلەردەن جالپى كولەمى 11 مىڭ گا بولاتىن 16 جەر ۋچاسكەسى مەملەكەتتىك قورعا قايتارىلدى.

قايتارىلعان القاپتار ەڭبەك ەتۋشى شارۋالارعا ءادىل، اشىق كونكۋرس نەگىزىندە بەرىلۋدە. جىل باسىنان بەرى وسىنداي 4 كونكۋرس ءوتىپ، جالپى كولەمى 23 357 گا جەر تەلىمى ۇسىنىلدى.

بيزنەستى دامىتۋ ماقساتىندا بىلتىر وتكەن 5 اۋك­تسيون­دا بيۋدجەتكە 2 ملن تەڭگە تۇسسە، بيىل وتكىزىلگەن 5 اۋكتسيون ناتيجەسىندە بيۋدجەتكە 15 ملن تەڭگەگە جۋىق قارجى تۇسكەن ەكەن.

 

سوڭعى جاڭالىقتار

9 سۋ قويماسى سالىنادى

ەكولوگيا • كەشە

ۇقساس جاڭالىقتار