ايماقتار • 23 قازان، 2020

قىزىلوردا وبلىسىنىڭ اكىمى "ەكسكليۋزيۆ" باعدارلاماسىنا سۇحبات بەردى

78 رەت كورسەتىلدى

قىزىلوردا وبلىسىنىڭ اكىمى گۇلشارا ابدىقالىقوۆا Atameken Business تەلەارناسىنداعى "ەكسكليۋزيۆ" باعدارلاماسىنا سۇحبات بەردى. ايماق باسشىسى مەن ارنا ءتىلشىسى رۋسلان ءيدريسوۆتىڭ اراسىنداعى اڭگىمەدە وبلىستا اتقارىلىپ جاتقان جۇمىستار مەن الدا شەشىمىن كۇتكەن ماسەلەلەر جايلى ايتىلدى، دەپ حابارلايدى Egemen.kz

گۇلشارا ناۋشاقىزى ارنا كورەرمەندەرىنە وڭىردەگى شاعىن جانە ورتا بيزنەستىڭ دامۋى، وسىعان دەيىن نەگىزگى سالا سانالىپ كەلگەن مۇناي ءوندىرىسىنىڭ توقىراۋىنا بايلانىستى جەتەكشى سالانى قالىپتاستىرۋ باعىتىنداعى جوبا-جوسپارلار، قاراپايىم زاتتار ەكونوميكاسى باعىتىنداعى باستامالار جايلى ايتىپ بەردى.  

بيىلعى پاندەميا وڭىرلەر ەكونوميكاسىن تەجەپ قانا قويماي، جاڭا مۇمكىندىكتەردىڭ دە كوزىن اشتى. الىس-بەرىس، بارىس-كەلىس ازايعان كارانتيندىك شەكتەۋلەر كەزىندە وڭىرگە  سىرتتان كەلەتىن ونىمدەرگە تالداۋ جاسالدى. سونىمەن قاتار، وبلىستىڭ وزگە ايماقتارعا وتكىزە الاتىن تاۋارلارى سارالاندى. بۇل جۇمىسقا جەرگىلىكتى ۋنيۆەرسيتەت عالىمدارى، ەكونوميستەر جۇمىلدىرىلدى. وسىدان كەيىن سىرتتان كەلەتىن ونىمدەردى وزىمىزدە ءوندىرۋدىڭ جوباسى جاسالدى. بۇل ءۇشىن ارنايى جول كارتاسى ازىرلەنىپ، ءتۇرلى باعدارلامالار ارقىلى جەرگىلىكتى ءوندىرىستى ارتتىرۋ قولعا الىندى. بيزنەستىڭ جول كارتاسى، قاراپايىم زاتتار ەكونوميكاسى ارقىلى بيزنەسكە قايتارىمدى نەگىزدە قولداۋ كورسەتە الاتىن ايماقتىق ينۆەستيتسيالىق قوردىڭ جۇمىسى كەڭەيدى. تاعى ءبىر باعىت – ينۆەستيتسيا تارتۋ ارقىلى شاعىن شەبەرحانالار، فابريكالار، ءتۇرلى جوبالار قۇرۋ قاجەت. وسى ماقساتتا ءىرى كاسىپكەرلەردى تارتا وتىرىپ،  265 جوبا جاسالدى.

وبلىس اكىمى وسىنىڭ بارلىعىنا 271 ملرد تەڭگە ينۆەستيتسيا تارتۋ قاجەتتىگىن اتاپ ءوتتى.  

ارناعا بەرگەن سۇحباتىندا ءوڭىر باسشىسى پاندەميا كەزىندە وبلىستا وندىرىستىك قۇرىلىمدار توقتاماعاندىعىن جەتكىزدى. مۇناي سالاسىندا قيىن كەزەڭگە قاراماستان جۇمىسشىلار جۇمىستان بوساتىلمادى، جالاقىلارى ساقتالدى. مۇناي سەكتورىندا 5 مىڭنان استام ادام جۇمىس ىستەيدى. شاعىن جانە ورتا بيزنەستە، باسقا جەردەگىدەي بەلگىلى ءبىر قيىندىقتار بار. مىسالى، وبلىستا 128 مەيرامحانا، كافە، پاندەمياعا دەيىن جاقسى تابىس تاۋىپ كەلسە، قازىر قيىندىقتا تۇر.  سوندىقتان، قازىر ولارمەن جۇمىس ىستەپ، بيزنەس باعىتتارىن وزگەرتۋگە كۇش سالىنىپ جاتىر. قازىردىڭ وزىندە 10 مەيرامحانا ءوز باعىتتارىن وزگەرتتى. ولاردىڭ بارلىعى جەكە مەديتسينالىق ورتالىقتارعا اينالدى. وسىنىڭ ارقاسىندا جازدا ەمدەۋ مەكەمەلەرىندە توسەك ورىندار جەتكىلىكتى دەڭگەيدە بولدى.  

 سۇحباتتا ايماقتا سالىنىپ جاتقان جاڭا مودۋلدىك اۋرۋحانا جايلى دا ايتىلدى. وزىق تەحنولوگيامەن، قاجەتتى زاماناۋي جابدىقتارمەن قامتاماسىز ەتىلگەن اۋرۋحانا قۇرىلىسى قاراشا ايىندا اياقتالادى. وڭىردە اۋرۋحانالاردى مەديتسينالىق قوندىرعىلارمەن قامتاماسىز ەتۋ ۇدايى نازاردا تۇر. مىسالى، ناۋرىز ايىندا وكپەگە وتتەگى بەرەتىن  نەبارى 64 اپپارات بولدى. قازىرگى سانى - 244. سونىمەن قاتار، ول ىندەت بىلىنگەن تۇستا وڭىردە وتتەگى كونتسەنتراتورلارى بولعان جوق. قازىر رەزەرۆتە 655 كونتسەنتراتور بار.  

ايماق باسشىسىنىڭ ارنا تىلشىسىنە بەرگەن سۇحباتىندا اۋىلشارۋاشىلىعى، ەگىستى ءارتاراپتاندىرۋ، سىرداريا وزەنى ارناسىنىڭ تارتىلۋى، ءبىلىم، قاشىقتان وقۋ، ۆيرۋستىڭ ەكىنشى تولقىنىنا دايىندىق، قالا قۇرىلىسى، تۋريزم جايلى كەڭىنەن ايتىلدى. 

 

       

       

       

       

 

 

       

 

     

     

     

سوڭعى جاڭالىقتار

«شىڭىراۋ» شىڭعا شىقسىن

ونەر • بۇگىن، 00:18

تىڭ تاسىلدەردىڭ ءتيىمدى تۇسى كوپ

مەديتسينا • بۇگىن، 00:14

پاسپورت

رۋحانيات • كەشە

جەكە پەسا جازۋعا لايىق

رۋحانيات • كەشە

انا مەيىرىمى

قوعام • كەشە

دوللار ارزاندادى

قارجى • كەشە

ۇقساس جاڭالىقتار