فۋنكتسيونالدىق ۋلترادىبىستىق جانە ساۋلەلىك دياگنوستيكا جاساۋ بولىمشەسىنىڭ مەڭگەرۋشىسى قايرات ءمۋرزاليننىڭ ايتۋىنشا, بولىمشە زاماناۋي جابدىقتارمەن جانە بىلىكتى ماماندارمەن جاساقتالعان.
قايرات ەربولات ۇلى: "بىزدە ۋلترادىبىستىق زەرتتەۋلەر مەن كومپيۋتەرلىك توموگرافيانىڭ بارلىق تۇرلەرى جاسالادى, ەندى گامما-كامەرانى ىسكە قوستىق. جۇرەكتىڭ دياگنوستيكالىق زەرتتەلۋىنىڭ ماڭىزدىلىعىن تۇسىنە وتىرىپ, ءبىز ميوكاردتىڭ پەرفۋزيالىق ستسينتيگرافياسى سەكىلدى زەرتتەۋگە ەرەكشە كوڭىل بولەتىن بولامىز", دەدى.
وسى اپتادا ءبىز ميوكاردتىڭ ستسينتيگرافياسىن جاسادىق. ميوكارد – بۇل جۇرەكتىڭ بۇلشىقەتى. جۇرەك – ادام اعزاسىنداعى ماڭىزدى مۇشە. ونىڭ فۋنكتسيونالدىق قىزمەتى بۇزىلعان جاعدايدا ادامنىڭ ادەتتەگى ءومىر ءسۇرۋ ساپاسى تومەندەيدى.
جۇرەك بۇلشىقەتىنىڭ پاتولوگياسى بار ادام ادەتتەگى بەلسەندىلىگىن ساقتاپ, اۋىرعانعا دەيىنگى ءومىر ءسۇرۋ سالتىن ساقتاي المايدى. ميوكاردتىڭ ستسينتيگرافياسىن جاساۋ ءۇشىن ميوكاردتىڭ تىندەرىندە جينالۋعا قابىلەتتى يزوتوپتار پايدالانىلادى. ولار زەرتتەلەتىن ايماققا جۇرەك بۇلشىقەتىنىڭ قان اعىمى ارقىلى تۇسەدى دە, قانمەن قامتاماسىز ەتىلۋى تولىعىراق بولاتىن جەردە تۇنىپ قالادى. پروتسەسس ءتۇرلى-ءتۇستى سۋرەتتەردە جاقسى كورىنەدى. گامما-كامەرا ساۋلەنى انىقتايدى.
زەرتتەۋ جاساپ وتىرعان دارىگەر ونى كومپيۋتەرگە جىبەرگەننەن كەيىن جۇرەكتىڭ قاي اۋماعى جاقسى, قايسىسى ناشار قانمەن قامتاماسىز ەتىلەتىندىگىن كورىپ وتىرادى. ەگەر ميوكاردتىڭ سۋرەتى ءتۇس ايىرماشىلىعى بولماي, تەگىس جانە ايقىن بولسا, وندا جۇرەك تولىعىمەن ساۋ ەكەنىن كورسەتەدى.
راديويزوتوپتى ءادىس زەرتتەۋگە دايىندالۋ كەزىندە ادەتتەگى ءومىر ءسۇرۋ سالتىن بۇزباي, پرەپاراتتى اعزادان تابيعي تۇردە ەش زيانسىز شىعارۋعا مۇمكىندىك بەرەدى. پروتسەدۋرادان كەيىنگى جارتى تاۋلىك ىشىندە اعزادا راديوفارماتسەۆتيكالىق پرەپارات قالمايدى. قاجەت بولعان جاعدايدا از ۋاقىت وتكەن سوڭ پروتسەدۋرانى قايتالاۋعا بولادى. زەرتتەۋ قاۋىپسىز, ەشقانداي كەرى اسەرلەرى جوق.
"كەلەسى اپتادا ءبىز قالقانشا بەزىنىڭ ستسينتيگرافياسىن جاساۋدى جوسپارلاپ وتىرمىز", دەيدى بولىمشە مەڭگەرۋشىسى.
بۇل اپپارات جۇرەك-قان تامىر جۇيەسى, اسقازان-ىشەك جولدارى, ەندوكريندىك جانە باسقا دا پاتولوگيالارى بار پاتسيەنتتەردى زەرتتەۋدىڭ ساپاسى مەن كولەمىن ارتتىرۋعا مۇمكىندىك بەرەدى.
وسى زەرتتەۋدىڭ (ميوكاردتىڭ پەرفۋزيالىق ستسينتيگرافياسى) كومەگىمەن وپەراتسياعا دەيىن جانە وپەراتسيادان كەيىنگى كەزەڭدەگى جۇرەكتىڭ يشەميالىق اۋرۋى مەن ميوكاردتىڭ جاعدايىن دا دياگنوستيكالاۋ, جۇرەكتى ەمدەۋ مەن وعان جاسالاتىن وپەراتسيالاردىڭ ساپاسىن ارتتىرۋعا مۇمكىندىك بەرەدى.
الماتى
