سونىمەن بىرگە مۇندا تاكسيدى كوشەدەن نەمەسە ارناۋلى تۇراقتان ۇستاۋ دەگەن جوق. تەك ءبىر نومىرلەرگە حابارلاسىپ, ونىڭ جاۋابىن ۇزاق ۋاقىت كۇتۋگە دە تۋرا كەلىپ جاتادى. ويتكەنى, تاپسىرىس قابىلداۋشى ديسپەتچەر ۇزاقسونار, پايداسىز سۇراقتار بەرىپ, اسىعىپ تۇرعان جولاۋشىنىڭ جۇيكەسىن جۇقارتاتىنى دا بار. سونىڭ ىشىندە جولاۋشىدان قاي كوشەنىڭ قاي نومىرىندەگى ءۇيدىڭ قاي كىرەبەرىسىندە تۇرعانىن جانە باراتىن جەرىنىڭ تولىق ادرەسىنە دەيىن تالاپ ەتەدى. ال ولاردى بىلمەگەن ادام بولسا تەلەفوندى تاستاي سالاتىندارى دا بار. بۇل اسىرەسە, سىرتتان كەلگەن جولاۋشىلارعا قيىن. قالانى بىلمەيتىن وندايلار تاكسي قىزمەتىنەن مۇلدە قاعىلىپ جاتادى.
وسىنىڭ ءبارى جۇرگىنشىنىڭ دە تاكسي جۇرگىزۋشىسىنە دەگەن وشپەندىلىگىن وياتىپ جاتادى. سونىڭ سالدارىنان ەكى تاراپتا كيكىلجىڭ تۋادى. سوندىقتان "اقىلدى قالاعا" لايىق ەمەس وسىنداي قىزمەتتەردى جوندەگەن دۇرىس. ايتپەسە, ساپاسىز قىزمەت كورسەتۋلەر ادامداردىڭ جۇيكەسىن جۇقارتا بەرەرى انىق. سونىڭ ءبىرى جۋىردا بولدى.
پوليتسيا باسقارماسىنىڭ ەكىنشى بولىمىنە دەنە جاراقاتىن الدىم دەگەن شاعىممەن 46 جاسار تاسكي جۇرگىزۋشىسى جۇگىنگەن. 19 قازان كۇنى تاڭەرتەڭ جول اقىسىن تولەۋدەن باس تارتقان جولاۋشىمەن ەكەۋىنىڭ اراسىندا جانجال بولىپ, ناتيجەسىندە جولاۋشى تاكسيشىنىڭ بەتىنەن جۇدىرىعىمەن ەكى رەت ۇرىپ جىبەرگەن ەكەن. كوزى كوگەرگەن تاكسيشى ءوزىنىڭ مۇلدە جازىقسىز ەكەنىن ايتادى. بىراق تاڭعى مەزگىلدە ماس بولا قويمايتىن ادام ونى اقشا تولەمەيمىن دەپ جايدان-جاي ۇرماسا كەرەك-ءتى...
كريمينالدىق پوليتسيا ءبولىمىنىڭ قىزمەتكەرلەرى جەدەل قيمىلداپ, 1979 جىلى تۋعان كۇدىكتىنى ۇستاعان. ول پەتروپاۆل قالاسىنىڭ تۇرعىنى بولىپ شىقتى. "ەرۋلىگە قارۋلى" دەپ ول جۇرگىزۋشى ءوزىنىڭ بارسەتكاسىن تارتىپ الماق بولعاندىعىن ايتقان. بۇعان دا سەنۋگە بولمايدى. ويتكەنى, شاقىرۋمەن كەلگەن تاكسيشىنىڭ جولاۋشىعا شابۋىل جاساۋى - بولا قويمايتىن وقيعا. قازىر اتالعان فاكتى بويىنشا قىلمىستىق كودەكستىڭ "دەنساۋلىققا قاساقانا جەڭىل زيان كەلتىرۋ" اتتى 107-بابى بويىنشا سوتقا دەيىنگى تەرگەپ-تەكسەرۋ جۇمىستارى جۇرگىزىلىپ جاتىر. مۇنداي تەرگەۋلەردىڭ ادىلەتتى بولىپ, ەكى جاقتىڭ دا كيكىلجىڭگە قاتىستىلىق دارەجەسىن انىقتاۋىنا سەنگىڭ كەلەدى. بىراق تاجىريبەدە, كوبىنەسە, شاعىنعان جاقتىڭ مۇددەسى قورعالىپ جاتادى. تەك سوت مۇندايعا ادىلدىكپەن قاراپ, جالپى تاكسيلىك قىزمەت كورسەتۋ ساپاسى بويىنشا دا ارنايى قاۋلى شىعارسا عوي دەپ ءۇمىت ەتەسىڭ.
اتالمىش وقيعا بويىنشا پەتروپاۆل قالاسى پب باستىعىنىڭ مىندەتىن اتقارۋشى, پوليتسيا پودپولكوۆنيگى الىبەك عابدۋللين مىناداي كوممەنتاري بەردى: "كەيدە تاكسي جۇرگىزۋشىلەرى مەن جولاۋشىلار اراسىندا داۋلاسۋ بولىپ تۇرادى, وندايلار اسىرەسە, ماس كۇيدە مىنگەن جولاۋشىلارمەن بولادى. كيكىلجىڭ ادەتتە, سوزگە كەلىپ قالۋدان اسپايدى, بىراق كەيدە جاعداي ۋشىعىپ كەتەدى. كەز-كەلگەن داۋلاسۋ زاڭدى تۇردە شەشىلۋى ءتيىس ەكەندىگىن بارلىق ازاماتتاردىڭ ەسىنە سالامىز. ەموتسيانىڭ سالدارى زاڭ الدىندا جاۋاپ بەرۋگە اكەلۋى مۇمكىن"
پەتروپاۆل
