اتالعان ينستيتۋتتاعى ساتىمەن جاسالعان وپەراتسيا يننوۆاتسيالىق تەحنولوگيالاردى پايدالانۋداعى شەبەرلىك دارىسىمەن ۇشتاستىرىلدى.
Zero-Fluro تەحنولوگيالارىن (فليۋروسكوپياسىز) پايدالانا وتىرىپ, جۇرەك ىرعاعىنىڭ كۇردەلى بۇزىلىسى كەزىندە كاتەتەرلىك ابلاتسيا جۇرگىزۋ ءۇشىن MiFi يننوۆاتسيالىق كوپپوليارلى ابلاتسيالىق كاتەتەرى كارديولوگيا جانە ىشكى اۋرۋلار عزي تاجىريبەسىندە تۇڭعىش رەت قولدانىلدى. وپەراتسيالار ءساتتى ءوتتى. وسى كاتەتەردى قولدانۋ ارقىلى تاعى بىرنەشە كۇردەلى وتا جاساۋ جوسپارلانعان.
جاس ماماندار مەن رەزيدەنتتەردىڭ قاتىسۋىمەن وتكەن شەبەرلىك ساعاتىندا كلينيكانىڭ جۇرەك ىرعاعى جانە وتكىزگىشتىگىنىڭ بۇزىلىسى بولىمشەسىنىڭ مەڭگەرۋشىسى, ەلىمىزدىڭ جەتەكشى اريتمولوگتارىنىڭ ءبىرى روين رەكۆاۆا ەكى پاتسيەنتكە وپەراتسيا جاسادى. ناۋقاستاردىڭ ءبىرى 55 جاستاعى ەر ادام 5 جىل بۇرىن ميوكارد ينفاركتىنە شالدىققان, 2 جىل بۇرىن جۇرەگىنە شۋنتتاۋ جاسالعان. پاتسيەنتتى ەنتىگۋ, السىزدىك, باس اينالۋ, جۇرەك سوعۋى مازالاپ, ۇدايى ءدارى قابىلداعانىمەن, كومەگى شامالى بولعان. ەكىنشى وتا 42 جاستاعى ايەل ادامعا جاسالدى.
روين روينوۆيچ اريتموگەندىك وشاقتاردىڭ راديوجيىلىكتى ابلاتسياسى اريتميانى ەمدەۋدىڭ تانىمال ادىستەرىنىڭ قاتارىنا جاتاتىنىن اتاپ ءوتتى. ول جۇرەك ىرعاعىنىڭ بۇزىلىسى جاعدايىنداعى كاتەتەرلىك ابلاتسيا قاۋىپسىزدىگىنىڭ وزەكتى ماسەلەلەرىنىڭ ءبىرى اسقىنۋلاردىڭ كۇشەيۋ قاۋپى بولعاندىقتان, ولاردىڭ دامۋى كورىنىستى قالىپتاستىرۋ تەحنولوگياسى, حيرۋرگتىڭ تاجىريبەسى سەكىلدى بىرنەشە فاكتورلارعا بايلانىستى ەكەنىن ايتتى.
ابلاتسيانى جۇرگىزۋدىڭ ۋاقىتىن ازايتۋ جانە تىنگە اسەر ەتۋدىڭ ناقتىلىعىن قامتاماسىز ەتۋ وسى اسقىنۋلاردىڭ قاۋپىن تومەندەتە الادى. سوندىقتان اريتميالىق وشاقتاردىڭ ناقتى سايكەستەنۋى مەن كورىنۋى ماڭىزدى. وسى وشاقتاردىڭ سايكەستەنۋىنەن كەيىن پاتسيەنتتىڭ اريتميادان ارىلۋى ءۇشىن ناقتى ابلاتسيا ورىندالۋى مۇمكىن.
وسى تەحنولوگيا رەنتگەن ساۋلەلەرىنىڭ پاتسيەنتتىڭ اعزاسىنا اسەر ەتۋىن مەيلىنشە ازايتۋعا, ءتىپتى جويۋىنا مۇمكىندىك بەرەدى.
ناۆيگاتسيالىق جۇيە كوپپوليارلى كاتەتەرلەردىڭ كومەگىمەن ابلاتسيالىق كاتەتەر ورنالاسقان جەردى كورسەتەدى جانە كاتەتەرمەن نىسانالى ۋچاسكەگە قول جەتكىزۋگە مۇمكىندىك بەرەدى. سونىمەن قاتار ابلاتسيا پروتسەدۋراسىنىڭ ءوزىن جەڭىلدەتەدى. ينستيتۋتتى سسىنداي MiFi تەحنولوگياسى بار (IntellaTip MiFi) كاتەتەرمەن Boston Scientific كومپانياسى قامتاماسىز ەتتى. ۇشىنداعى ميكروەلەكترودتارداعى سيگنالى ونىڭ ورنالاسۋىن جانە ارەكەت ەتۋ سالاسىن انىقتاۋعا مۇمكىندىك بەرەدى دە, اسقىنۋ قاۋپىن ازايتادى.
«سونداي-اق ميكروەلەكترودتار اسەر ەتۋدىڭ ناتيجەلىلىگى تۋرالى ناقتى اقپاراتتى الۋعا مۇمكىندىك بەرەدى, وسىلايشا اريتميانى ەمدەۋدىڭ تيىمدىلىگىن ارتتىرادى جانە رەتسيديۆتەردىڭ جيىلىگىن ازايتادى. IntellaTip MiFi پايدالانعان كەزدە ابلاتسيا پروتسەدۋراسىنىڭ 100%-عا دەيىنگى جوعارى تيىمدىلىگى بايقالادى», دەيدى ر.رەكۆاۆا.
ينستيتۋتتا جىلىنا 900-دەن اسا وسىنداي وپەراتسيا جاسالاتىنىن اتاپ وتكەن ءجون. راديوجيىلىكتى ابلياتسيا جاساۋ كەزىندە, ودان كەيىن دە ءولىم-ءجىتىم بولعان جوق. كىاعزي-دا وتا جاسالعان ەڭ ۇلكەن ناۋقاس 94 جاستا بولدى.
الماتى
