الدىمەن ول بۇكىل الەمدە ۆيرۋس جۇقتىرعان ادامداردىڭ سانى كۇن سايىن ءوسىپ بارا جاتقانىن ايتتى. "سونىڭ ىشىندە ءبىزدىڭ وبلىس تا بار. بىزدەگى ناۋقاستار كوبەيگەن 10 ەلدى-مەكەندە شەكتەۋ شارالارى ەنگىزىلدى. مونيتورينگ توپتارىنىڭ جۇمىسى كۇشەيتىلدى. كۇن سۋىپ, ماۋسىمدىق اۋرۋلار باستالسا, ۆيرۋسپەن كۇرەس قيىنداي ءتۇسۋى مۇمكىن", دەدى ول. ودان ءارى اكىم تۇرعىنداردى جەرگىلىكتى بيلىكتىڭ باسشىلىعىمەن دەنساۋلىق ورىندارىنىڭ ەكىنشى تولقىنعا دايىندىعى تۋرالى حاباردار ەتتى. "اۋرۋحانالاردا دارىلەردىڭ 2 ايلىق قورى بار. ءدارىحانالار پرەپاراتتارمەن 1 ايعاقامتاماسىز ەتىلدى. بارلىعى 3400 توسەك ورىن دايىن تۇر, ءوكپەنى جاساندى تىنىستاندىرۋ اپپاراتتارىنىڭ سانى الدىڭعى تولقىنداعىدان 3 ەسە, ياعني 73-تەن 232-گە دەيىن, وتتەگى كونتسەنتراتورى 6 ەسە, ياعني 56-دان 362-دەيىن ۇلعايدى", دەدى ق.اقساقالوۆ.
وسى قازان ايىنىڭ سوڭىندا وبلىستا جاڭا ينفەكتسيالىق اۋرۋحانانىڭ قۇرىلىسى اياقتالادى. وندا پتسر زەرتحاناسى ىسكە قوسىلادى. بۇل وڭىردەگى بەسىنشى زەرتحانا بولماق. وسىنىڭ ارقاسىندا كۇنىنە 3 مىڭ تەستجاساۋعا قول جەتكىزىلەدى. بيۋدجەت ەسەبىنەن 5 وتتەگى ستانتسياسى اشىلادى. جەدەل جاردەم اۆتوپاركى 18 جاڭا رەانيموبيلمەن تولىقتى. "قاراشا ايىندا وسىنداي تاعى 20 كولىك ساتىپ الامىز. جىل سوڭىنا دەيىن 111 وكپەنى جاساندى تىنىستاندىرۋ اپپاراتى, 8 كوشپەلى مەديتسينالىق كەشەن مەن 6 رەنتگەن اپپاراتى كەلەدى", دەدى اكىم.
ءوزىنىڭ ۇندەۋىندە اكىم جەرگىلىكتى دەنساۋلىق ورىندارىنىڭ ەكىنشى تولقىنعا قارسى كۇرەسۋگە دايىن بولعانىمەن ادامداردىڭ وزدەرى دە ساقتىقتى ۇمىتپاۋلارى كەرەكتىگىن ەسكەرتتى. "ءاربىر ناۋقاستىڭ فيزيولوگيالىق دەرەكتەرى ءارتۇرلى, دارىگەرلەر ولاردى حاتتاماعا ساي ەمدەگەنىمەن ءاربىر اعزانىڭ ۆيرۋسپەن كۇرەسۋ مۇمكىنشىلىگى ءارتۇرلى بولادى. بىردە-ءبىر مامان ەمدەۋ شارالارىنىڭ قانشالىقتى ءتيىمدى بولاتىنىن ايتا المايدى. اۋىرعانداردىڭ جارتىسىندا پنەۆمونيا بولادى. كەيبىرەۋلەر ونى جەڭە الماۋى مۇمكىن. سوندىقتان ءاربىر ادام الدىمەن ءوزى جەكە ساقتىق شارالارىن قاتاڭ ساقتاۋلارى كەرەك", دەدى ول.
جامان ىندەتتىڭ زاردابى باستالعاننان بەرى وبلىستا 4326 ادام دەرتكە ۇشىراعان ەكەن. از عانا ۋاقىتتا ءتورت مىڭ تاعدىر اۋرۋمەن الىسقان. سونىمەن قاتار ولاردىڭ بىرنەشە مىڭ جاقىندارى جاقىنىن جوعالتىپ الامىز با دەپ قاسىرەت شەككەن. سونىڭ ءبارى كۇتىنۋ شارالارىن مۇلتىكسىز ساقتاۋ كەرەكتىگىن ەسكەرتەدى.
"ءبىز جاز بويى ىندەتتى جەڭۋمەن اينالىسقان دارىگەرلەرگە العىس ايتۋىمىز كەرەك. ولار وتە كۇردەلى جاعدايدا تالماي جۇمىس ىستەدى. ءتىپتى بەتى ءارى قاراپ قالعان ادامداردى دا اجالدىڭ تىرناعىنان امان الىپ قالدى. ولاردىڭ اراسىندا قوس وكپەسى 90 پايىزعا دەيىن زاقىمدانعان ادامدار دا كەزدەستى. دارىگەرلەر وزدەرىنىڭ كاسىبي شەبەرلىگىن كورسەتىپ, وسىنداي جەرلەستەرىمىزدى دە اجالدان قۇتقاردى", دەدى قۇمار ىرگەباي ۇلى.
وسى ۋاقىتقا دەيىن ەلىمىزدە 12 مىڭ مەديتسينالىق قىزمەتكەرلەر ۆيرۋس جۇقتىردى. سونىڭ ىشىندە 182 دارىگەر كوز جۇمدى. وسى فاكتىلەردى كەلتىرگەن اكىم ولاردىڭ وتە قاتەرلى جاعدايدا بولعانىنا نازار اۋداردى. دارىگەر قاۋىمىنىڭ ءوزى وسىنداي قىساستىققا تاپ بولىپ جاتقاندا قاراپايىم ادامداردىڭ ساقتىعى ءتىپتى ارتا ءتۇسۋى قاجەتتىگىن ول تاعى دا ەسكەرتتى. سونىمەن قاتار ول كەيبىرەۋلەردىڭ ۆيرۋستىڭ قاسىرەتىنە ءالى دە سەنبەيتىنىنە وكىنىش ءبىلدىردى. "بۇكىل الەم پاندەميادان زارداپ شەگىپ جاتقاندا قۇلاق پەن كوزگە سەنبەۋ – ابەستىك. مۇنداي قىلىقپەن ولار تەك وزىنە, وتباسىنا جانە قورشاعان ادامدارعا قاۋىپ توندىرەدى. ال ۆيرۋسپەن اۋىرىپ قالعان كەزدە, باسقاشا سويلەپ, بارلىعىن تۇسىنە باستايدى. وسىعان كوز جەتكىزۋ ءۇشىن مىندەتتى تۇردە ۆيرۋس جۇقتىرۋ كەرەك پە", دەدى ول.
ءارينە, مۇنداي جاعدايعا جەتكىزبەگەن دۇرىس. بار بولعانى, ساقتىق شارالارىن قولدانۋ كەرەك. ونىڭ ەش قيىندىعى جوق. تەك بەتپەردە تاعىپ, قولدى جۋىپ ءجۇرۋ كەرەك. سونىمەن قاتار قاشىقتىقتى ساقتاۋدى ۇمىتپاعان ءجون. كوپ ادام جينالعان جەرگە بارۋدان دا تارتىلعان دۇرىس. "قازىر توي جاساپ, كوپ ادامدى شاقىرۋعا تىيىم سالىنعان. اعايىننىڭ ءومىرى مەن دەنساۋلىعىنا قاۋىپ ءتونۋى مۇمكىن. ۆيرۋس قاريالارعا جانە سوزىلمالى اۋرۋى بار ادامدارعا اسا قاۋىپتى. اتا-اجەلەرىمىزدى, دەنساۋلىعى شالاعاي جاقىندارىڭىزدى قورعاپ جۇرىڭىزدەر", دەلىنگەن اكىمنىڭ ۇندەۋىندە. ءسوزىنىڭ سوڭىندا قۇمار اقساقالوۆ بارلىق سولتۇستىك قازاقستاندىقتارعا:
"سانيتارلىق تالاپتاردى ورىنداۋ مەن ءتارتىپتىڭ ارقاسىندا كوكتەمدە ۆيرۋسپەن كۇرەس ءتيىمدى بولدى. الايدا, جازعى ۋاقىتتا جاعداي قيىنداپ كەتتى. سوندىقتان, ءار ازاماتتىڭ جاۋاپكەرشىلىك تانىتىپ, تارتىپكە باعىنعانى ءجون. بارلىقتارىڭىزدى بۇل ءىسكە تۇسىنىستىكپەن قاراۋعا شاقىرامىن", دەدى.
سولتۇستىك قازاقستان وبلىسى
