وسىنداي كەلەڭسىز جاعداي جالعاسىن تاۋىپ جاتىر. كۇنى بۇگىن پەتروپاۆلدىق يۋۆەنالدىق پوليتسەيلەر سپيرتتىك ىشىمدىككە اۋەس 33 جاستاعى قالا تۇرعىنىن اتا-انا قۇقىعىنان ايىرۋعا ماتەريال جيناۋدا. ايەلدىڭ ەكى ۇلى بار, ءبىرى 13 جاستا, ەكىنشىسى 7 ايلىق ءسابي. ۇقىپسىز اناعا قاتىستى بۇرىن جينالعان بارلىق ماتەريالدار كامەلەتكە تولماعانداردىڭ ىستەرى جانە ولاردىڭ قۇقىعىن قورعاۋ جونىندەگى كوميسسيادا قارالىپ, ونى اتا-انا قۇقىعىنان ايىرۋ ءۇشىن سوتقا ماتەريال جولداۋ تۋرالى شەشىم قابىلداندى. جارتى جىل بۇرىن پوليتسەيلەر وعان جاعدايدى تۇزەتۋگە مۇمكىندىك بەرگەن. ءساۋىر ايىندا تۇرعىلىقتى جەرى بويىنشا كەزەكتى تەكسەرىس بارىسىندا ونىڭ ۇيىندە بولماعانى, جاڭا تۋعان ءسابيدى ۇلكەن اعاسىنىڭ قاراۋىنا قالدىرىپ, ءوزى بۇل ۋاقىتتا ىشىمدىك ءىشىپ جۇرگەنى بەلگىلى بولدى. سونىمەن قاتار, يۋۆەنالدىق پوليتسەيلەر ءۇيدى تازا ۇستاي المايتىندىعىن كوزىمەن كورگەن. "ۇيدە ءيتتىڭ بولۋى, تولىق انتيسانيتاريالىق جاعداي, تاراقان, جۋىلماعان ىدىس-اياقتار... كامەلەتكە تولماعان بالالاردى قالدىرۋ تۋرالى اكتى تولتىرىلىپ, بالالار اۋرۋحاناعا جاتقىزىلدى", دەلىنگەن قاۋلىدا.
ايەلءدىڭ ءوزى اتا-انالىق مىندەتتەرىن ورىنداماعانى جانە وزگە دە قۇقىق بۇزۋشىلىق جاساعانى ءۇشىن بۇدان بۇرىن بىرنەشە رەت اكىمشىلىك جاۋاپقا تارتىلعان.
"پروفيلاكتيكالىق ءىس-شارالارعا قاراماستان, ول ىشىمدىك ءىشۋىن قويماۋدا, ۇسىنىمداردى ورىندامايدى, ءوزىنىڭ اتا-انالىق مىندەتتەرىن ءتيىستى اتقارمايدى. كورشىلەرىنەن اتالعان ازاماتشانىڭ ىشىمدىك ىشەتىنى, ادەپسىز ءومىر سالتىن ۇستاناتىنى جايلى شاعىم كەلىپ تۇسۋدە", دەيدى پەتروپاۆل قالاسى پب يۋۆەنالدىق پوليتسيا توبىنىڭ باستىعى ەلميرا ابۋشەۆا.
قازىر ونىڭ ءىسى دە سوتقا تاپسىرۋعا دايىندالۋدا. ىشىمدىككە اقشا تاپقان ادام بالالارىن قاراۋعا مۇمكىنشىلىك تاپپاعان ەكەن.
پەتروپاۆل
