كسرو حالىق ءارتىسى, قازاق كسر حالىق ءارتىسى, سوتسياليستىك ەڭبەك ەرى, كسرو جانە قازاقستان مەملەكەتتىك سىيلىقتارىنىڭ لاۋرەاتى, قوعام قايراتكەرى, پروفەسسور, پەداگوگ, باريتون داۋىستى اسا كورنەكتى كەڭەس جانە قازاق وپەرا ءانشىسى ەرمەك بەكمۇحامەد ۇلى سەركەباەۆ جاسى 88-گە قاراعان شاعىندا ومىردەن وزدى.
ەرمەك سەركەباەۆ 1926 جىلعى 4 شىلدەدە پەتروپاۆل قالاسىندا تۋعان. ول 1941-1943 جىلدارى الماتى مۋزىكالىق ۋچيلديششەسىندە سكريپكا سىنىبى بويىنشا وقىپ ءبىلىم الدى. 1951 جىلى الماتى كونسەرۆاتورياسىن پروفەسسور ا.م.كۋرگانوۆتىڭ ءان سىنىبى بويىنشا ءبىتىردى. ال 1947 جىلدان باستاپ قازاق وپەرا جانە بالەت تەاترىندا سوليست بولىپ ەڭبەك ەتە باستادى.
ءوزىنىڭ تاڭعاجايىپ تالانتى ارقاسىندا ەرمەك بەكمۇحامەد ۇلى 1953, 1956 جانە 1957 جىلدارى بۇكىلالەمدىك جاستار مەن ستۋدەنتتەر فەستيۆالىنىڭ لاۋرەاتى اتاندى.
ءانشىنىڭ رەپەرتۋارىندا نەگىزىنەن ورىس جانە شەت ەل كلاسسيكالىق تۋىندىلارىنىڭ باستى رولدەرى بولدى. سونىڭ ىشىندە جۇبانوۆ پەن ءحاميديدىڭ «اباي» وپەراسىنداعى اباي پارتياسىن ورىندادى. ال دج. ءروسسينيدىڭ «سەۆيل شاشتارازى» وپەراسىنداعى فيگارو ءرولى ءارتىستى جاڭا قىرىنان تانىتىپ, وعان الەمدىك دەڭگەيدەگى داڭق الىپ بەردى. ونى سوندىقتان دا دميتري گناتيۋك «باريتونداردىڭ كورولى» دەپ اتاسا, مۋسليم ماگوماەۆ «كەڭەس وداعىنداعى ەڭ ۇزدىك فيگارو» دەپ باعالادى. وسى پارتيامەن ول الەمنىڭ كوپتەگەن ەلدەرىنىڭ ساحنالارىندا ونەر كورسەتىپ, وشپەس ءىز قالدىردى.
ەرمەك سەركەباەۆ 1973 جىلدان الماتى كونسەرۆاتورياسىدا ۆوكال سىنىبى بويىنشا ساباق بەردى. پروفەسسور بىرنەشە دۇركىن حالىقارالىق بەدەلدى كونكۋرستاردىڭ توراعاسى جانە مۇشەسى قىزمەتىن اتقاردى. سولاردىڭ ىشىندە م.ي. گلينكا مەن پ.ي. چايكوۆسكي اتىنداعى حالىقارالىق كونكۋرستار دا بار ەدى.
ەرمەك سەركەباەۆ ۇزاق تۆورچەستۆولىق جولىندا «قازاقفيلم» تۇسىرگەن 4 فيلمگە دە ءتۇسىپ ۇلگەردى.
يتالياندار ءۇشىن ەنريكو كارۋزو, ورىستار ءۇشىن فەدور شالياپين قانداي ورىن السا, ەرمەك سەركەباەۆ قازاقتار ءۇشىن تاپ سونداي دارەجەدە بولدى.
ومىرگە سيرەك كەلەتىن دارىن يەسى, حالقىمىزدىڭ ماقتانىشى ەرمەك سەركەباەۆ وسىلاي ومىردەن ءوتىپ بارا جاتىر.
مارقۇمنىڭ جاتقان جەرى جايلى, توپىراعى تورقا بولسىن!
