"Monterra Qasaqstan" جشس 2015 جىلى قۇرىلعان. ايتا كەتكەن ءجون, Monterra Group AG نەمىس ينۆەستيتسيالىق كومپانياسىنىڭ ەنشىلەس مەكەمەسى بولىپ تابىلادى.
كومپانيا مەن جامبىل وبلىسى اكىمدىگى اراسىندا 2016 جىلى تاۋ-كەن مەتاللۋرگيا كومبيناتىن سالۋ تۋرالى مەموراندۋمعا قول قويىلعان بالاتىن. سول جىلى قاراتاس-مايبۇلاق الاڭىندا التىن مەن ىلەسپە كومپونەنتتەردى بارلاۋعا كەلىسىمشارت جاسالىنعان. بۇگىنگى تاڭدا قورداي اۋدانىندا كومبينات قۇرىلىسىنا ارنايى جەر تەلىمى ءبولىندى. جوبا جامبىل وبلىسىنىڭ يندۋستريالاندىرۋ كارتاسىنا ەنگىزىلگەن.
ينۆەستيتسيانىڭ جالپى كولەمى 600 ميلليون ەۋرونى قۇرايدى.
"Monterra Qasaqstan" جشس باقىلاۋ كەڭەسىنىڭ توراعاسى يوگانن شتول التىن ءوندىرۋدىڭ بىرەگەي تەحنولوگياسى قولدانىلاتىنىن اتاپ ءوتتى. ءوزى قورداي اۋدانىنىڭ تۋماسى. جەرلەستەرى ءۇشىن تۇراقتى جانە جالاقىسى جاقسى جۇمىس ۇسىنىپ, دامىعان ءوندىرىستى جولعا قويعىسى كەلەدى.
قازىرگى ۋاقىتتا كومپانيا گەولوگيالىق بارلاۋ جۇمىستارىن جۇرگىزۋدە, وبەكتىلەردى ونەركاسىپتىك يگەرۋگە دايىنداۋدا. "Monterra Qasaqstan" جشس باس ديرەكتورى مەرۋەرت دانباەۆانىڭ ايتۋىنشا, "تاۋ-كەن مەتاللۋرگيا كومبيناتىنىڭ قۇرىلىسى 2021 جىلى باستالادى". ال, نىساندى 2023 جىلى پايدالانۋعا بەرۋ جوسپارلانۋدا. سودان كەيىن التىن ءوندىرۋ جۇمىستارى جۇزەگە اساتىن بولادى. كومپانيا 1900 ادامدى تۇراقتى جۇمىسپەن قامتاماسىز ەتۋگە نيەتتى.
جاڭا كومبيناتتا دورە قورىتپاسى (التىن-كۇمىس قورىتپا) وندىرىلەدى. ءوندىرىس باستالعاننان كەيىن "Monterra Qasaqstan" جشس بەس تونناعا دەيىن التىن ءوندىرۋدى, سودان كەيىن بىرتىندەپ قۋاتتىلىقتى ارتتىرۋدى جوسپارلاپ وتىر.
"تاۋ - كەن مەتاللۋرگيا كومبيناتىندا ءوندىرىستىڭ ەكولوگيالىق قاۋىپسىزدىگىن قامتاماسىز ەتۋگە مۇمكىندىك بەرەتىن وزىق تەحنولوگيالار قولدانىلاتىن بولادى", - دەپ سەندىردى م.دانباەۆا.
كومپانيا اۋداننىڭ ينفراقۇرىلىمىن دامىتۋعا دا ينۆەستيتسيا سالادى.
"2019 جىلى "Monterra Qasaqstan" جشس ارداگەرلەرگە, تۇرمىسى تومەن وتباسىلارعا كومەك كورسەتتى. سونىمەن قاتار, كوپ بالالى وتباسىلار ءۇشىن تۇرعىن ءۇي ساتىپ الدى جانە ەلدى مەكەندەردى اباتتاندىرۋ بويىنشا جۇمىستار جۇرگىزدى. قورداي اۋدانىندا قيراعان نىسانداردى قالپىنا كەلتىرۋ ءۇشىن بيۋدجەتتەن قاراجات ءبولىندى. اۋداندىق اۋرۋحانا ءۇشىن ءوجج اپپاراتى ساتىپ الىندى. ەندىگى تاڭدا, تۋعان اۋىلىندا كەنەن ازىرباەۆ اتىنداعى مۇراجايدى كۇردەلى جوندەۋدەن وتكىزىپ, ستۋدەنتتەردى وقىتۋ جوسپارلانۋدا", - دەدى م.دانباەۆا.
بەردىبەك ساپارباەۆ بۇل باعىتتا ودان ءارى جۇمىس ىستەۋدى, قورداي اۋدانى اۋىلدارىنىڭ الەۋمەتتىك ماسەلەلەرىن شەشۋگە جاردەمدەسۋ قاجەتتىگىن اتاپ ءوتتى.
"مەملەكەت ينۆەستورلاردى قولداۋعا ءاردايىم دايىن, بىراق ناقتى ناتيجەلەر قاجەت. كومپانيا ءوزىنىڭ كەلىسىمشارتتىق مىندەتتەمەلەرىن ساقتاۋعا مىندەتتى", - دەدى وبلىس اكىمى.
ول ەكولوگيا, كادرلاردى دايارلاۋ ماسەلەلەرىنە ەرەكشە نازار اۋدارۋ قاجەتتىگىن اتاپ ءوتتى.
ء"بىز ينۆەستورلاردان جەرگىلىكتى تۇرعىنداردى جۇمىسقا الۋدى سۇرايمىز. اۋىل تۇرعىندارى قازىردىڭ وزىندە ارنايى وقۋدان ءوتىپ, قۇرىلىس اياقتالعاننان كەيىن بىردەن جۇمىسقا كىرىسۋى ءتيىس", - دەپ تولىقتىردى ءوڭىر باسشىسى.
وبلىس اكىمى ءوزىنىڭ ورىنباسارى الماس ماديەۆكە ينۆەستيتسيالىق جوبانى ىسكە اسىرۋ بويىنشا جول كارتاسىن ازىرلەۋدى تاپسىردى.
