ءبىرىنشى بولىپ 7 شاقىرىمدىق جارىس جولىنا شىققان جورعالاردىڭ وزىپ كەلگەن العاشقى 3-ەۋىنە بايگە بۇيىردى. ءبىرىنشى ورىن اياكوز بيكەنوۆا باپتاعان پەتروپاۆل قالاسىنداعى «قۇلاگەر» اتشابارىنىڭ جىلقىسى «فيليپس» ەسىمدى جورعاعا, كەلەسى ورىندار سولتۇستىكقازاقستاندىق ارمان قابدوللاەۆتىڭ مەنشىگى «رەۆانش» اتتى ك ۇلىككە جانە اقمولا وبلىسى بۇلاندى اۋدانىنىڭ تۇرعىنى فارحات جايليەۆ تىزگىندەگەن «ەدەلۆەيس» اتتى جورعاعا بۇيىردى.
كەلەسى سىن 9 شاقىرىمدىق قۇنان بايگەگە 24 جۇيرىك قاتىسىپ, ءبىرىنشى ورىن الماتى وبلىسى جامبىل اۋدانىنان كەلگەن سۇلتان جولان ۇلىنىڭ جۇيرىگى «تالحيز» اتتى تورى بايتالدىڭ ماڭدايىنا جازىلسا, ەكىنشى ورىن سۇلەتاي نۇربولات تىزگىندەگەن «بابۋر امير» ەسىمدى قۇنانعا, ءۇشىنشى ورىن الماتى قالاسىنىڭ تۇرعىنى ولجاس ءابدىحاميت باپتاعان «زاماناي» اتتى اعىلشىن جىلقىسىنا بۇيىردى.
ودان كەيىن كىشى الامان, ياعني 16 شاقىرىمدىق توپ بايگە جۇيرىكتەرى جارىس جولىنا شىعىپ, اۋىزدىعىمەن الىسقان 27 سايگ ۇلىكتىڭ ىشىنەن الماتى وبلىسىنىڭ قاراساي اۋدانىنان اكەلىنگەن «قارلىعاشتىڭ» (يەسى – سەكەناي بوبەكباي) ماڭدايى جارقىراپ ءبىرىنشى كەلسە, ودان كەيىنگى ورىنداردى ماڭعىستاۋ وبلىسىنىڭ تۇرعىنى شادراح ەرمەكباي ۇلىنىڭ «اقشولپان» اتتى تورى بيەسى مەن الماتى وبلىسىنىڭ جامبىل اۋدانىنان كەلگەن سۇلتان جولان ۇلىنىڭ تازا قاندى قاراگەرى ءبولىستى.
«بايگەنىڭ كوركى – الامان» دەگەندەي, 25 شاقىرىمدىق جارىس جولىنا ءار تاراپتان قوسىلعان 31 جۇيرىك باعىن سىنادى. بۇلاردىڭ اراسىندا ۇلكەن بايگەلەردەن ءباس الىپ جۇرگەن قاراعاندىنىڭ «باقتورىسى», الماتىنىڭ «قاراتورعايى» مەن «نۇرتوبەلى», نۇر-سۇلتاننىڭ «بۇيرىعى», ورالدىڭ «بەكتورى», جامبىلدىڭ «نۇريسلامى», الماتى وبلىسىنىڭ «جەتىسۋى», پاۆلوداردىڭ «سەنىمى» سىندى باس جۇلدەدەن دامەلى سايگ ۇلىكتەر قارا جەردىڭ اپشىسىن قۋىردى. سونىمەن العاشقى بولىپ تىزگىن ۇستاتقان 7 جۇيرىككە جۇلدە بەرىلدى.
ءبىرىنشى ورىن مەيىرلان نۇربولاتوۆ تىزگىندەگەن «باقتورى» اتتى جۇيرىككە بۇيىردى. ات يەسى – پارلامەنت ءماجىلىسىنىڭ دەپۋتاتى بەكبولات تىلەۋحان. ەكىنشى ورىندى الماتى وبلىسىنىڭ قاراساي اۋدانىنان كەلگەن تازا قاندى بەس جاسار كۇرەڭ بيە ەنشىلەدى. يەسى – ءمادي ورازاليەۆ. ءۇشىنشى ورىنعا نۇر-سۇلتان قالاسىنىڭ اتىنان شىققان تازا قاندى تورى دونەن تابان تىرەدى. ات يەلەرى – نۇرداۋلەت اكىمجانوۆ پەن ازامات بەگالين.
كەلەسى ورىندار الماتى وبلىسىنداعى قاراساي اۋدانىنىڭ تۇرعىنى ايگىلى اتبەگى سەكەناي بوبەكبايدىڭ «ۇشقوڭىرىنا», قاراعاندى وبلىسىنىڭ قىزىلجار ستانساسىنان كەلگەن بەكزات اينەكباەۆتىڭ كۇرەڭ قاسقاسىنا, كومبەنى كەسىپ ءوتىپ جىعىلعان ەرجان اقتاسوۆتىڭ «كوكويناعىنا» جانە الماتى وبلىسىنداعى قاراساي اۋدانىنان كەلگەن سۇلتان جولان ۇلىنىڭ «اسۋ تورىسىنا» بۇيىردى.
