كوميسسيا وتىرىسىندا سىبايلاس جەمقورلىققا قارسى ءىس-قيمىل سالاسىنداعى زاڭنامالىق جاڭاشىلدىقتار تانىستىرىلىپ, اگەنتتىكتىڭ تۇركىستان وبلىسى بويىنشا دەپارتامەنتىمەن اعىمداعى جىلدىڭ 9 ايىندا 9 مەكەمەدە جۇرگىزىلگەن سىبايلاس جەمقورلىق تاۋەكەلدەرىنە سىرتقى تالداۋدىڭ ناتيجەلەرى ورتاعا سالىندى. القالى جيىندا ءوڭىر باسشىسى ومىرزاق ەستاي ۇلى زاڭمەن بەكىتىلگەن وزگەرىستەردىڭ ماڭىزدىلىعىن العا تارتىپ, اشىقتىق ءپرينتسيپى ارقىلى حالىققا قولايلى قىزمەت كورسەتۋگە ايرىقشا باسىمدىق بەرۋ قاجەتتىگىن جەتكىزدى. «وزىنە سەنىمدى ادام عانا ەشنارسە جاسىرمايدى. دۇرىستى – دۇرىس, بۇرىستى – بۇرىس دەۋ ءۇشىن اقيقات پەن اشىقتىق قاجەت. تۇركىستان وڭىرىنە قاتىستى جاعىمسىز, جالپى تۇسىنىكتەن ارىلۋىمىز كەرەك. كەرىسىنشە, ءبىز ەلىمىز بويىنشا جەمقورلىقپەن ۇدايى كۇرەسىپ, ونى انىقتاپ, الدىن الۋدان الدىڭعى قاتاردامىز. جەمقورلىقپەن پارمەندى كۇرەس ناتيجەلى. بۇل باعىتتاعى جۇمىس كۇشەيەدى. قىلمىستىڭ اشىلۋىنا ىمىراسىزدىق پەن اشىقتىق اسەر ەتەدى», دەدى ومىرزاق شوكەەۆ.
ال دەپارتامەنت باسشىسىنىڭ ءبىرىنشى ورىنباسارى ميراس قارعاباي 9 اي ىشىندە جۇرگىزىلگەن ءىشىنارا تالداۋدىڭ ناتيجەسىندە مەملەكەتتىك ورگانداردىڭ قىزمەتىندە نورماتيۆتىك قۇقىقتىق اكتىلەر مەن ۇيىمداستىرۋشىلىق-باسقارۋشىلىق قىزمەتتەگى بىرقاتار سىبايلاس جەمقورلىق تاۋەكەلدەرى, اتاپ ايتساق مۇقتاجدار ەسەبىندە تۇراتىن ازاماتتارعا تۇرعىنجاي بەرۋدە كەزەكتىلىكتى ساقتاماۋ, مەملەكەتتىك اتاۋلى الەۋمەتتىك كومەكتى تاعايىنداۋ بارىسىندا تۋىندايتىنى انىقتالىپ, سوعان سايكەس تاۋەكەلدەردى جويۋ ماقساتىندا دەپارتامەنتپەن جولدانعان 73 ۇسىنىستىڭ 58-ءى ورىندالعانىن اتاپ ءوتتى.
سونداي-اق, جيىندا «تۇركىستان – ادالدىق الاڭى» جوبالىق كەڭسەسىنىڭ اياسىندا وبلىسقا قاراستى اكىمدىكتەردىڭ جاڭا جۇمىس ۇلگىسىنە كوشۋى نەگىزىندە ءوڭىر تۇرعىندارى مەملەكەتتىك قىزمەتتەردى ساپالى, جەدەل جانە كەدەرگىسىز الۋىنا مۇمكىندىك بەرەتىن «سەرۆيستىك اكىمدىكتەردىڭ» اشىلۋ ماسەلەسى تالقىلاندى. بۇگىنگى كۇنى جاڭا ۇلگىدەگى اكىمدىك تۇركىستان, كەنتاۋ قالالارى مەن سوزاق, تولەبي, تۇلكىباس, كەلەس اۋداندارىندا اشىلعان, وسىعان سايكەس كوميسسيا وتىرىسىندا وبلىس اكىمى تاراپىنان بارلىق قالا, اۋداندارداعى اكىمدىكتەردىڭ جىل سوڭىنا دەيىن «سەرۆيستىك اكىمدىك» ۇلگىسىنە كوشۋى بويىنشا ناقتى تاپسىرمالار بەرىلدى.
كوميسسيا وتىرىسىندا ءسوز العان تۇركىستان وبلىسىنىڭ باستىعى قايرات دالبەكوۆ ىشكى ىستەر سالاسىنداعى سىبايلاس جەمقورلىققا قارسى ءىس-قيمىل ماسەلەلەرى بويىنشا اتقارىلعان جۇمىستاردى بايانداپ, قۇقىقبۇزۋشىلىقتىڭ الدىن الۋ, بولدىرماۋ جانە جولىن كەسۋدە «تۇراقتى ارنايى ءموبيلدى توپ» توسىننان تەكسەرۋ جۇمىستارىن كۇشەيتكەنىن جانە بۇگىنگى كۇنى قوسىمشا تالىمگەرلەر كەڭەسى, وفيتسەرلىك جانە ايەلدەر كەڭەسى جۇمىس ىستەپ جاتقانىن جەتكىزدى.
جيىن سوڭىندا وڭىردە جەمقورلىق دەڭگەيىن تومەندەتۋ بويىنشا بىرقاتار ۇسىنىستار تىڭدالىپ, قوعام ىندەتىمەن كۇرەس شارالارى بارلىق مەملەكەتتىك ورگان باسشىسىنىڭ قىزمەتىندە باسىم باعىتتاردىڭ ءبىرى بولۋى قاجەت ەكەندىگى ەسكەرتىلدى.
تۇركىستان وبلىسى
