ماۋسىمارالىق كەزەڭدە كوكونىسپەن ءوڭىردىڭ ءوزىن ءوزى قامتۋىنا, ازىق-ت ۇلىك قاۋىپسىزدىگىن قامتاماسىز ەتۋگە جانە كوكونىس باعاسىن تۇراقتاندىرۋعا ىقپال ەتەتىن ءتيىمدى شارانىڭ ءبىرى – جىلىجاي شارۋاشىلىعىن دامىتۋ. بۇل جاعىنان ۇيعىر اۋدانى جەرىنىڭ قۇنارلىلىعى, تابيعاتىنىڭ قولايلىلىعى جىلىجاي شارۋاشىلىعى ءۇشىن اسا ءتيىمدى. وعان قوسا اۆتوماتتاندىرىلعان جۇيەنى ەنگىزۋ, تامشىلاتىپ سۋارۋ جانە تىڭايتقىشتاردى قوسۋ ءادىسى مەن جىلۋ جۇيەسىن ورناتۋ سياقتى وزىق تەحنولوگيالارعا كوشۋ شارۋاشىلىقتارعا ءونىمنىڭ ساپاسىن جاقسارتۋ مەن مەن تابىستى ەسەلەي تۇسۋگە جاقسى مۇمكىندىك بەرىپ وتىر. جەر استىنان شىعاتىن ىستىق سۋ مەن كۇن ساۋلەسىنىڭ قىزۋى دا كادەگە اسۋدا. تابيعات سىيى ءبىراز شىعىندى ازايتۋعا سەپتىگىن تيگىزىپ وتىر.
وسى اۋدانداعى "ەكوپرودۋكتپليۋس" جىلىجايىنىڭ ديرەكتورى, جەرگىلىكتى كاسىپكەر ر. باسيتوۆتىڭ ايتۋىنشا, كەشەنگە تۇركيانىڭ تەحنولوگياسى قويىلىپ, كليماتتى باقىلاۋ جۇيەسى ورناتىلعان. اتالعان تەحنولوگيا جىل بويى بىرقالىپتى تەمپەراتۋرانى ساقتاۋعا مۇمكىندىك بەرەدى. 2019 جىلدىڭ ءساۋىر ايىندا سالىنا باستاعان جىلىجاي كەشەنى سول جىلدىڭ قازان ايىندا قولدانىسقا بەرىلگەن. كەشەننىڭ اۋماعى 1,5 گەكتاردى قۇرايدى. نەگىزگىنەن قيار, قىزاناق, جۋا وسىرۋگە دەن قويىپ وتىر.
جالپى جوبا جەتەكشىلەرى جىلىنا 500 تونناعا دەيىن ءونىم الۋدى مەجەلەگەن. ونىمدەردىڭ باسىم بولىگى ەل اۋماعىنا شىعارىلىپ, كورشىلەس مەملەكەتتەرگە ەكسپورتتالۋدا. مۇندا قازىر 15 ادام تۇراقتى جۇمىسپەن قامتىلعان.
وبلىستىق اۋىل شارۋاشىلىعى باسقارماسىنىڭ مالىمەتىنشە, جالپى الماتى وبلىسىندا بۇگىندە 101,1 گەكتار جەردە 101 جىلىجاي تىركەلگەن. ولاردا 1 قازانداعى مالىمەت بويىنشا 24,5 مىڭ ءونىم, ياعني قيار مەن قىزاناق جينالدى.
