بۇرىن-سوڭدى بولماعان مۇنداي باتىل باستامانى قورقىت اتا اتىنداعى قىزىلوردا ۋنيۆەرسيتەتىنىڭ عالىمى, اۋىل شارۋاشىلىعى عىلىمدارىنىڭ كانديداتى سامالبەك قوسانوۆ قولعا الىپ وتىر. جۇرتشىلىق قىزىعۋشىلىق تانىتقان جاڭا ءونىم كەپتىرىلگەن باقشا داقىلىنان جاسالادى. سوندىقتان ول ءونىم – ەكولوگيالىق تۇرعىدان تازا.
ءاۋ باستا تابيعي ءونىم اتالعان وقۋ ورنىنىڭ زەرتحاناسىندا دايىندالىپتى. ءتىل ۇيىرگەن تىڭ تاجىريبە, راسىندا دا, وڭ ناتيجە بەرسە كەرەك. ازىرشە, قاۋىن-قىتىرلاق ەكى ءتۇرلى پىشىندە كوپشىلىككە ۇسىنىلادى دەپ جوسپارلانۋدا.
ال ول قالاي دايىندالادى دەگەنگە كەلسەك, الدىمەن پىسكەن قاۋىن مۇقيات تازالانىپ, سودان سوڭ جۇقا تىلىكتەرگە ءتىلىنىپ, ءۇشىنشى كەزەڭىندە دايىن بولىكتەر 12 ساعاتتان اسا ۋاقىت كەپتىرىلەدى ەكەن. كاسىپكەردىڭ سوزىنە سەنسەك, ەرەكشە دامنەن اۋىز تيگەن جاندار بۇل ءونىمنىڭ تۇراقتى تۇتىنۋشىسىنا قالاي اينالعاندىقتارىن وزدەرى دە بىلمەي قالاتىن سياقتى.
جالپى العاندا, سىر وڭىرىندە قاۋىن شارۋاشىلىعى جاقسى دامىعان, سوندىقتان شيكىزات ماسەلەسىندە ىركىلىس بولا قويماس دەپ وتىر ءىس باستاعاندار. جوبا تولىق جۇزەگە اسسا, عالىمدار تاۋلىگىنە 300-500 كيلو قاۋىن چيپسىسىن ءوندىرۋدى جوسپارلاپ وتىر. الداعى ۋاقىتتا قىتىرلاق قاۋىن ءوندىرىسىن ۇلعايتۋ ءۇشىن زاماناۋي كەپتىرۋ قوندىرعىلارىن الۋ دا ويدا بار.
بۇعان دەيىن دە باقشا داقىلدارىنا ءتۇرلى تاجىريبە جاساپ جۇرگەن عالىم-كاسىپكەر «بيزنەستىڭ جول كارتاسى-2020» مەملەكەتتىك باعدارلاماسىنا قۇجاتتارىن تاپسىرىپ, 2 ملن 500 مىڭ تەڭگە قايتارىمسىز قاراجاتقا دا يە بولىپ ۇلگەرگەن ەدى. ەندى ول جاڭا كاسىبىنىڭ كوكجيەگىن ودان ءارى كەڭەيتۋگە كۇش سالماق.
امانگەلدى قياس,
«Egemen Qazaqstan»
