چەمپيونات قىزا ءتۇستى

فۋتبول • 21 قازان، 2020

چەمپيونات قىزا ءتۇستى

9 رەت كورسەتىلدى

فۋتبولدان قازاقستان چەمپيوناتىنىڭ كەزەكتى تۋر ويىندارى ءتۇرلى وقيعالارمەن جانكۇيەرلەردىڭ ەسىندە قالدى. ماسەلەن، «تاراز» ەكىنشى تايمنىڭ ورتاسىنا دەيىن 2:0 ەسەبىمەن الدا تۇرعانىمەن، ماتچ سوڭىندا ارەڭ دەگەندە تەڭ ەسەپتى ساقتاپ قالسا، «جەتىسۋ» دا ءدال سونداي ەسەپپەن «قايراتتى» جەڭىپ جاتىپ، قارسىلاسىنا ءىرى ەسەپپەن جول بەردى. سونىمەن قاتار الماتىلىقتار ەكى بىردەي 11 مەترلىك ايىپ دوبىن ورىنداي المادى.

ءالي بيتورە

«وقجەتپەس» – «قىزىلجار» – 2:1

13-تۋر ويىندارىنىڭ شىمىلدىعىن چەمپيوناتتا جان ساقتاپ قالۋدىڭ قامىنا كىرىسكەن ەكى اۋتسايدەر كوماندا اشىپ بەردى. ەڭ كەيىنگى جەڭىسىنە 26 تامىزدا قول جەتكىزگەن كوكشەتاۋدىڭ «وقجەتپەس» كلۋبى ءوز الاڭىندا پەتروپاۆلدىڭ «قىزىلجار» كومانداسىن قابىلدادى. ماتچتا تەرىسكەيلىكتەر ەسەپتى ءبىرىنشى بولىپ اشقانىمەن، كەزدەسۋ سوڭىندا قارسىلاستارىنا ەسە جىبەردى. «قىزىلجار» كلۋبى دا 30 تامىزدان بەرى جەڭىستىڭ نە ەكەنىن بىلمەي كەلە جاتىر.

ءبىرىنشى تايمنىڭ 43-مينۋتىندا شوتا گريگالاشۆيلي «قىزىلجاردى» العا شىعارسا، ەكىنشى تايمدا ەكى گول سوققان «وقجەتپەس» ماڭىزدى ءۇش ۇپايىن يەلەندى. گولداردىڭ اۆتورلارى – داركو زوريچ پەن ارتەم دميتريجەۆ. ماتچ بارىسىندا «وقجەتپەس» فۋتبولشىلارى بەلسەندى وينادى جانە جەڭىسكە دەگەن سەنىمى ولاردى العا جەتەلەدى. كوكشەتاۋلىقتار بۇل ويىندا تۋرنير كەستەسىندەگى باستى قارسىلاسىن جەڭىپ قانا قويماي، ۋاقىتشا قاۋىپتى ايماقتان شىقتى.

«تاراز» – «قايسار» – 2:2

«وڭتۇستىك دەربيىندە» «قايسار» كلۋبىن قابىلداعان «تاراز» كەزدەسۋدىڭ ءبىرىنشى تايمىندا ەكى گول سوعىپ، ويىندا ۇستەمدىك تانىتتى. الايدا ماتچتىڭ ەكىنشى 45 مينۋتىندا ۆلاديمير نيكيتەنكونىڭ شاكىرتتەرى ويىنداعى باسىمدىقتى ساقتاي الماي، قاقپالارىنا ەكى گول وتكىزىپ الدى. بىلتىر «تارازدىڭ» نامىسىن قورعاعان، بيىل «قايسار» كلۋبىندا دوپ تەبەتىن ەلگۋدجا لوبجانيدزە ءوزىنىڭ بۇرىنعى كلۋبىنىڭ قاقپاسىن ەكى مارتە ءدال كوزدەپ، قازىرگى كومانداسىنا تەڭ ناتيجە سىيلادى.

«شاحتەر» – «ورداباسى» – 0:1

چەمپيوناتتا جوعارى ورىندارعا قول جەتكىزۋدى كوزدەيتىن شىمكەنتتىڭ «ورداباسى» كلۋبى ماقساتىنا تاعى ءبىر ماڭىزدى قادام جاسادى. قاراعاندىنىڭ «شاحتەرىمەن» ءۇش ۇپايدى ساراپقا سالعان شىمكەنتتىكتەر قيىندىققا تاپ بولسا دا، جەڭىسكە جەتتى. «ورداباسىنىڭ» برازيليالىق «دجوكەرى» جواو پاۋلو ويىنداعى جالعىز ءارى جەڭىستى گولدى سوقتى. ونىڭ ايىپ الاڭىنىڭ ىشىنەن جاساعان سوققىسى «شاحتەر» قورعاۋشىلارىنىڭ بىرىنە ءتيىپ، دوپ قاقپا تورىنەن تابىلدى. «ورداباسى» بۇل جەڭىستەن كەيىن 21 ۇپايمەن ءۇشىنشى ورىنعا كوتەرىلدى. ال «شاحتەر» 16 ۇپايمەن التىنشى ورىندا قالا بەرمەك.

«جەتىسۋ» – «قايرات» – 2:4

تۋردىڭ تارتىستى ءارى ەڭ كوپ گول سوعىلعان كەزدەسۋى اتالعان ەكى كوماندا اراسىندا ءوتتى. التى گول سوعىلعان ويىندا ەكى 11 مەترلىك ايىپ دوبى ورىندالدى جانە ەكى فۋتبولشى قىزىل قاعاز الىپ، الاڭنان قۋىلدى. كەزدەسۋدى ءساتتى باستاعان «جەتىسۋ» 20 مينۋتتا ەكى گول سوعىپ، ەسەپتە العا شىقتى. ءبىر قىزىعى، ەكى گول دا «قايرات» فۋتبولشىلارىنىڭ قاتەلىگىنەن كەيىن سوعىلدى. دەسە دە ءبىرىنشى تايم سوڭىنا دەيىن «قالالىقتار» ابات ايىمبەتوۆتىڭ سوققان گولىنىڭ ارقاسىندا ەسەپ ايىرماسىن قىسقارتۋعا مۇمكىندىك الدى.

ءبىرىنشى تايم سياقتى ەكىنشى تايمدا كورەرمەندەر ءۇش گولدىڭ كۋاسى بولدى. الايدا ءۇش گولدى دا «قايرات» ويىنشىلارى سوقتى. ابات ايىمبەتوۆ ءدۋبلدىڭ اۆتورى اتانسا، «قايراتتىڭ» بەلارۋس قورعاۋشىسى دەنيس پولياكوۆ پەن 19 جاستاعى شابۋىلشى دانيار ۇسەنوۆ چەمپيوناتتاعى تۇڭعىش گولىن سوقتى. ەكىنشى تايمدا «جەتىسۋ» كلۋبىنىڭ ەكى ويىنشىسى تارتىپسىزدىگى ءۇشىن الاڭنان قۋىلىپ، كوماندالاستارىن قيىن جاعدايدا قالدىرىپ كەتتى. 60-مينۋتتا شابۋىلشى ميرام ساپانوۆ ەكىنشى سارى قاعازىن السا، 94-مينۋتتا اسلان داراباەۆ قىزىل قاعازبەن جازالاندى.

«كاسپي» – «توبىل» – 0:1

ءوز دەڭگەيىندەگى كوماندالارعا قاراعاندا، چەمپيوندىققا ءۇمىتى بار كلۋبتارعا وڭايلىقپەن ۇپاي بەرمەيتىن اقتاۋدىڭ «كاسپيى» بۇل جولى دا ادەتىنەن جاڭىلعان جوق. وتكەن تۋردا ەلىمىزدىڭ التى دۇركىن چەمپيونى «استانا» كلۋبىنان ايلاسىن اسىرعان (2:1) «كاسپي» بۇل تۋردا چەمپيوندىقتان باستى ۇمىتكەر كوماندالاردىڭ ءبىرى سانالعان قوستانايدىڭ «توبىلىنا» لايىقتى قارسىلىق كورسەتىپ، ابدەن اۋرەلەدى. قوستانايلىقتار ماتچ بويى باسىمدىق تانىتىپ، ءسات سايىن شابۋىلعا شىققانىمەن «كاسپي» قورعانىسىن ءبىراز ۋاقىتقا دەيىن بۇزا المادى. تەك ەكىنشى تايمنىڭ ورتا تۇسىنا كەلگەندە عانا «توبىل» ستاندارت جاعدايىنداعى مۇمكىندىگىن پايدالانىپ كەتتى. كەزدەسۋدەگى جالعىز ءارى جەڭىستى گولدى 70-مينۋتتا سەرگەي مالىي سوقتى. ازات نۇرعاليەۆتىڭ بۇرىشتامادان اسىرعان پاسىن مالىي گولعا اينالدىردى. وسى جەڭىستىڭ ارقاسىندا «توبىل» 23 ۇپاي جيناپ، تۋرنير كەستەسىندە «استانا» مەن «ورداباسىدان» (ەكەۋى دە – 21) وزىپ، ەكىنشى ورىنعا كوتەرىلدى. «قايرات» كوش باسىندا (32 ۇپاي)، ال «كاسپي» سوڭعى ورىندا (7 ۇپاي) قالىپ قويدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز