«قازمەديا ورتالىعى» عيماراتىندا ورتالىق كوممۋنيكاتسيالار قىزمەتىنىڭ شاقىرۋىمەن پارلامەنت ءماجىلىسىنىڭ دەپۋتاتى, زاڭناما جانە سوت-قۇقىقتىق رەفورما كوميتەتىنىڭ مۇشەسى مۇحتار تىنىكەەۆ بريفينگ وتكىزدى.
بريفينگتە ايتىلعان نەگىزگى ماسەلە – مەملەكە باسشىسى نۇرسۇلتان نازارباەۆتىڭ 11 قازاندا ۇكىمەتتىڭ كەڭەيتىلگەن وتىرىسىندا مىندەتتەگەن تاپسىرمالارىنىڭ ورىندالۋ بارىسى بولدى. جۋرناليستەرمەن جۇزدەسۋدە دەپۋتات ەلباسى سىن تەزىنە سالعان فاكتىلەرگە توقتالا كەلىپ, جىل سايىن رەسپۋبليكا جۇزىندە ورىن الاتىن جوبالاردىڭ قىمباتتاۋىنا بايلانىستى قوسىمشا قارجىدان 60 ملرد. تەڭگە جۇمسالاتىنىن العا تارتتى.
* پرەزيدەنت تاپسىرماسى قالاي ورىندالۋدا؟
«قازمەديا ورتالىعى» عيماراتىندا ورتالىق كوممۋنيكاتسيالار قىزمەتىنىڭ شاقىرۋىمەن پارلامەنت ءماجىلىسىنىڭ دەپۋتاتى, زاڭناما جانە سوت-قۇقىقتىق رەفورما كوميتەتىنىڭ مۇشەسى مۇحتار تىنىكەەۆ بريفينگ وتكىزدى.
بريفينگتە ايتىلعان نەگىزگى ماسەلە – مەملەكە باسشىسى نۇرسۇلتان نازارباەۆتىڭ 11 قازاندا ۇكىمەتتىڭ كەڭەيتىلگەن وتىرىسىندا مىندەتتەگەن تاپسىرمالارىنىڭ ورىندالۋ بارىسى بولدى. جۋرناليستەرمەن جۇزدەسۋدە دەپۋتات ەلباسى سىن تەزىنە سالعان فاكتىلەرگە توقتالا كەلىپ, جىل سايىن رەسپۋبليكا جۇزىندە ورىن الاتىن جوبالاردىڭ قىمباتتاۋىنا بايلانىستى قوسىمشا قارجىدان 60 ملرد. تەڭگە جۇمسالاتىنىن العا تارتتى.
جانە, وكىنىشكە قاراي, ول سوما جىل سايىن ارتىپ وتىرعانىنا قىنجىلىسىن بىلدىرگەن دەپۋتات: –جوبالاردىڭ قىمباتتاۋى پارا الۋ ەسەبىنەن بولىپ وتىر. بۇل ەشكىم ءۇشىن دە قۇپيا ەمەس, – دەدى. – ءبىز ەگەر دە ەل بيۋدجەتىن 3 جىلدىق ەتىپ بەكىتسەك, نەگە تەندەرلەردى دە سول مەرزىمدە ءبىر رەت وتەتىن ەتپەيمىز. سوندا تەندەرگە قاتىسۋشى ءوزىنىڭ 3 جىل بويىنا اتقاراتىن جۇمىسى بارلىعىنا سەنىمدى بولار ەدى جانە بانكتەر دە ولارعا نەسيە بەرۋگە ق ۇلىق تانىتار ەدى.
م.تىنىكەەۆ ءارى قاراي: «ال كوممەرسانت نە ىستەيدى؟ ول تەندەر وتكىزەتىن شەنەۋنىككە قاراجاتتىڭ 10-15 پايىزىن بەرۋگە ءماجبۇر. سوندىقتان وسىنداي جاعداي تۋىنداپ وتىر. نەلىكتەن بىزدە تۇرعىن ءۇي قىمبات؟ ويتكەنى, تاعى دا ءبىزدىڭ شەنەۋنىكتەر پارا الادى, – دەدى تۇپكى ويىن جاسىرماي. – ارينە, مەن بارلىعى بىردەي وسىنداي دەپ ايتۋدان اۋلاقپىن, بىراق وسىنىڭ بار ەكەنى دە شىندىق. سوندىقتان دا, پرەزيدەنت مەملەكەتتىك ورگانداردىڭ جەتەكشىلەرى مەن اكىمدەرگە بۇل كوميسسيالارعا وزدەرى ءتوراعالىق ەتۋى قاجەتتىگىن تىكەلەي ايتتى. ءبىرىنشى باسشى جاۋاپكەرشىلىكتى موينىنا الۋى ءتيىس. اقمولا وبلىسىندا, ماسەلەن, 1200 ورىندىق مەكتەپتىڭ قۇرىلىسى 900 ورىندىق مەكتەپتەن شامامەن 300 ملن. تەڭگەگە ارزانعا تۇسكەن. ال اتىراۋ وبلىسىندا-اۋ دەيمىن, اۋرۋحانا قۇرىلىسى 150 ملن. تەڭگەگە قىمباتقا تۇسكەن».
وسىلاي دەگەن م.تىنىكەەۆ تاعى ءبىر ماڭىزدى جايتقا توقتالدى. ول ەلىمىزدىڭ جوو-لارىندا وقيتىن ستۋدەنتتەردىڭ بىلىمىنە قاتىستى بولدى. «ءبىزدىڭ قازىر جوعارى وقۋ ورىندارىنا «انتيپلاگيات» باعدارلاماسىن ەنگىزۋىمىز قاجەت. بىزدە ستۋدەنتتەردىڭ كوپ بولىگىنىڭ كۋرستىق جۇمىستاردى ينتەرنەتتەن الاتىنى ءتىپتى دە جاسىرىن ەمەس. بولاشاق ماماندار وقۋلارىن تامامداعان سوڭ ديپلومدىق جۇمىستى دا ينتەرنەتتەن كوشىرىپ الادى. ال «انتيپلاگيات» باعدارلاماسى ىسكە قوسىلسا, جۇمىستىڭ قايدان, قالاي الىنعاندىعى, كىمنىڭ جازعاندىعى ءبىردەن كورىنەر ەدى. ەگەر وسى باعدارلامانى شىنداپ قولعا الساق قانا ءبىلىمدى تەك مىقتىلار, ءتىپتى, ساۋساقپەن سانارلىق قانا ادامدار الىپ, وسىلايشا قازىرگىدەي ءوز ماماندىعىن تولىق مەڭگەرمەگەن مامانداردى توعىتۋ توقتاتىلادى. جالپى, بىزگە وسىنشاما زاڭگەر مەن قارجىگەرلەردىڭ كەرەگى قانشا؟ بۇگىندە تاياق تاستاساڭ, ەكونوميست پەن زاڭگەرگە تيەدى», دەدى ول.
دەپۋتات بريفينگ سوڭىندا جۋرناليستەر تاراپىنان قويىلعان ساۋالدارعا جاۋاپ بەردى.
انار تولەۋحانقىزى,
«ەگەمەن قازاقستان».
