قار قۇرساۋىندا ءجيى قالاتىن جول ۋچاسكەلەرى كۇشەيتىلگەن باقىلاۋعا الىنادى. جول تەحنيكاسىن دايىنداۋ ەرەكشە نازاردا. تۇرمىستىق ورتتەردىڭ الدىن الۋدى كۇشەيتۋ قاجەت.
"ادامداردىڭ قاۋىپسىزدىگى مەن ءومىرى ءبىرىنشى ورىندا تۇرعانىن ءبارىمىز ەستە ۇستاۋىمىز كەرەك. قىس مەزگىلىندەگى كەز كەلگەن تج سالدارى اۋقىمدى بولۋى مۇمكىن. قورعاۋ دارەجەسى تەك تجد عانا ەمەس, بارلىق قىزمەتتەردىڭ - اكىمدىكتەردىڭ, جول قىزمەتتەرىنىڭ, ونەركاسىپتىك كاسىپورىنداردىڭ جانە ت.ب. دايىندىعىنا تىكەلەي بايلانىستى", دەپ اتاپ ءوتتى وبلىس اكىمى جەڭىس قاسىمبەك.
ءوڭىر باسشىسى جىلىتۋ ماۋسىمىنىڭ قاۋىپسىز وتۋىنە, اۆتوجولداردى قىسقى مەزگىلدە قاداعالاۋعا بايلانىستى بىرقاتار تاپسىرمالار بەردى.
قاراعاندى وبلىسى تجد باستىعىنىڭ ورىنباسارى مۇرات قاتپانوۆتىڭ ايتۋىنشا, وبلىس بويىنشا قاردىڭ جاۋ دەڭگەيىنە تاۋەلدى اۆتوجولداردىڭ ۇزىندىعى 714 شاقىرىمدى قۇرايتىن 525 ۋچاسكەسى كۇشەيتىلگەن باقىلاۋعا الىنادى. رەسپۋبليكالىق جانە وبلىستىق ماڭىزى بار اۆتوجولداردا زارداپ شەككەندەرگە كومەك كورسەتۋ ءۇشىن 28 جىلىتۋ پۋنكتى ۇيىمداستىرىلادى.
قىسقى كەزەڭدە ازاماتتىق قورعاۋ ورگاندارىنىڭ كۇشتەرىن جۇمىلدىرۋ جوسپارلانۋدا - بۇل 3 مىڭنان استام ادام جانە 1 200 بىرلىك تەحنيكا. ادامداردى ەۆاكۋاتسيالاۋ جانە قۇتقارۋ جاعدايلارىندا جول تالعامايتىن كولىكتەر مەن ۆاحتالىق اۆتوموبيلدەر بار.
قىسقى كەزەڭدەگى پروبلەمالاردىڭ ءبىرى تۇرعىن ءۇي سەكتورىنداعى ورتتەر جانە پەشپەن جىلىتۋ اقاۋلارىنا بايلانىستى ۋلى گازبەن ۋلانۋ بولىپ تابىلادى. وبلىس اكىمى تۇرعىندارعا ءورت قاۋىپسىزدىگى ەرەجەلەرىن كەڭىنەن ءتۇسىندىرۋدى, بىرلەسكەن رەيدتەر مەن اۋلالاردى ارالاۋدى جالعاستىرۋدى تاپسىردى. الەۋمەتتىك قورعالاتىن ساناتتاعى ادامدارعا ۋلى گاز داتچيكتەرىن ورناتۋمەن بارىنشا كومەكتەسۋ قاجەت.
جەڭىس قاسىمبەك سونداي-اق ورتكە قارسى ەرىكتى قۇرالىمداردى جابدىقتاۋ بويىنشا تاپسىرما بەردى. اۋداندىق اكىمدىكتەر قاجەتتى قۇرال-جابدىقتار ساتىپ الۋعا قاراجات ءبولۋى ءتيىس.
تجد مالىمەتىنشە, وبلىس اۋماعىندا 26 تەحنيكالىق جابدىقتالعان ءورت ءسوندىرۋ بەكەتتەرى جۇمىس ىستەيدى. وبلىستىق بيۋدجەت قاراجاتىنا بيىل 20 بىرلىك زاماناۋي ءورت ءسوندىرۋ اۆتوتەحنيكاسى ساتىپ الىندى. جەرگىلىكتى بيۋدجەتتەردەن شالعاي ەلدى مەكەندەرگە بولىنگەن 22 ءموبيلدى كەشەن ساتىپ الۋ قارجىلاندىرىلدى. ءۇش جىل ىشىندە تاعى 21 ءورت ءسوندىرۋ بەكەتىن قۇرۋ جوسپارلانۋدا.
