قازاقستان • 20 قازان، 2020

Antikor سق-فارماتسيا قىزمەتىنىڭ "قايتا جۇكتەلۋىن" سۇيەمەلدەۋدە

31 رەت كورسەتىلدى

"سق-فارماتسيا" جشس باسقارما توراعاسى ەرحات ەسقاليەۆ سىبايلاس جەمقورلىققا قارسى قىزمەتتىڭ اپپاراتتىق كەڭەسىندە اعىمداعى جىلدىڭ شىلدە-تامىز ايلارىندا جۇرتشىلىق پەن ساراپشىلاردى تارتا وتىرىپ جۇرگىزىلگەن سىبايلاس جەمقورلىق تاۋەكەلدەرىن سىرتقى تالداۋ قورىتىندىلارى بويىنشا ۇسىنىمداردى ورىنداۋدىڭ ارالىق ناتيجەلەرى تۋرالى باياندادى، دەپ حابارلايدى Egemen.kz

ايىم ءداۋىت

كومپانيا COVID-19 پاندەميا جاعدايىندا مەديتسينالىق ۇيىمداردى ءدارى-دارمەكتەرمەن جانە مەديتسينالىق بۇيىمدارمەن قامتاماسىز ەتۋ تيىمدىلىگىن ايتارلىقتاي تومەندەتكەن ماسەلەلەر كەشەنىن جويۋعا باعىتتالعان قىزمەتتى "قايتا جۇكتەۋ" باعدارلاماسىن قارقىندى ىسكە اسىرۋدا.

اتاپ ايتقاندا، انتيكور تالداۋ اياسىندا جوسپارلاۋ جۇيەسىنىڭ جەتىلمەگەندىگىنە، ادامي فاكتوردىڭ ساتىپ الۋ جۇيەسىنە ىقپالىنا، ۇزاق مەرزىمدى جەتكىزۋ شارتتارىن ىسكە اسىرۋ كەزىندەگى تاۋەكەلدەرگە، لوگيستيكا جۇيەسىندەگى كەمشىلىكتەرگە، گۋمانيتارلىق كومەك الۋ جانە ءبولۋ تەتىگىنىڭ جەتىلمەگەندىگىنە، ىشكى باقىلاۋ تەتىگىندەگى ولقىلىقتارعا، كادر ساياساتىنداعى تاۋەكەلدەرگە جانە جوعارى اكىمشىلىك شىعىندارعا نازار اۋداردى.

انىقتالعان جەمقورلىق تاۋەكەلدەرىن جويۋ جونىندەگى ءىس-شارالار جوسپارى ازاماتتىق قوعامنىڭ 20-دان استام وكىلىنىڭ، ونىڭ ىشىندە راحىم وشاقباەۆتىڭ، ءامىر سۇلەيمەنوۆتىڭ، سايد تاۋكەلوۆتىڭ قاتىسۋىمەن ىسكە اسىرىلۋدا.

ساتىپ الۋدى جەتىلدىرۋ بولىگىندەگى نەگىزگى باسىمدىق ولاردىڭ ەلەكتروندىق فورماتقا تولىق كوشۋىنە، سونداي-اق تەندەرلىك راسىمدەردى اۆتوماتتاندىرۋعا باعىتتالعان. اتاپ ايتقاندا، ولاردى وتكىزۋ مەرزىمىن 45 كۇننەن 25 كۇنگە دەيىن ازايتۋ جانە الەۋەتتى جەتكىزۋشىلەر ۇسىناتىن تەندەرلىك قۇجاتتامانىڭ سانىن 15-تەن 2-گە دەيىن قىسقارتۋ جوسپارلانۋدا.

جەكە باعىت – كومپانيانىڭ اقپاراتتىق جۇيەلەرىن ەمدەۋ سحەمالارى بويىنشا دەنساۋلىق ساقتاۋ مينيسترلىگىنىڭ جۇيەلەرىمەن بىرىكتىرۋ. بۇل – جوسپارلاۋ ءتارتىبىن جانە وڭىرلەردى ءدارى-دارمەكتەرمەن قامتاماسىز ەتۋدى ارتتىرادى.

ازاماتتاردىڭ سىن-ەسكەرتپەلەرىن ەسكەرە وتىرىپ، ورفاندىق اۋرۋلار بويىنشا (مىسالى، مۋكوۆيستسيدوز) دارىلەردى ساتىپ الۋ ماسەلەلەرىن شەشۋ جولدارى پىسىقتالۋدا.

ءدارى-دارمەكتەردى ساتۋدا كونترافاكتىنى بولدىرماۋ ماقساتىندا "قازاقتەلەكوم" اق-مەن بىرلەسىپ ءدارى-دارمەكتەر مەن مەديتسينالىق بۇيىمداردى تاڭبالاۋدىڭ جانە باقىلاۋدىڭ پيلوتتىق جوباسىن ىسكە اسىرۋ بويىنشا ءىس-شارالار جۇرگىزىلۋدە.

پاندەميانىڭ ەكىنشى تولقىنىنا دايىندىق اياسىندا سق-فارماتسيا 5،96 ملرد تەڭگەگە 37 ءدارى-دارمەك ءتۇرىن ساتىپ الدى. ستاتسيونارلارعا جالپى قۇنى 18،1 ملرد. تەڭگە بولاتىن 91 اتاۋ جەتكىزىلدى. 10 ملن بەتپەردە، ونىڭ ىشىندە 392 ملن تەڭگەگە 500 مىڭ بالالار بەتپەردەسى ساتىپ الىندى.

ءدارىحانالار كوممەرتسيالىق ۇيىمدار رەتىندە ءدارى-دارمەكتەردى وزدەرى ساتىپ الادى. سوعان قاراماستان، پاندەميانىڭ ءبىرىنشى تولقىنىنداعى تاجىريبەنى ەسكەرە وتىرىپ، ۇكىمەت قاۋلىسىمەن "سق-فارماتسيا" جشس-نە ءارى قاراي بولشەك ساۋدا جەلىسىندە ساتۋ ءۇشىن ءدارى-دارمەكتەردى كوتەرمە ساتىپ الۋ بويىنشا وكىلەتتىك بەرىلدى. وسىلايشا، COVID-19 ەمدەۋ بويىنشا پرەپاراتتار تاپشىلىعى تۋىنداعان جاعدايدا "قاۋىپسىزدىك كوپشىگى" قالىپتاستىرىلدى.

سىبايلاس جەمقورلىققا قارسى قىزمەت "ادالدىق الاڭى" جوباسىنىڭ جەلىسى بويىنشا جۇرتشىلىقپەن بىرلەسىپ سك-فارماتسيا مەن دەنساۋلىق ساقتاۋ باسقارمالارىنىڭ قويمالارىنداعى ءدارى-دارمەكتەر مەن مەديتسينالىق بۇيىمداردىڭ قاجەتتى كولەمىنىڭ بولۋىنا مونيتورينگ جاساۋدى جالعاستىرادى. سونىمەن قوسا، باعانى نەگىزسىز قىمباتتاتۋ بولىگىندە كوممەرتسيالىق دارىحانالىق جەلىلەرى مەن امبۋلاتورلىق ءدارى-دارمەكپەن قامتاماسىز ەتۋ اياسىندا مەديتسينالىق ۇيىمدار جانىنداعى دارىحانالارعا دا مونيتورينگ جۇرگىزىلۋدە.

بەلسەندى ازاماتتاردى جۇمىلدىرۋ ارقىلى گۋمانيتارلىق كومەك جەتكىزىلۋدە. اگەنتتىكتىڭ ۇسىنىسى بويىنشا شەتەلدەن كەلگەن گۋمانيتارلىق جۇكتەردى باعىتتاۋ راسىمدەرىن جەڭىلدەتۋ ءۇشىن جاڭا ۇلگى ازىرلەندى.

اعىمداعى جىلدىڭ شىلدە ايىنان باستاپ ەلىمىزگە 10 ملن استام مەديتسينالىق بەتپەردە مەن رەسپيراتورلار، 3،6 ملن قورعانىش كوستيۋمدەرى مەن قۇرالدارى، 370 مىڭ پتر-تەستىلەر، دارىلىك زاتتارمەن قاتار 29 ءوجج اپپاراتتارى كەلدى. تاياۋدا "شەۆرون" كومپانياسىنان 400 مىڭ دانا ءبىر رەتتىك قورعانىش كوستيۋمى تۇرىندە گۋمانيتارلىق كومەك كۇتىلۋدە.

اكىمشىلىك شىعىنداردى وڭتايلاندىرۋ بولىگىندە ءۇي-جايلاردى جالداۋعا، ىسساپارلارعا، اقپاراتتىق-يميدجدىك سۇيەمەلدەۋگە جانە پوليگرافيالىق قىزمەتتەر كورسەتۋگە ارنالعان شىعىنداردى قىسقارتۋ ەسەبىنەن 239،7 ملن تەڭگە ۇنەمدەلدى.

ايتا كەتەيىك، وسىعان دەيىن "بولاشاق" حالىقارالىق باعدارلامالار ورتالىعى" اق-دا انتيكور جۇرگىزگەن تالداۋ – بيزنەس-ۇدەرىستەردى قايتا قاراۋعا، ءتيىستى شىعىنداردى وڭتايلاندىرۋعا ىقپال ەتتى. ناتيجەسىندە، مەملەكەتتىك بيۋدجەت جىل سايىن 1،3 ملرد تەڭگەگە ۇنەمدەلەتىن بولدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز