مينيستر ەلدەگى قۇس تۇماۋىنىڭ جاعدايى تۋرالى تولىعىراق ايتتى. ونىڭ ايتۋىنشا, قازاقستان 2005 جىلدان باستاپ بۇل اۋرۋدان قاۋىپسىز دەپ سانالادى.
"2020 جىلدىڭ 22 قىركۇيەگى مەن 19 قازانى ارالىعىندا جەتى وبلىستا قۇستاردىڭ ءولىمى تىركەلگەن. جەكە فەرمالاردا 26,5 مىڭ باس, ءۇش قۇس فابريكاسىندا 847,4 مىڭ باس قۇس ولگەن. بۇعان اۋرۋدىڭ راستالعان جاعدايلارى مەن اۋرۋ كۇدىگى بار ورىندار كىرەدى. وسىلايشا, جوعارى پاتوگەندى قۇس تۇماۋىنان جالپى 873,9 مىڭ باس ءولدى, بۇل جالپى قۇستار سانىنىڭ 1,9 پايىزىن قۇرايدى", دەدى وماروۆ.
ونىڭ ايتۋىنشا, قۇستاردىڭ ءولىمى باستالعاننان بەرى مينيسترلىكتە جانە ايماقتاردا جەدەل شتاب قۇرىلىپ, كۇن سايىن كەزدەسۋلەر وتكىزىلىپ تۇرادى.
"ينفەكتسيانىڭ ءار باعىتىنا كارانتين ەنگىزىلىپ, قۇستار مەن قۇس ونىمدەرىن اكەلۋگە جانە اكەتۋگە تىيىم سالىندى, جويۋ جانە دەزينفەكتسيالاۋ كەزىندە ينفەكتسيا وشاقتارىن لوكاليزاتسيالاۋ جانە جويۋ بويىنشا شارالار قابىلدانۋدا.قۇستاردى ءماجبۇرلى ۆاكتسيناتسيالاۋ ءۇشىن ۆەتەريناريالىق پرەپاراتتاردىڭ رەسپۋبليكالىق قورىنان قۇس تۇماۋىنا قارسى قوسىمشا 4,4 ميلليون دوزا ۆاكتسينا ءبولىندى", دەپ تولىقتىردى مينيستر.
وماروۆ قازىر بارلىق جەتى وبلىستاعى جەكە قوسالقى شارۋاشىلىقتاردا ءولىم توقتاتىلعانىن, ال ءۇش قۇس فابريكاسىندا قۇستاردىڭ ءولىمى ازايعانىن ايتتى.
قازىر مينيسترلىك تاراپىنان ناۋقاستاردى جويۋ جانە ولاردىڭ يەلەرىنە شىعىنداردى وتەۋ جۇمىستارى جۇرگىزىلۋدە.
