ايگۇل اسانباەۆا 47 جاستا, ول ىستىقكول وبلىسىنىڭ ءتۇپ اۋدانىندا دۇنيەگە كەلگەن. ماماندىق پەن ءبىلىمى تۋرالى ازىرگە مالىمەت جوق.
سادىر جاپاروۆ پەن ايگۇل كورشى اۋىلداردا تۇرىپ, تابيعات اياسىنداعى دەمالىستاردىڭ بىرىندە دوستارى ارقىلى كەزدەسەدى. اسانباەۆا ەسكە العانداي, ول كەزدە ءوزى 18 جاستا, ال جاپاروۆ 23 جاستا بولعان. ولار ءۇش جىلدىق دوستىقتان كەيىن شاڭىراق كوتەرىپتى.
كەيبىر دەرەككوزدەر پرەزيدەنتتىڭ بەس بالاسى بار دەپ كورسەتسە, باسقالارىندا تورتە پەرزەنتى بار دەلىنگەن. سۇحباتتاردىڭ بىرىندە بالالارى تۋرالى سۇراعاندا, اسانباەۆا ولاردىڭ ءتورت بالاسى بار ەكەنىن, بىراق ولار سادىر جاپاروۆتىڭ ءىنىسى مەن كەلىنى جول اپاتىنان قايتىس بولعاننان كەيىن ولاردىڭ ۇلىن وزدەرىمەن الىپ كەتكەنىن اتاپ ءوتتى.
بىرقاتار بۇقارالىق اقپارات قۇرالدارىنىڭ حابارلاۋىنشا, اسانباەۆا كۇيەۋىن "ساياسي قۋعىنداۋ" كەزىندە ءۇش جىل بويى بالالارىمەن بىرگە شەتەلدە تۇرعان. ولاردىڭ رەسەي مەن پولشادا تۇرعانى تۋرالى دا دەرەكتەر بار.
اسانباەۆا ءوزىنىڭ سۇحباتتارىنىڭ بىرىندە كۇيەۋىن قىرعىز-قازاق شەكاراسىندا ۇستاۋ كەزىندە قاۋىپسىزدىك كۇشتەرى ونىمەن بىرگە ۇلى رۋستامدى دا قاماۋعا العانىن, سودان كەيىن ول التى ايعا جۋىق ۋاقىتشا تەرگەۋ اباقتىسىندا وتىرعانىن ايتتى. سول ساتتە اسانباەۆا سول كەزدەگى ءبىرىنشى حانىم رايسا اتامباەۆاعا ۇلىن بوساتۋ ءۇشىن كومەك سۇراپتى.
"تانىستارىم ارقىلى مەن ءبىرىنشى حانىمعا بارىپ, ودان كومەك سۇرادىم. بىراق ول "مۇنداي سۇراقتارمەن اينالىسپايمىن", دەپ جاۋاپ بەردى... ەلىمىزدىڭ ءبىرىنشى حانىمى بولۋ باقىتى بارىنە بىردەي بەرىلمەيدى. بۇل قۇدايدىڭ بەلگىسى. سوندىقتان, ءبىرىنشى حانىم مەيىرىمدى ءارى اقىلدى بولۋ كەرەك", دەدى اسانباەۆا.
ايتا كەتەيىك, سادىر جاپاروۆ جازاسىن وتەپ جاتقان كەزدە اسانباەۆا ءوز پىكىرىن بۇقارالىق اقپارات قۇرالدارى ارقىلى اشىق ءبىلدىرىپ, ارقاشان بيلىكتىڭ وزبىرلىعىنا قارسى ءىس-شارالارعا قاتىسقان.
