بۇل رەجيسسەردىڭ فرانتسۋز كورەرمەندەرى ءۇشىن ۇلكەن ەكرانداردا كورسەتىلىپ جاتقان ەكىنشى تۋىندىسى. بۇعان دەيىن 2018 جىلى «الەمنىڭ ەركە ەنجارلىعى» ءفيلمى پروكاتقا شىعىپ, كەلەسى جىلىندا وسى ەلدە dvd-دە جارىق كورگەن بولاتىن. ەكى ءفيلمنىڭ دە كورەرمەنگە جول تارتۋىمەن فرانتسيالىق Arizona Distribution كومپانياسى اينالىستى. فرانتسۋز كورەرمەندەرى ءادىلحان ەرجانوۆتىڭ فيلمدەرىن ەرەكشە جاقسى كورەدى دەسەك ارتىق ايتقانىمىز ەمەس. كوپتەگەن حالىقارالىق جۇلدەلەردى يەلەنىپ جۇرگەن رەجيسسەردىڭ كارتينالارىن فرانتسۋز كينوسىنشىلارى وڭ باعالادى. ءبىز مۇنى ءفيلمنىڭ پروكاتقا شىعۋ قارساڭىندا فرانتسيانىڭ جەتەكشى باسىلىمدارىندا جارىق كورگەن بىرقاتار رەتسەنزيادان بايقادىق. ماسەلەن, Le Monde باسىلىمى «قاپ-قارا ادام» – مينيماليستىك ەستەتيكاسى بار دالا ۆەستەرنى مەن نۋاردىڭ قوسپاسى» دەپ جازسا, Voir A Lire كينوجۋرنالى ء«ادىلحان ەرجانوۆتىڭ كينەماتوگرافيالىق مىنسىزدىگىنە ءبىر قادام قالدى» دەپ جوعارى باعا بەرەدى.
«بۇل – وتە جوعارى كينەماتوگرافيالىق تاجىريبە. رەجيسسەردىڭ ەپيزودتى تۇسىرۋدەگى ۇقىپتىلىعى ەرەكشە. رەجيسسەر كورەرمەنگە كەدەيلىك اياسىندا اقىل مەن دەموكراتيانىڭ ورنىن سىبايلاس جەمقورلىق باسقان قوعامداعى ادامي كۇردەلى قاتىناستار تۋرالى وزىندىك پايىم قالىپتاستىرۋعا مۇمكىندىك بەرەدى. فيلمدە قاتاڭ ۇكىمدەر جوق. كەرىسىنشە, ستسەناريدەگى كۇلكىدە كەيىپكەرلەرگە اۋىر الەۋمەتتىك قىسىمدى جەڭۋگە جانە شىندىق بورىشىن وتەۋگە كومەكتەسەتىن سيپاتتاما بار», دەپ جازدى Voir A Lire باسىلىمى.
اتالعان كارتينانى تۇسىرۋگە Short Brothers (قازاقستان) جانە Arizona Productions (فرانتسيا) كومپانيالارىنىڭ قاتىسۋىمەن Astana Film Fund (قازاقستان) كومپانياسى اتسالىستى. درامالىق تريللەردە تەرگەۋشى بەكزاتتىڭ (اكتەر دانيار الشىنوۆ) باسىنان وتكەن وقيعاسى باياندالادى. فيلم جەلىسى بويىنشا تەرگەۋشى ءىستى تەز ارادا جاپقىسى كەلەدى, ويتكەنى جەرگىلىكتى پوليتسيا قىزمەتكەرلەرى جازىقسىز پۋكۋاردى (تەومان حوسە) كىنالى دەپ كەسىپ قويعان. بىراق قالادان كەلگەن جۋرناليست اريانا (دينارا باقتىباەۆا) ىسكە ارالاسىپ, بۇلاردىڭ جوسپارىن وزگەرتەدى. ەندى تەرگەۋشى العاش رەت زاڭ اياسىندا ناقتى تەرگەۋ جۇرگىزۋگە ءماجبۇر بولادى.
«قازاقستاندىق كينونىڭ ەۋروپادا پروكاتقا شىعۋى ارينە قۋانارلىق جاعداي. مەنىڭ ويىمشا, بۇل بۇكىل كوماندانىڭ جانە فيلمگە قاتىسقان بارلىق ازاماتتاردىڭ جەتىستىگى. بارشالارىڭىزدى شىن جۇرەكتەن قۇتتىقتايمىن!», دەدى ءادىلحان ەرجانوۆ.
«قاپ-قارا ادام» ءفيلمىنىڭ الەمدىك پرەمەراسى 2019 جىلدىڭ 23 قىركۇيەگىندە يسپانيادا ءوتتى. كارتينا سان سەباستيانداعى 67-ءشى حالىقارالىق كينوفەستيۆالدىڭ نەگىزگى كونكۋرستىق باعدارلاماسى اياسىندا كورسەتىلدى. San Sebastian International Film Festival – «ا» كلاسىنداعى الەمدەگى ەڭ كونە كينوفەستيۆالدەردىڭ ءبىرى (كانن, بەرلين جانە ۆەنەتسيامەن بىرگە). 2019 جىلدىڭ قاراشا ايىندا ءادىلحان ەرجانوۆ «قاپ-قارا ادام» فيلمىندەگى جۇمىسى ءۇشىن «ۇزدىك رەجيسسەر» نوميناتسياسى بويىنشا Asia Pacific Screen Awards – 2019 جۇلدەسىنە يە بولدى. ءادىلحان – ازيالىق «وسكار» سىيلىعىنا يە بولعان العاشقى قازاقستاندىق رەجيسسەر.
