مەملەكەت باسشىسى نۇرسۇلتان نازارباەۆ ىشكى ىستەر ءمينيسترى قالمۇحانبەت قاسىموۆتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
مەملەكەت باسشىسى نۇرسۇلتان نازارباەۆ ىشكى ىستەر ءمينيسترى قالمۇحانبەت قاسىموۆتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
مينيستر ەلدەگى قىلمىستىق جاعدايدىڭ جاي-كۇيى, قىلمىسقا قارسى كۇرەستى كۇشەيتۋ شارالارى جانە قوعامدىق قۇقىق ءتارتىبىن قامتاماسىز ەتۋ تۋرالى باياندادى.
قازاقستان پرەزيدەنتى جاسالعان بارلىق قۇقىق بۇزۋشىلىقتى تۇگەل تىركەۋ جانە قىلمىستىڭ الدىن الۋدىڭ جۇيەلى جۇرگىزىلۋى قاجەتتىگىنە تاعى دا نازار اۋداردى.
ءوز كەزەگىندە ق.قاسىموۆ قۇقىق بۇزۋشىلىقتىڭ بارلىق ءتۇرىن تۇگەل تىركەۋ ەسەبىنەن ولاردىڭ سانى 28%-عا ارتقانىنان حاباردار ەتتى. بۇل رەتتە كەيبىر اسا اۋىر قىلمىستىڭ – 13%-عا, كىسى ءولتىرۋدىڭ 13,5%-عا تومەندەگەنى, سونداي-اق, توناۋ مەن قاراقشىلىق دەرەكتەرىنىڭ ازايۋى بايقالعانى اتاپ ءوتىلدى.
بۇعان قوسا, مەملەكەت باسشىسى ەلىمىزدىڭ كولىك جولدارىندا اپاتتىڭ كوبەيگەنىنە جانە ونى ازايتۋ ءۇشىن شارالار قابىلداۋ قاجەتتىگىنە توقتالدى.
– بۇگىندە ەلىمىزدە جول-كولىك وقيعالارى سالدارىنان جولداردا ادامداردىڭ وپات بولۋى ءجيى ورىن الۋدا. مىسالى, جىل باسىنان بەرى جول ءجۇرۋ ەرەجەلەرىن بۇزۋدىڭ 2,5 ميلليونعا جۋىق, ماس كۇيىندە كولىك جۇرگىزۋدىڭ 26 مىڭ فاكتىسى تىركەلگەن, 2400 ادام قازا بولىپ, 80 مىڭنان استام ادام زارداپ شەككەن, – دەدى نۇرسۇلتان نازارباەۆ.
ىشكى ىستەر ءمينيسترى ۇكىمەتتىڭ بيىلعى قازان ايىنداعى كەڭەيتىلگەن وتىرىسىندا جول قاۋىپسىزدىگىن قامتاماسىز ەتۋ ماسەلەلەرى جونىندە پرەزيدەنت بەرگەن تاپسىرمالاردى ىسكە اسىرۋ بارىسى تۋرالى مالىمدەدى.
– جول ءجۇرۋ ەرەجەلەرىن بۇزعانى ءۇشىن جاۋاپكەرشىلىكتى قاتايتۋعا باعىتتالعان ءتيىستى نورماتيۆتىك قۇقىقتىق اكتىلەرگە ءوزگەرىستەر مەن تولىقتىرۋلار ازىرلەندى. مىسالى, جىلدامدىق رەجىمىن 40 كم/ساعاتتان ارتتىرعانى ءۇشىن جانە قارسى باعىتقا شىعىپ كەتكەنى ءۇشىن كولىك جۇرگىزۋ قۇقىعىنان ايىرۋ, ال ماس كۇيىندە كولىك جۇرگىزگەنى ءۇشىن 500 ايلىق ەسەپتىك كورسەتكىش تۇرىندە ايىپپۇل سالۋ, 300 ساعات قوعامدىق جۇمىسقا سالۋ نەمەسە سوت شەشىمىمەن 6 اي اكىمشىلىك قاماۋعا الۋ تۇرىندەگى جاۋاپكەرشىلىك كوزدەلەدى, – دەدى ق.قاسىموۆ.
كەزدەسۋ قورىتىندىسىندا مەملەكەت باسشىسى قۇقىق قورعاۋ قىزمەتىنىڭ تيىمدىلىگىن ودان ءارى ارتتىرۋعا, قىلمىستىق وزبىرلىقتان ازاماتتار قۇقىعىن قورعاۋ جونىندەگى شارانى كۇشەيتۋگە, ىشكى ىستەر ورگاندارىندا زاڭدىلىق پەن ءتارتىپتى نىعايتۋعا بايلانىستى بىرقاتار ناقتى تاپسىرمالار بەردى.
