بەلگىلى سىنشى امانگەلدى كەڭشىلىك ۇلى باستاعان قازىلار القاسى راحىمجان وتارباەۆتىڭ شىعارماشىلىعىن ارقاۋ ەتكەن وتىزدان استام جۇمىستى سارالاي كەلىپ, ەكى جانر بويىنشا ۇزدىكتەردى انىقتادى.
پروزا جانرى بويىنشا I ورىن – الماز مىرزاحمەتكە (1 000 000 تەڭگە), II ورىن – سەرجان سارسەنبايعا (500 000 تەڭگە), III ورىن – بالنۇر قىزىربەكقىزىنا, مارات ازىمحانعا جانە دوسبول يسلامعا (300 000 تەڭگە) بۇيىردى. ال, دراماتۋرگيا جانرى بويىنشا قازىلار القاسى تۇسكەن جۇمىستاردىڭ كوبىنىڭ ءالى دە ءبىر قايناۋى ىشىندە ەكەنىن ەسكەرە وتىرىپ, ايزات قادىراليەۆانى جەڭىمپاز دەپ تانىدى. سونداي-اق راحىمجان وتارباەۆ اتىنداعى ارنايى سىيلىق اينۇر تولەۋگە (500 000 تەڭگە) تابىستالدى.
ال ىنتالاندىرۋ سىيلىقتارىنا ا.راقىش, ا.ۇسەيىنوۆا, ا.نايمانباي, م.تولەگەنوۆ, ا.اقبولاتوۆ, ر.سۇلتانعاليەۆ, ج.ۋتەشەۆا يە بولدى.
جيىننىڭ بەتاشار ءسوزىن العان اتىراۋ وبلىسى اكىمىنىڭ ورىنباسارى باقىتگۇل حامەنوۆا:
"قازاقتا قاناتى ءبۇتىن قىران جوق, تۇياعى ءبۇتىن تۇلپار جوقتىعى انىق. وكىنىشكە قاراي, راحىمجان وتارباەۆتىڭ ومىردەن وتكەنىنە دە مىنە, ەكى جىلدان اسىپتى. قارىمدى قالامگەردىڭ جوقتاۋشىسى جوق ەمەس: تۋعان جەرى, التىن بەسىگى اتىراۋدىڭ ەل-جۇرتى راحىمجان اعامىزدىڭ مۇراسىن ۇمىتپايدى. بۇعان راحىمجان وتارباەۆ اتىنداعى حالىقارالىق تەاتر فەستيۆالىنىڭ ءوتۋى, باسقا دا شارالاردىڭ قولعا الىنۋى جانە بۇگىنگى بايقاۋ دا دالەل بولا الادى. بۇل رەتتە جازۋشىنىڭ جارى, سوڭىنداعى شىراقشىسى ساۋلە وتارباەۆانىڭ ەڭبەگىن ەرەكشە اتاپ ءوتۋ كەرەك. بۇگىنگى قورىتىندىلانىپ وتىرعان ادەبي سىن بايقاۋى دا راحىمجانتانۋدىڭ جاڭا ءبىر پاراعىن اشادى دەپ ويلايمىز. بارشا قوناقتار مەن قاتىسۋشىلارعا وبلىس اكىمى ماحامبەت جولداسقالي ۇلىنىڭ اتىنان ريزاشىلىعىمىزدى بىلدىرەمىز", دەپ, راحىمجان وتارباەۆتىڭ كەلەر جىلعى شارالارى كەڭ اۋقىمدا وتكىزىلەتىنىن اتاپ ءوتتى.
"بۇل – ءبىزدىڭ ادەبي سىن جانرىنداعى العاشقى باستاما بايقاۋىمىز. ءبىرىنشى تاجىريبە بولعان سوڭ قوبالجىدىق. كەلىپ تۇسكەن ەڭبەكتەر تۋرالى ايتاتىن بولسام, ءبىز ويلاعانداي بەلگىلى, قالىپتاسقان سىنشىلار كوپ قاتىسقان جوق. كوبىنە مەكتەپ مۇعالىمدەرى اتسالىستى. ولاردىڭ ەڭبەكتەرى سىنشىلىق دەڭگەيدەگى ەمەس, وقىرمان اسەرىندەگى عانا دۇنيە بولدى. الايدا, قاراعاندىلىق جاس جازۋشى الماز مىرزاحمەتتىڭ ماقالاسى قازىلار القاسىنىڭ كوڭىلىنەن شىعىپ, ءبىرىنشى ورىنعا بىردەن ءبىر لايىقتى دەپ سانادىق", دەگەن ساۋلە وتارباەۆا اتىراۋ وبلىسى اكىمدىگىنە زور العىسىن ءبىلدىردى.
ەلىمىزدەگى ەپيدەميولوگيالىق احۋالعا بايلانىستى ماراپاتتاۋ راسىمىنە قازىلار القاسى مەن ىنتالاندىرۋ العان جەڭىمپازدار قاتىسقان جوق. دەگەنمەن, ادەبي بايقاۋعا اتسالىسقان اۆتورلاردىڭ دەڭگەيى مەن جۇلدە العان سىن ماقالالاردىڭ ەرەكشەلىگىن قازىلار القاسىنىڭ توراعاسى امانگەلدى كەڭشىلىك ۇلىنان سۇراپ كوردىك.
"بايگەگە اتىن قوسىپ, باعىن سىناعانداردىڭ كوبى راحىمجان وتارباەۆتىڭ پروزاسىن تالداۋعا قاتتى ىقىلاس تانىتتى. جاس مولشەرىنىڭ شەكتەلۋىنە بايلانىستى ادەبيەتتە جاقسى ماقالالارىمەن كورىنىپ جۇرگەن كاسىبي سىنشىلار بايقاۋدان سىرت قالدى. ويتكەنى بۇل بايقاۋدىڭ نەگىزگى ماقساتى – جاستاردى قولداۋ بولدى. دەگەنمەن, ءوز باسىم بۇل شەكتەۋگە كەلىسە المايمىن. سىنشىلىق دەگەن ادامنىڭ وتىز-قىرىق جاسىندا عانا كاسىبي بولا باستايدى», دەپ پىكىر بىلدىرگەن امانگەلدى كەڭشىلىك ۇلى ءبىرىنشى ورىن يەگەرىنىڭ ماقالاسىنا توقتالا كەلە: "پروزالىق تۋىندىلاردى تالداعان جاقسى ماتەريالدار كوپ ءتۇستى. ادەبي سىنعا قاراعاندا كوپشىلىگى عىلىمي باعىتتا جازىلعان. دەگەنمەن, اقىلداسا كەلە الماز مىرزاحمەتتىڭ "راحىمجان وتارباەۆتىڭ "باس" رومانىنداعى ارحەتيپتىك جەلىلەر" دەگەن ماقالاسىن ەڭ ۇزدىك دەپ شەشتىك. اۆتور جازۋشى رومانىن تالداۋ ۇستىندە وتە كوپ ىزدەنگەن. مىسالى, بىزدەگى ادەبي سىندا پروفەسسيونالدىق سىن جەتىسپەيدى. مەنىڭ تاڭعالعانىم, الماز مىرزاحمەت كاسىبي تۇردە وتە جاقسى تالداعان. تاقىرىبىن جان-جاقتى ەگجەي-تەگجەيلى زەرتتەپ, روماننىڭ قۇرىلىمدىق ەرەكشەلىگىن سارالاعان. كەلەشەكتە راحاڭنىڭ شىعارماشىلىعىن الەم وقىرماندارىنا تانىستىرۋ كەرەك بولسا, الماستىڭ وسى تالداۋ ماقالاسىن شەت تىلىنە اۋدارۋ كەرەك. ءبىزدىڭ ۇلكەن كەمشىلىگىمىز – اۋدارما ماسەلەسىندە ءبىز تەك شىعارمالاردى عانا العى شەپكە قويامىز. نەگىزىندە قازاق اۆتورلارى تۋرالى سىن ماقالالاردى دا اۋدارعان ءجون دەپ بىلەمىن", دەپ قورىتىندىلادى.
ايتا كەتەيىك, شارا بارىسىندا قارجىلاي قورى 500 000 تەڭگەنى قۇرايتىن راحىمجان وتارباەۆ اتىنداعى ستيپەنديا يەگەرلەرى دە ماراپاتتالدى (باقىتگۇل سارمەكوۆا, ايجان تاباراكقىزى, سامعار تۇراربەك). سونداي-اق راحىمجان وتارباەۆتىڭ قوس كىتابى – بەرليندەگى "داگيەلي" باسپاسىنان ءھام باكۋدەن جارىق كوگەن "باس" رومانىنىڭ تۇساۋكەسەرى ءوتتى. اتالعان ادەبي شارالار 19 قازان – جازۋشى راحىمجان وتارباەۆتىڭ تۋعان كۇنى اياسىندا ۇيىمداستىرىلىپ وتىر.
