اليمەنت ءوندىرىپ الۋ تۋرالى اتقارۋشىلىق قۇجاتتاردىڭ ورىندالماۋىنا بورىشكەردىڭ تۇراقتى كىرىسىنىڭ جانە ءوندىرىلىپ الىنۋى مۇمكىن مۇلكىنىڭ جوق بولۋى, سونداي-اق جۇمىس ورىندارىنىڭ جەتىسپەۋشىلىگى اسەر ەتەدى. اسىرەسە اۋىلدىق جەرلەردەگى بورىشكەرلەردىڭ جاڭا مەكەن-جايلارىن قالدىرماي باسقا وڭىرلەرگە ۋاقىتشا تىركەۋسىز جۇمىس ىستەپ نەمەسە كاسىپ ىزدەپ كەتۋى كوپ كەزدەسەدى. سونىمەن قاتار ازعىندىق ءومىر سالتىن جۇرگىزەتىن, تۇراقتى جۇمىسقا ورنالاسقىسى كەلمەيتىن, الكوگولدى اسىرا پايدالاناتىن بورىشكەرلەر دە قارىزدى ءوندىرۋ ىسىنە كەدەرگى كەلتىرەدى.
بۇگىنگى تاڭدا قازاقستان رەسپۋبليكاسى اتقارۋشىلىق ءىس جۇرگىزۋ ورگاندارىنىڭ اۆتوماتتاندىرىلعان اقپاراتتىق جۇيەسىنىڭ مالىمەتىنە سايكەس ماڭعىستاۋ وبلىسى بويىنشا اۋماقتىق ءبولىم فيليالدارىنىڭ جانە جەكە سوت ورىنداۋشىلارىنىڭ وندىرىسىندە ورىنداۋدا اليمەنت ءوندىرۋ تۋرالى 9 270 اتقارۋشىلىق قۇجاتى بار. ونىڭ ىشىندە 5 576 اتقارۋشىلىق قۇجاتى مەرزىمدى ورىنداۋدا, ياعني بورىشكەردىڭ جالاقىسىنان وندىرىلۋدە. سونىمەن قاتار 3 012 اتقارۋشىلىق قۇجاتى بويىنشا بورىشكەرلەرمەن ەرىكتى اليمەنت تولەمدەرى تولەنۋدە.
اليمەنت ءوندىرۋ بويىنشا قيىندىق تۋدىراتىن 491 قۇجات بار. ونىڭ ىشىندە 97 اتقارۋشىلىق قۇجات بويىنشا بورىشكەردىڭ تۇرعىلىقتى مەكەن-جايى بەلگىسىز بولعاندىقتان سوت ورىنداۋشىسىمەن بورىشكەرگە ىزدەۋ سالىنىپ, اتقارۋشىلىق ءىس جۇرگىزۋلەر بورىشكەردىڭ ورنالاسقان جەرى بەلگىلى بولعان نەمەسە ونىڭ مۇلكى انىقتالعان كەزگە دەيىن توقتاتىلىپ تۇر.
بورىشكەرلەردى زاڭعا ساي تارتىپتىك جازاعا ۇسىنۋ – ءوز مىندەتىنەن جالتارعاندارعا وي سالۋدىڭ, بالا-شاعاسى الدىنداعى پارىزىن ۇعىندىرۋدىڭ ءبىر جولى بولماق. بۇل تۇرعىدا ماڭعىستاۋ وبلىسىندا 327 اتقارۋشىلىق قۇجاتى بويىنشا بورىشكەرلەر 3 ايدان اسا جيناقتالعان قارىزدار ءىشىنارا وندىرىلۋدە جانە 69 اتقارۋشىلىق قۇجاتتارى بويىنشا 35 بورىشكەردى اكىمشىلىك, 57 بورىشكەردى قىلمىستىق جاۋاپكەرشىلىككە, 18 بورىشكەردىڭ جۇرگىزۋشى كۋالىكتەرىنە ۋاقىتشا توقتاتۋ تۋرالى ۇسىنىس جولدانعان بولسا, 50 بورىشكەردىڭ ەل اۋماعىنان شىعۋىنا شەكتەۋ قويىلعان.
ءوز وتباسى الدىندا بورىشكەرلەردىڭ الەۋمەتتىك جاعدايى ءارتۇرلى بولاتىنى بەلگىلى. سوندىقتان اليمەنت وندىرۋدە ولارعا مۇمكىندىككە قاراي قولداۋ دا كورسەتىلەدى. مىسالى, وڭىردە جۇمىسسىز 491 بورىشكەرگە جۇمىسقا ورنالاسۋ تۋرالى حابارلامامەن جۇمىسپەن قامتۋ ورتالىعىنا جىبەرىلىپ, 16 بورىشكەر جۇمىسقا ورنالاستىرىلدى. سونداي-اق 385 اتقارۋشىلىق قۇجات ءوندىرىپ الۋشىلاردىڭ اليمەنت ءوندىرىپ الۋدان باس تارتۋىنا بايلانىستى قىسقارتىلعان.
ازاماتتىڭ ءوزى سانالى تۇردە ۋاقىتىمەن تولەپ, بالا تاعدىرىنا قامقور بولماعان سوڭ ءماجبۇرلى ىسكە اسىرۋ بۇل ىستە قيىندىق تۋىنداتادى. الايدا ءاربىر ازامات, ءاربىر بالا مەملەكەت قولداۋىنا يە, بالا تاعدىرى جاۋاپسىز قالمايدى, سوندىقتان اليمەنت تولەۋدىڭ قيىندىقتارىن جەڭۋ, ءوتىنىم بەرۋشىنىڭ قۇقىن قورعاۋ – ءبىز ءۇشىن باستى مىندەت.
ايزات تىلەنباەۆ,
ماڭعىستاۋ وبلىسى ادىلەت دەپارتامەنتى باسشىسىنىڭ ورىنباسارى
ماڭعىستاۋ وبلىسى
