«بارىستىڭ» قاتىسۋىمەن وتكەن كەيىنگى بەس ويىندا كوماندالار كەمىندە 5 شايبا سوعاتىنىنا ۇيرەنىپ قالعان جانكۇيەرلەر بۇل جولى تەك ءبىر عانا گولدىڭ كۋاسى بولدى. وسىلايشا ەلوردا كلۋبىنىڭ بەس ويىنعا جالعاسقان 3:2 ء(ار ماتچ وسى ەسەپپەن اياقتالىپ وتىردى) ناتيجەسىنە نۇكتە قويىلىپ, ەرەكشە ستاتيستيكانىڭ مۇرتى بۇزىلدى. «اق بارس» پەن «بارىس» اراسىنداعى كەزدەسۋ ءا دەگەننەن-اق تارتىستى باستالدى. ويتكەنى ەكى كومانداعا دا جەڭىس اۋاداي قاجەت ەدى. اسىرەسە تۋرنير كەستەسىندە تومەنگى ورىنداردا جۇرگەن قازاقستاندىق كوماندا ءۇشىن سىرت الاڭداعى جەڭىس اسا ماڭىزدى بولاتىن.
ءۇش كەزەڭ بويى ءبىر-ءبىرىن الا الماعان كوماندالار قوسىمشا ۋاقىتقا جۇگىندى. بۇعان دەيىنگى ەكى ويىندا دا قارسىلاستارىنان وۆەرتايمدا باسىم تۇسكەن «بارىس» بۇل جولى دا جۇرىسىنەن جاڭىلعان جوق. وۆەرتايمنىڭ ءبىرىنشى مينۋتى تۇگەسىلىپ جاتقاندا كوماندا كاپيتانى داررەن ديتس قارسىلاستىڭ ەكى ويىنشىسىنان سىتىلىپ ءوتىپ, اشىق تۇرعان ارىپتەسى رومان ستارچەنوعا تاماشا پاس شىعارىپ بەردى. ءوز كەزەگىندە رومان قاقپانى ءدال كوزدەپ, كومانداسىنا ماڭىزدى جەڭىس سىيلادى. قورىتىندى ەسەپ – 1:0.
