قىسقى مەزگىلدە ءۇيدى نەمەسە عيماراتتى جىلىتۋ ءۇشىن گاز جاعۋ ايرىقشا ساقتىقتى قاجەت ەتەدى. ويتكەنى گاز جاعۋ كەزىندەگى سالعىرتتىق ءورت نەمەسە ۋلانۋ قاۋپىن كۇشەيتە تۇسەدى. جىل باسىنان بەرى وڭىردە ۋلى گازدان ۋلانۋ سالدارىنان ەكى ادام جاراقات الدى. تابيعي گازبەن ۋلانۋدان قازا بولۋ سەبەبى – گاز قازاندىعىن ورناتۋ جانە پايدالانۋ كەزىندە ءورت قاۋىپسىزدىگى ەرەجەلەرىن ساقتاماۋدان تۋاتىنى بەلگىلى.
ماڭعىستاۋ وبلىسىنىڭ بارلىق ەلدى مەكەندەرى ورتالىقتاندىرىلعان گازبەن قامتاماسىز ەتىلگەن. سوندىقتان گازدى قولدانۋ ەرەجەلەرىن ۇيرەتىپ, ساقتىق شارالارىن ساقتاۋدى تالاپ ەتۋ وبلىس بويىنشا جۇرگىزىلۋى ءتيىس. وبلىستىق توتەنشە جاعدايلار دەپارتامەنتى قىزمەتكەرلەرى ءورتتىڭ الدىن الۋ جانە ادامداردىڭ ۋلى گازبەن ۋلانۋدان قازا بولۋى مەن جاراقاتتانۋىن بولدىرماۋ ماقساتىندا حالىقپەن تۇراقتى تۇردە ءورت قاۋىپسىزدىگى قاعيدالارىن ءتۇسىندىرۋ جۇمىستارى جۇرگىزىلەدى. بۇل – جىلىتۋ ماۋسىمىنا دايىندىق كەزەڭىنىڭ باسىم باعىتتارىنىڭ ءبىرى. دەپارتامەنت جەرگىلىكتى اتقارۋشى ورگاندارمەن بىرلەسىپ, حالىقتىڭ الەۋمەتتىك وسال توپتارىنىڭ 3 مىڭنان استام ءۇيىن ەسەپكە الدى, ونىڭ ىشىندە بارلىق ۇيلەر اۋلالاردى ارالاۋمەن قامتىلدى.
– رەيدتەر ناتيجەسىندە 648 ۇيدە 749 ءورت قاۋىپسىزدىگى تالاپتارىن بۇزۋ انىقتالدى. ايتا كەتۋ كەرەك, بۇعان دەيىن بۇزۋشىلىقتار انىقتالعان ۇيلەر اعىمداعى جىلدىڭ 1 قاراشاسىنا دەيىن قايتا تەكسەرىلىپ, 398 ءۇي قامتىلدى. ال حالىقتىڭ الەۋمەتتىك وسال توپتارىنىڭ تۇرعىن ۇيلەرىن قوسپاعاندا, دەپارتامەنت قىزمەتكەرلەرى 8 مىڭنان استام ادامدى قامتي وتىرىپ, 3 مىڭنان استام اۋلانى ارالاپ شىقتى. ءورت كەزىندە دۇرىس مىنەز-ق ۇلىق داعدىلارىن دامىتۋ ماقساتىندا 240 وقۋ ورنىندا 14 مىڭنان استام وقۋشىنى قامتي وتىرىپ, 28 ينتەراكتيۆتى جانە اشىق ساباق وتكىزىلدى, – دەيدى وبلىستىق توتەنشە جاعدايلار دەپارتامەنتىنىڭ باسشىسى قۋانار بازارباەۆ.
جۇمىس اۋداندار مەن قالالاردا جالعاسىن تابۋدا. ماڭعىستاۋ اۋدانى توتەنشە جاعدايلار ءبولىمىنىڭ №8 ءوسب جەكە قۇرامى «قازترانسگازايماق» قىزمەتكەرلەرىمەن بىرلەسە جىلىتۋ ماۋسىمىنىڭ باستالۋىنا بايلانىستى شەتپە اۋىلىنىڭ ىرگەسىندەگى اششىبۇلاق اۋىلىندا ورنالاسقان تۇرعىن ۇيلەرگە «قازاقستان-اقتاۋ تەلەارناسىنىڭ» قاتىسۋىمەن ءورت قاۋىپسىزدىگىن ساقتاۋ ماقساتىندا ءتۇسىندىرۋ جۇمىستارىن جۇرگىزدى. پروفيلاكتيكالىق جۇمىس بارىسىندا 2 072 ادامدى قامتيتىن 441 تۇرعىن ءۇيدى ارالاپ, بىرقاتار قاتەلىكتەردى انىقتادى. مىسالى, 31 ۇيدە جىلىتۋ پەشتەرى ءۇيدىڭ ىشىندە ورنالاسقان بولسا, 14 ۇيدە اۋا اينالاتىن جەلدەتكىشتىڭ بولماۋى, 21 ۇيدە جىلىتۋ پەشتەرىنىڭ قاسىندا جانعىش زاتتار قويۋعا جول بەرىلگەنى سىندى 66 بۇزۋشىلىق انىقتالدى.
ءتۇسىندىرۋ جۇمىستارى كەزىندە تجب قىزمەتكەرلەرى, جىلۋ پەشتەرىنىڭ دۇرىس ورنالاسۋى قاجەتتىگىن, بالالاردى جالعىز قالدىرماۋ كەرەكتىگى جونىندە, ەلەكتر قۇرىلعىلارىن پايدالانۋ كەزىندەگى ءورت قاۋىپسىزدىگى ەرەجەلەرىن, وڭىردەگى كوپ تارالعان ءورتتىڭ شىعۋ سەبەپتەرى جانە ونىڭ سالدارىن كورسەتە وتىرىپ, ءورت قاۋىپسىزدىك تالاپتارىن ساقتاۋ قانشالىقتى ماڭىزدى ەكەنىن ءتۇسىندىردى. «ساقتىقتا قورلىق جوق» دەگەندەي, قاۋىپسىزدىك شارالارىن الدىن الا جۇرگىزىپ, ساقتانا بىلگەنگە نە جەتسىن؟!
ماڭعىستاۋ وبلىسى
