س.جەەنبەكوۆ 15 قازان كۇنى قىرعىزستان ازاماتتارىنا ەلدەگى قالىپتاسقان قوعامدىق-ساياسي جاعدايعا بايلانىستى ۇندەۋ جاسادى. وندا پرەزيدەنت ساياسي احۋالدىڭ تۇراقتانباعانىنا بايلانىستى وسىنداي شەشىمگە كەلگەنىن مالىمدەدى.
«ەلىمىزدىڭ استاناسى بىشكەك قالاسىندا قوعامدىق-ساياسي جاعداي كۇردەلى بولىپ وتىر. كەشە جوعارعى كەڭەس ۇكىمەت قۇرامىن بەكىتتى, مەن قىرعىز رەسپۋبليكاسى پرەزيدەنتىنىڭ ءتيىستى تاعايىنداۋلار تۋرالى جارلىعىنا قول قويدىم. بىراق بۇل شيەلەنىسكەن جاعدايدى قالپىنا كەلتىرمەدى. وكىنىشكە قاراي, اگرەسسيا ازايماعان. مەنىڭ تەز ارادا وتستاۆكاعا كەتۋىمدى تالاپ ەتىپ جاتىر. قازىرگى جاعداي ەكىجاقتى قاقتىعىسقا جاقىن. ءبىر جاعىنان – نارازىلىق بىلدىرۋشىلەر, ەكىنشى جاعىنان – قۇقىق قورعاۋشىلار. اسكەري قىزمەتكەرلەر مەن قۇقىق قورعاۋ ورگاندارى مەملەكەتتىك رەزيدەنتسيانى قورعاۋ ءۇشىن قارۋ قولدانۋعا مىندەتتى. مۇنداي جاعدايدا قان توگىلەتىنى ءسوزسىز. مەن ەكى تاراپتى دا ارانداتۋشىلىققا بەرىلمەۋگە شاقىرامىن», دەدى س.جەەنبەكوۆ.
سونداي-اق ول قىرعىزستانداعى بەيبىتشىلىك, ەل بۇتىندىگى, حالىقتىڭ بىرلىگى مەن قوعامداعى تىنىشتىقتى بارىنەن جوعارى قوياتىنىن جەتكىزدى. سوندىقتان وسىنداي قادامعا بارىپ وتىرعانىن ايتتى.
«مەن ءۇشىن ءاربىر وتانداسىمنىڭ ومىرىنەن اسقان ەشتەڭە جوق. مەن بيلىككە تالاسپايمىن. قىرعىزستان تاريحىندا ءوز ازاماتتارىنا وق جاۋدىرىپ, قان توككىزگەن پرەزيدەنت رەتىندە قالعىم كەلمەيدى. سوندىقتان مەن وتستاۆكاعا كەتۋ جونىندە شەشىم قابىلدادىم. جاپاروۆ پەن باسقا ساياساتكەرلەردەن ءوز جاقتاستارىن ەل استاناسىنان الىپ كەتىپ, بىشكەك تۇرعىندارىنا بەيبىت ءومىردى قايتارىپ بەرۋدى سۇرايمىن. ەشقانداي بيلىك ەلىمىزدىڭ بۇتىندىگى مەن قوعامداعى تاتۋلىقتان ارتىق ەمەس» دەلىنگەن ۇندەۋدە.
ەستەرىڭىزدە بولسا, 4 قازاندا قىرعىزستاندا پارلامەنتتىك سايلاۋ وتكەن-ءدى. داۋىس بەرۋدىڭ قورىتىندىسىنا سايكەس, پارلامەنتكە 4 پارتيا ءوتىپ, «بيريمديك» پارتياسى – 46, «مەكەنيم كىرگىزستان» پارتياسى – 45, «كىرگىزستان» پارتياسى – 16, ء«بۇتۇن كىرگىزستان» پارتياسى 13 دەپۋتاتتىق ماندات يەلەنگەن-ءدى. بىراق وپپوزيتسيالىق پارتيالار سايلاۋ ناتيجەسىمەن كەلىسپەيتىنىن ءبىلدىرىپ, ميتينگكە شىقتى. وسىلايشا «الاتاۋ» الاڭىنا جينالعاندار اۋەلى داۋىس بەرۋ قورىتىندىسىن جوققا شىعارىپ, قايتادان سايلاۋ وتكىزۋدى تالاپ ەتكەن. 5 قازان كۇنى نارازىلار پرەزيدەنت رەزيدەنتسياسىن باسىپ الدى.
شەرۋشىلەردىڭ ءبىر توبى ۇلتتىق قاۋىپسىزدىك مەملەكەتتىك كوميتەتىنىڭ عيماراتىنا شابۋىل جاساپ, تەرگەۋ يزولياتورىندا جاتقان بۇرىنعى پرەزيدەنت المازبەك اتامباەۆتى شىعاردى. سونداي-اق تاڭ اتقانعا دەيىن تۇرمەدە جاتقان بۇرىنعى پرەمەر-مينيستر ساپار يساكوۆتى, بۇرىنعى دەپۋتات سادىر جاپاروۆتى بوساتىپ الدى.
ەلدەگى بەي-بەرەكەتسىزدىك مۇنىمەن بىتكەن جوق. الاڭعا اتويلاپ شىققان ايىر قالپاقتى اعايىن مەملەكەتتىك م ۇلىكتى تالان-تاراجعا سالۋعا دا كىرىسىپتى. مۇنداي بەيباستىق جالعاسا بەرەر مە ەدى, كەيىنىرەك ەرىكتىلەر توناۋشىلارعا قارسى توپ قۇرىپ, ماڭىزدى نىسانداردى قورعاۋعا الدى.
سونداي-اق وسى كۇنى جوعارعى كەڭەستىڭ دەپۋتاتتارى ەكىگە ءبولىنىپ, جيىندارىن وتكىزدى. ولاردىڭ ءبىر توبى جوعارعى كەڭەستىڭ سپيكەرى داستانبەك جۇمابەكوۆتىڭ, ۇكىمەت باسشىسى كۋباتبەك بورونوۆتىڭ ءوز ىقتيارىمەن قىزمەتىنەن بوساتۋ تۋرالى ءوتىنىشىن قابىل الىپ, جوعارعى كەڭەستىڭ توراعاسى ەتىپ بۇرىنعى دەپۋتات مىقتىبەك ابدىلداەۆتى, ۇكىمەت باسشىسى ەتىپ سادىر جاپاروۆتى تاعايىندادى. كەيىنىرەك جوعارعى كەڭەستىڭ توراعاسى بولىپ قانات يساەۆ سايلاندى.
دەگەنمەن كەيىنىرەك س.جاپاروۆتىڭ پرەمەر-مينيستر لاۋازىمىنا سايلانۋى زاڭسىز ەكەنىن العا تارتقاندار كوپ بولدى. ويتكەنى پارلامەنت وتىرىسىندا قاجەتتى كۆورۋم جينالماعان. 14 قازاندا دەپۋتاتتاردىڭ كەزەكتى وتىرىسى ءوتتى. وندا جاپاروۆتىڭ ۇكىمەت باسشىسى لاۋازىمىنا كانديداتۋراسى ماقۇلداندى. بەكىتۋ تۋرالى قاۋلى پرەزيدەنتكە جىبەرىلىپ, وعان س.جەەنبەكوۆ قول قويدى.
ال 15 قازاندا س.جاپاروۆ پرەزيدەنت لاۋازىمىن ۋاقىتشا اتقارۋ مىندەتىن ءوز موينىنا العانىن حابارلادى. ول بۇل ءسوزىن ۇكىمەت ءۇيى جانىنداعى ميتينگىگە قاتىسۋشىلارمەن كەزدەسۋدە ايتتى.
«پرەزيدەنت سوورونباي جەەنبەكوۆ وتستاۆكاعا كەتۋ تۋرالى ءوتىنىش جاسادى. جوعارعى كەڭەس سپيكەرى قانات يساەۆ تا پرەزيدەنت مىندەتىن اتقارۋدان باس تارتىپ, ول دا ءوتىنىش جازدى. پرەزيدەنتتىڭ جانە پرەمەر-ءمينيستردىڭ قۇزىرەتى ماعان وتەدى», دەدى س.جاپاروۆ.
وسى ورايدا قازاقستاننىڭ سىرتقى ىستەر ءمينيسترى مۇحتار تىلەۋبەردى كورشى ەلدەگى جاعدايعا قاتىستى مالىمدەمە جاساپ, ونداعى جاعدايدىڭ تۇراقتالىپ كەلە جاتقانىنا ريزاشىلىق ءبىلدىردى.
«كورشى مەملەكەتتەگى وقيعالاردى تەك قانا ىشكى ماسەلەسى رەتىندە قاراستىرا وتىرىپ, جاڭادان قۇرىلعان ۇكىمەتتى قازىرگى كۇردەلى ساياسي جاعدايدا ءوز ارەكەتتەرىن تۇراقتىلىق, قۇقىق ۇستەمدىگى, قوعامدى بىرىكتىرۋ, ەكونوميكالىق دامۋ ءۇشىن جاعداي جاساۋعا باعىتتاۋعا شاقىرامىز. ەلدىڭ بارلىق ساياسي كۇشتەرىنىڭ قىرعىز رەسپۋبليكاسى كونستيتۋتسياسىنىڭ نورمالارى مەن قاعيداتتارىن قاتاڭ ساقتاي وتىرىپ, داعدارىس جاعدايىنان ابىرويمەن شىعۋعا مۇمكىندىك بەرەتىن سالماقتى جانە ىسكەر شەشىمدەردى ىزدەۋگە بار كۇش-جىگەرىن جۇمسايتىنىنا ءۇمىت ارتامىز» دەلىنگەن حابارلامادا.
الدىن الا ەسەپتەۋ بويىنشا, قىرعىزستانداعى ساياسي تۇراقسىزدىق سالدارىنان 10 قازانداعى شىعىن كولەمى 8 ملرد سومدى قۇرادى نەمەسە بۇكىل ەل بويىنشا 104 ملن دوللارعا جۋىق كىرىستەن قاعىلدى. مۇنداي دەرەكتەردى قىرعىزستان بيزنەس-قاۋىمداستىعى ۇلتتىق اليانسى ۇسىنىپ وتىر.
ساراپشىلاردىڭ پىكىرىنشە, شامامەن 210 ملن دوللاردى قۇرايتىن جيىرمادان استام كەلىسىمشارت پەن بيزنەس-جوبالاردان قاعىلعان. ساياسي تۇراقسىزدىق سالدارىنان ميللياردتاعان سوم جوعالتىپ, جۇمىسسىزدىق, سالىقتار مەن تولەمدەر جوسپارى كوبەيىپ, ەلدىڭ الەۋمەتتىك-ەكونوميكالىق جاعدايى ناشارلاۋى مۇمكىن.
