جۋىردا Almaty Film Days شەڭبەرىندە «ستريمينگ پلاتفورمالارىنداعى قازاقستاندىق كونتەنت: مۇمكىندىكتەرى مەن كەلەشەگى» اتتى دوڭگەلەك ۇستەل ءوتتى. ۇلتتىق كينونى قولداۋ مەملەكەتتىك ورتالىعى مەن تمد-داعى ەڭ ءىرى IVI ونلاين كينوتەاترىمەن بىرلەسىپ ۇيىمداستىرعان جيىندا ستريمينگ پلاتفورمالارىنداعى قازاقستاندىق فيلمدەرگە سۇرانىستىڭ ارتۋى ماسەلەسى جان-جاقتى تالقىلاندى. وتاندىق كورەرمەندەر شەتەلدىك كينونى اقىلى پلاتفورمالاردا كورۋگە داعدىلانعان بولسا, ال جەرگىلىكتى كينو ونىمدەردى كورۋ ءۇشىن كينوتەاترلىق پروكات, YouTube نەمەسە پيراتتىق پلاتفورمالار سەكىلدى اشىق الاڭدارعا جۇگىنىپ جاتادى.
دوڭگەلەك ۇستەلدىڭ باستى سپيكەرلەرى رەتىندە «ۇكقمو» كەاق باسقارما توراعاسىنىڭ ءوندىرىس بويىنشا ورىنباسارى ايدار باتالوۆ, IVI كومانياسىنىڭ كونتەنت بويىنشا ديرەكتورى ماريا گرەچيشنيكوۆا, Terraline كومپانياسىنىڭ باس ديرەكتورى الىبەك سارسەمباەۆ جانە «100% Qazaqsha» كومپانياسىنىڭ ديرەكتورى ءاليا مۇقاشەۆا ءسوز سويلەدى.
ايدار باتالوۆ بۇگىنگى كۇنى كينو كورەرمەندەرىنىڭ ادەتتەرى ايتارلىقتاي وزگەرگەنىن جانە كينوتەاترلىق پروكاتتىڭ كەلەشەگى كۇماندى ەكەنىن ەسكەرە وتىرىپ, ستريمينگ پلاتفورمالارىمەن ديالوگ ورناتۋدىڭ ماڭىزدىلىعىن اتاپ ءوتتى. سونداي-اق كينو ورتالىعىنىڭ 50-دەن استام جوبامەن جۇمىس ىستەپ جاتقانىن, ونىڭ ىشىندە تەك قازاقستاننىڭ عانا ەمەس, وزگە دە ەلدەردىڭ قىزىعۋشىلىعىن تۋعىزعان قاناعات ءمۇستافيننىڭ «قاجىمۇقان», اقان ساتاەۆتىڭ «بوكسەر» فيلمدەرى بار ەكەندىگىن اتاپ ءوتتى.
ال ماريا گرەچيشنيكوۆانىڭ ايتۋىنشا, IVI پلاتفورماسىندا وتكەن بىرقاتار قازاقستاندىق كارتينالار رەسەيلىك نارىقتا ءوز كورەرمەندەرىن تاۋىپ ۇلگەرگەن. ول تمد-داعى ەڭ ءىرى ونلاين كينوتەاتر سانالاتىن IVI پلاتفورماسىنىڭ تاۋەلسىز كينو كومپانيالار مەن ەلدىڭ ءىرى تەلەارنالارىن قوسا العاندا, وتىزدان استام قازاقستاندىق وندىرۋشىلەرمەن ارىپتەستىك قارىم-قاتىناستا ەكەنىن جانە قازاقستاندىق فيلمدەر مەن سەريالداردىڭ ۇسىنىسىن ۇنەمى ارتتىرىپ وتىراتىنىن ايتتى.
الەمدىك ستريمينگ پلاتفورمالارى وزدەرىنىڭ بىرەگەي كونتەنتىن ءوندىرۋ ەسەبىنەن جازىلۋشىلاردىڭ سانىن ارتتىرۋعا باعىت العانىن ەسكەرە وتىرىپ, ونلاين الاڭدا رەليز جاساۋعا باعىتتالعان فيلمدەر مەن سەريالداردى بىرلەسىپ شىعارۋ بويىنشا قازاقستاندىق كينو وندىرۋشىلەردىڭ IVI-مەن ىنتىماقتاستىق ورناتۋ مۇمكىندىكتەرى دە كوتەرىلدى. بۇل رەتتە ايدار باتالوۆ پەن ماريا گرەچيشنيكوۆا IVI ءوندىرىس ءبولىمى قازاقستاندىق جانە رەسەيلىك كورەرمەندەرگە بىردەي قىزىقتى بولاتىن جوبالارعا وتىنىمدەردى قاراۋعا دايىن ەكەندىگىن مالىمدەدى.
رەسەيلىك ستريمينگ پلاتفورمالارىمەن ىنتىماقتاستىق ورناتۋ ماسەلەسىنەن باسقا, دوڭگەلەك ۇستەل بارىسىندا ءتۇرلى ونلاين-پلاتفورمالار ارقىلى كينوكونتەنتتى زاڭدى تۇردە ساتۋدىڭ ىشكى نارىعى تالقىلاندى. سونداي-اق كينو ورتالىعىنىڭ الداعى جوسپارىندا ءۇشىنشى پيتچينگ وتكىزۋ تۇرعاندىعى, ونداعى ماقسات ۇلكەن كوممەرتسيالىق الەۋەتى بار جوبالاردى ىرىكتەۋ ەكەندىگى دە قاپەرگە الىندى. بۇل ءوز كەزەگىندە تەك كينوتەاترلار ءۇشىن عانا ەمەس, ستريمينگ-پلاتفورمالار ءۇشىن دە جاڭا مۇمكىندىكتەر بەرەدى.
