كاسىپورىننىڭ ەرەكشەلىگى – ەكولوگياعا زيان كەلتىرمەيتىن ءوندىرىس تسيكلى جاسالعان, بالىققا ارنالعان ازىق پەن وتىرعىزۋ ماتەريالدارى كەشەننىڭ ءوز ىشىندە دايىندالادى. جوبا ازاماتتاردىڭ ءومىر ساپاسىن جاقسارتۋ فاكتورى رەتىندە قر وندىرىستىك قاۋىپسىزدىك باعدارلاماسىنا تولىق سايكەس كەلەدى.
باق وكىلدەرى كاسىپورىندى ارالاپ, افريكالىق كلاريۋس, تيلاپيا جانە اۆستراليالىق قىزىل شىمشۋىرلى شاياندى جابىق سۋدا ءوسىرۋ پروتسەسىمەن تانىستى. نارىققا شىعارىلاتىن قايتا وڭدەلگەن بالىق ونىمدەرى كورسەتىلدى.
كاسىپورىن باسشىسى الەكسەي ششەتينين زاۋىتتىڭ قۋاتى جىلىنا ءتىرى جانە قاتىرىلعان 10 مىڭ توننا بالىق وندىرۋگە جەتەتىنىن اتاپ ءوتتى. زاۋىتتىڭ ەرەكشەلىگى سول, باسسەيندە بالىقتى 6 ايدا دەرناسىلدەن باستاپ 1 كگ تاۋارلىق سالماققا دەيىن ءوسىرىپ, 1 جىلدا ەكى رەت ءونىم الۋعا بولادى.
"قازىر ۇكىمەت حالىقتىڭ كوبىرەك بالىق ونىمدەرىن تۇتىنۋىنا كوڭىل بولۋدە. بۇل ءوندىرىس قۋاتىن ارتتىرۋعا اسەرىن تيگىزەدى. ءتىرى بالىقتى دا, قايتا وڭدەلىپ ۇزاققا ساقتاۋعا ارنالعان ءونىمدى دە كوبەيتۋ كەرەك. ءبىز وندىرىسكە اكۆامادەنيەتتىڭ 10-عا جۋىق زاماناۋي ءتۇرىن ەنگىزدىك. ءمارمار كلاريۋسىن, تيلاپيا جانە اۆستراليالىق شايان وسىرۋدەمىز. بيىل 2000 توننا ءونىم وتكىزۋدى جوسپارلاعانبىز. پاندەمياعا جوسپارىمىزعا ازداپ وزگەرىس ەنگىزدى", دەدى ا.ششەتينين.
ونىڭ ايتۋىنشا, 70 ادام جۇمىس ىستەيتىن زاۋىتتا قولدانىلاتىن زاماناۋي تەحنولوگيالار مەن كۇن سايىن سۋدىڭ ساراپتاماسىن جاسايتىن زەرتحانا ءونىمنىڭ ەكولوگيالىق تازا بولۋىن قامتاماسىز ەتەدى.
ء"ونىم ساتىلماس بۇرىن وزىمىزدە جانە قالاداعى زەرتحانادا تەكسەرىلەدى. جەمدى قازاقستاندا جاسالعان تازا ينگرەديەنتتەردەن ءوزىمىز دايىندايمىز", دەدى ول.
مامان قازاقستان سۋ رەسۋرستارىندا جىل سايىن 600 مىڭ توننا بالىق ءوسىرۋ ءۇشىن اكۆامادەنيەتتى قارقىندى دامىتۋ قاجەت دەپ سانايدى.
"بۇگىنگى تاڭدا ۇكىمەت ءار ايماقتا بالىق شارۋاشىلىعى بويىنشا نەگىزگى پروبلەمالار مەن ۇسىنىستاردى جيناۋدا. سونىڭ نەگىزىندە بالىق وندىرۋشىلەردى قولداۋ بويىنشا زاڭدارعا وزگەرىس ەنگىزىلۋ كەرەك. ايتا كەتەتىن ءبىر پروبلەما – سالادا مامان جەتىسپەيدى. ءبىز ءوز قىزمەتكەرلەرىمىزدى شەتەلدە وقىتتىق. ەندى ينستيتۋتتارمەن بىزدە جاستاردىڭ تاجىريبە الماسۋى جونىندە, بىرلەسە مامان دايىنداۋ بويىنشا كەلىسىپ جاتىرمىز", دەپ ايتتى كاسىپورىن باسشىسى.
كاسىپورىن ونىمدەرى ىشكى نارىقتان بولەك رەسەيگە ەكسپورتتالادى.
"قازاقستاندىق ءونىم تابيعي تازا, حيميالىق قوسپاسى جوق بولعاندىقتان رەسەي جوعارى باعالايدى. سوندىقتان حالىقارالىق نارىقتا دا ۇيالماي ماقتانا الامىز. بالىقتىڭ 15 ءتۇرلى ءونىمىن دايىندايمىز. كلاريۋستىڭ ەرەكشەلىگى – ونى اللەرگياسى بار ادامدارعا دا جەۋگە بولادى. پاندەميا كەزىندە كوروناۆيرۋسپەن اۋىرعان ادامدار جاتقان اۋرۋحانالاردىڭ راتسيونىنا ەنىپ, ءبىز بالىق جەتكىزىپ تۇردىق", دەپ اتاپ ءوتتى كاسىپورىننىڭ قوعاممەن بايلانىس مەنەدجەرى ەلەنا پروتسەنكو.
ەسكە سالساق, مەملەكەت باسشىسى قاسىم-جومارت توقاەۆ حالىققا جولداۋىندا بالىق شارۋاشىلىعىنا ەرەكشە ءمان بەرۋ كەرەكتىگىن ايتقان. 2019 جىلى ەلىمىزدىڭ بالىق جانە بالىق ونىمدەرى نارىعىنىڭ جالپى كولەمى 66 مىڭ توننانى قۇرادى. قازاقستانداعى سۋ رەسۋرستارى 600 مىڭ تونناعا دەيىن بالىق ءوسىرىپ, ەكسپورتتى 10 ەسەگە ارتتىرۋعا مۇمكىندىك بەرەدى.
سول سەبەپتى قازىر ەكولوگيا مينيسترلىگى شارۋالاردى قولداۋ ماقساتىندا بىرقاتار زاڭدارعا وزگەرىس ەنگىزىپ, سۋبسيديا بەرۋ جولدارىن قاراستىرىپ جاتىر.
