ەكى تۋرنيردە ءتورت التىن

جاقىندا قازاقستان قۇراماسىنىڭ بوكسشىلارى تۇركيا مەن قىتايدا وتكەن حالىقارالىق تۋرنيرلەردەن كەلدى. ىستامبۇل قالاسىندا ەرلەر جانە ايەلدەر اراسىندا “پرەمەر-مينيستر” باسەكەسىنە قاتىسقان بىلعارى قولعاپ شەبەرلەرىمىز 2 التىن, 1 كۇمىس, 4 قولا مەدالدى ەنشىلەسە, گۋيانگ قالاسىندا “چاينا وۋپەن” تۋرنيرىندە كۇش سىناس­قان بوكسشىلارىمىز 2 التىن, 2 كۇمىس جانە 3 قولا مەدال­دى جەڭىپ الدى. قىتايدا 3-11 ءساۋىر ارالىعىندا وتكەن سىندا قولعاپ تۇيىستىرگەن 20 ەلدىڭ 102 بوكسشىسى اراسىندا مەيىرجان راقىمجانوۆ (54 كگ), مانات ومىرزاقوۆ (69 كگ) باس جۇلدەنى يەلەنسە, ءىلياس سۇلەيمەنوۆ (48 كگ) پەن نيساي بايماتوۆ (75 كگ) كۇمىس مەدالدى, ال عاني جايلاۋوۆ (60 كگ), باتىرجان جۇكەنباەۆ (64 كگ), مارات قياسوۆ (81 كگ) قولا جۇلدەنى قاناعات تۇتتى. تۇركيادا 6-12 ءساۋىر كۇندەرى وتكەن تۋرنيردە ەرلەر اراسىندا ماردان بەرىكباەۆ (48 كگ), رۇستەم سىباەۆ (69 كگ), يۆان دىچكو (91 كگ-دەن جوعارى) قولا مەدالدى ەنشىلەسە, ايەلدەر اراسىندا نازگۇل بورانباەۆا (48 كگ) مەن جۇلدىز ماماتقۇلوۆا (81 كگ) قۇرمەت تۇعىرىنىڭ ەڭ بيىك ساتىسىنان كورىندى. ال سايدا قاسەنوۆا (64 كگ) كۇمىس جۇلدەنى, نازىم قازىباي (46 كگ) قولا مەدالدى مويىندارىنا تاقتى. ەندى قازاقستان قۇراماسىنىڭ ەرلەر جانە ايەلدەر كومانداسى 20-25 ءساۋىر ارالىعىندا پولشانىڭ ۆارشاۆا قالاسىندا وتەتىن ءححVىى ءداستۇرلى “فەليكس ستامم” حالىقارالىق تۋرنيرىنە قاتىسادى. تۋرنير ءاىۆا ەرەجەسى بويىنشا ەرلەر اراسىندا 11 سالماق دارەجەسى, ال ايەلدەر اراسىندا 48-51 كگ, 56-60 كگ جانە 69-75 كگ سالماق دارەجەلەرىندە وتەدى. بۇل باسەكەگە ۇلتتىق قۇراما ساپىندا ەرلەر اراسىندا ءبىرجان جاقىپ (48كگ), دانيار تولەگەنوۆ (54 كگ), دانيار ەلەۋسىنوۆ (64 كگ), سەرىك ساپيەۆ (69 كگ), نۇرداۋلەت جارمانوۆ (75 كگ) پەن رۇستەم ىرگەباەۆ (91 كگ-دەن جوعارى) قاتىسادى. بۇدان كەيىن جاستار اراسىنداعى ۇلتتىق قۇراما 20 ءساۋىر مەن 2 مامىر ارالىعىندا ءازىربايجاننىڭ استاناسى – باكۋ قالاسىندا وتەتىن الەم چەمپيوناتىندا كۇش سىناسادى. كوماندانىڭ اعا باپكەرى نازار ءىلياسوۆ باستايتىن چەمپيوناتقا جاستارىمىز ەكى قۇراممەن بارادى. ەستەرىڭىزگە سالا كەتسەك, مۇنىڭ الدىندا يراننىڭ استاناسى – تەھران قالاسىندا وتكەن ازيا چەمپيوناتىندا جاستار قۇراماسى 4 التىن, 1 كۇمىس جانە 2 قولا مەدال جەڭىپ العان بولاتىن.