تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات ءمۋسيننىڭ تۇرىك عارىش اگەنتتىگىنىڭ پرەزيدەنتى سەردار يىلدىرىممەن كەزدەسۋى بارىسىندا ەلدەردىڭ عارىش سالاسىن دامىتۋ جانە وسى سالاداعى ىنتىماقتاستىق ماسەلەلەرى تالقىلاندى.
تۇرىك دەلەگاتسياسى نۇر-سۇلتان قالاسىنداعى ۇلتتىق عارىش ورتالىعىندا بولىپ, جەردى قاشىقتىقتان زوندتايتىن قازاقستاندىق سپۋتنيكتەردىڭ جۇمىسىمەن تانىستى.
جۇمىس كەزدەسۋى بايقوڭىر قالاسىندا جالعاستى. تۇرىك عارىش اگەنتتىگى دەلەگاتسياسىنىڭ مۇشەلەرى كوسموناۆتيكا تاريحىنىڭ قالالىق مۇراجايىنا بارىپ, عارىش ايلاعىنىڭ نىساندارىن ارالاپ, «سويۋز مس-17» باسقارىلاتىن جۇك كەمەسىمەن «سويۋز-2.1 ا» تاسىمالداعىش-زىمىراننىڭ ۇشىرىلىمىن تاماشالادى.
كەلىسسوزدەر قورىتىندىسى بويىنشا قازعارىش پەن تۇرىك عارىش اگەنتتىگى عارىش سالاسىنداعى ەكىجاقتى ىنتىماقتاستىققا باعىتتالعان ءوزارا تۇسىنىستىك تۋرالى مەموراندۋمعا قول قويدى.
قۇجاتقا قول قويىلعاننا كەيىن تۇرىك عارىش اگەنتتىگىنىڭ پرەزيدەنتى سەردار يىلدىرىم مەن قر تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى اەروعارىش كوميتەتىنىڭ توراعاسى باۋبەك ورالماعامبەتوۆ: «بۇل قۇجات ەكى ەلدىڭ عارىش مەكەمەلەرى مەن كاسىپورىندارى اراسىنداعى تاجىريبەلىك ىنتىماقتاستىقتى باستاۋعا مۇمكىندىك بەرەدى», - دەپ اتاپ ءوتتى.
