«بۇعان دەيىن 3 بالاسى بار 23 جاستاعى ەركىناي ەسەنباەۆا دۇنيەگە ۇشەم اكەلىپ, كوپبالالى انالاردىڭ قاتارىنا قوسىلعانى تۋرالى اقپاراتتى ءباسپاسوز قۇرالدارىنان بىلدىك. سونداي-اق بالا تۋعا بايلانىستى مەملەكەتتىك قىزمەتتەردى راسىمدەۋگە ۇشەمنىڭ اتا-اناسىنىڭ ۋاقىتى بولماي جۇرگەندىگىن ەستىسىمەن, بىردەن حابارلاسىپ, ءوز كومەگىمىزدى ۇسىندىق. ارنايى شالعاي وڭىرلەرگە قىزمەت كورسەتۋگە ارنالعان ءموبيلدى حقو-نىڭ قىزمەتكەرلەرىن جىبەرىپ, قاجەتتى قۇجاتتار مەن ءوتىنىشىن قابىلدادىق», دەيدى فيليال ديرەكتورى ەرجان جەڭىسبەكوۆ.
ماماندار ەركىنايعا تۋ تۋرالى كۋالىگىن تابىستاپ, بالالاردىڭ تۋىنا بايلانىستى جانە ءبىر جاسقا دەيىنگى جاردەماقى تاعايىنداۋ قىزمەتتەرى بويىنشا قۇجاتتاردى قابىلداپ, ءوتىنىشتى ۋاكىلەتتى ورگاندارعا جىبەردى. ەندى قاراشا ايىنىڭ باسىندا جاس اتا-انا وزدەرىنە جانە بالالارىنا تيەسىلى مەملەكەتتىك تولەمدەرگە يە بولادى.
«بالالارىمنىڭ جاردەماقىلارىن الۋ ءۇشىن قۇجات تاپسىرۋعا بارۋعا مۇمكىندىگىم بولماي جۇرگەن ەدى. حقو-نىڭ قىزمەتكەرلەرى قۇجاتتارىمدى ۇيدە وتىرىپ وتكىزۋگە كومەكتەستى. قاتتى قۋانىپ قالدىم. ماماندار ماعان گۇل سىيلاپ, قۇتتىقتاپ, جىلى لەبىزدەرىن جەتكىزدى. مەنىڭ قينالىپ وتىرعانىمدى ەستىپ, جەدەل ارەكەت جاساعان حقو-نىڭ ماماندارىنا العىس بىلدىرەمىن», دەيدى جاس انا.
تۇركىستان وبلىسى
