وسى جوبانىڭ العاشقى حابارىنا ەۆگەنيا دوۆگيالو ەسىمدى كەلىنشەك قاتىسقان ەدى. ول كارانتين كەزىندە جۇمىسىنان ايىرىلىپتى. ءوزى ەكى بالانىڭ اناسى. جەتى جىل بىرگە تۇرعان كۇيەۋى اراققا سالىنىپ, وتباسىنان مۇلدە كەتىپ قالعان. بالالارىنا قاراسۋدى ويىنا دا المايدى ەكەن. ءتىپتى اليمەنت سۇراعان ايەلىنە قوقان-لوقى جاساپ, «ەگەر مۇنداي سۇراق قوياتىن بولساڭ ءۇيىڭدى ورتەپ جىبەرەمىن», دەپ قورقىتقان.
تۇراتىن جەرلەرى جىلدار بويى جوندەۋ كورمەگەن ەسكى جاتاقحانا. سىز يىسىنەن اۋاسى دا اۋىر. سۋى دا ءجيى بولماي قالادى. وسىنداي قيىن جاعدايدا قالعاندىقتان ەۆگەنيا ۇلكەن قىزىن مامليۋتكا قالاسىنداعى ينتەرناتقا بەرۋگە ءماجبۇر بولىپتى. بالاسىن ساعىنعاننان جۇرەگى قان جىلايتىن جاس انا ۇزاق تۇندەردى دە ۇيقىسىز وتكىزىپ ءجۇر ەكەن. سونىڭ ءبارىن توك-شوۋدا شىبىن جانى شىرقىراپ, كوزىنىڭ جاسىن كولدەتىپ ايتىپ بەرگەن اناعا جانى اشىماعاندار كەمدە-كەم شىعار.
قولى ۇزىن ادامدار اراسىندا جاناشىر جاندار بار ەكەن. ەۆگەنيا دوۆگيالونىڭ باسىنداعى اۋىرتپالىقتى كورگەن پەتروپاۆلدىق كاسىپكەرلەردىڭ ءبىرى وعان ءبىر بولمەلى پاتەر ساتىپ اپەرىپتى. مۇنى شىن كوڭىلىنەن ىستەپ, ءتىپتى ءوزىنىڭ اتى-زاتىن كورسەتۋدى دە قالاماعان. قارىپ جاندارعا ساتىپ العان ءۇيىنىڭ بۇرىنعى قوجايىنىنان جيھازدارىن دا تۇگەل الىپ بەرىپتى. ءتىپتى كوشى-قونعا كولىك جالداۋعا اقشا دا بەرگەن. وسىنداي جانداردىڭ بار ەكەنىن كورگەندە ومىرگە قۇلشىنىس تا ارتا تۇسەتىن سياقتى. ال ەندى ەۆگەنيا دوۆگيالونىڭ اۋزىنا العىستان باسقا ءسوز تۇسپەيدى. ەكى ەزۋى ەكى قۇلاعىنا جەتىپ قۋانعان ول كىشى قىزى مارگاريتانى قۇشاقتاپ, كوزى بوتالاپ تەك العىسىن ايتا بەرەدى. ەندىگى ماقساتى – ينتەرناتقا بەرگەن ۇلكەن قىزىن قايتارۋ. بۇل ءۇشىن الەۋمەتتىك قىزمەتكەرلەر كەلىپ دوۆگيالونىڭ تۇرمىسىن كورىپ, باعاسىن بەرۋلەرى كەرەك. قازىر جاس انا ولاردى اسىعا كۇتىپ وتىر. ال ءتىلى جاڭا شىققان كىشى قىزى بەلگىسىز اعايدى «ون حوروشي» دەپ ماقتاي بەرۋدەن جاڭىلار ەمەس. ەندى شە... باسقالار دا كورىپ قىزىققان كوپتەگەن ويىنشىق, قۋىرشاقتارمەن «جاقسى اعاسى» ءوزىن ابدەن بايىتىپ كەتىپتى.
جۇرەگى جىلى, جانى جومارت وسىنداي جاقسى اعالار امان بولسىن.
پەتروپاۆل
