ادەبيەتتىڭ ادەبيەت ءھام ءوزىنىڭ اسىل وقىرمان ەكەنىن تۇسىنگەن ۋاقىتتان باستاپ ادامدار كىتاپ وقۋعا ەرەكشە قىزىعا باستادى. ءتىپتى قانداي كىتاپ بولسا دا ءبارىبىر, ايتەۋ وقۋ بەلگىلى ءبىر دەڭگەيدە سيپات الىپ, ۇلكەن مادەنيەتتىڭ بەلگىسىنە اينالدى. ال بۇدان سوڭ وقىرمان قاۋىم تاڭداپ ءھام تالداپ وقيتىن عادەت شىعاردى. باتىس اريستوكراتتارىنىڭ كەشكى استارىندا تەك كلاسسيكالىق شىعارمالار تۋرالى ءسوز بولدى, تەك كلاسسيكالىق مۋزىكا تىڭدالدى. ولار بۇل يگى ءداستۇردى ەليتالىق دارەجەگە اينالدىرعان سوڭ قوعام ەكىگە جارىلدى: وقىعاندار ءھام قارا حالىق. كەيىن الەم جۇرتشىلىعىنىڭ ءبارى وقۋعا قولى جەتىپ, ساۋاتتىلىق كەڭ تاراي باستاعاندا كىتاپ وقۋ ەليتالىق «سانگە» عانا ەمەس قاراپايىم حالىقتىڭ دا سۇيىكتى ىسىنە اينالدى. وسىلايشا ادامدار حال-قادەرىنشە وقي بەردى, وقي بەردى.
ۋاقىت وتە كەلە وزىق ويلى ادامدار وزا شاۋىپ, ءتۇرلى جاڭا تەحنولوگيالىق دۇنيەلەر جاساپ شىعاردى. سونىڭ ناتيجەسىندە, مىنە, بۇگىنگىدەي دامىعان قوعامدا ءومىر ءسۇرىپ وتىرمىز. الايدا قازىرگى حالىقتىڭ كىتاپ وقۋعا ىقىلاسى بۇرىنعىداي ەمەس. بارشا الەم جۇرتى «وقىرمان توقىراۋىنا» ۇشىرادىق دەپ جار سالۋدا. بۇعان ءتۇرلى سەبەپ بار: بىرەۋ سمارتفون, ينتەرنەت دەسە, ەندى بىرەۋ كۇيبەڭ تىرشىلىك دەيدى. ءتىپتى «قازىر ۋاقىت تەز وتەدى: تاڭ اتسا, كەش باتادى» دەپ ماردىمسىز بولجام ايتاتىندار دا بار. دەگەنمەن كىتاپ وقۋ ءھام جازۋ بەلگىلى ءبىر دەڭگەيدە ازايعانىمەن جوعالعان جوق. العاشقى جازۋدان بەرى قانشاما ءداۋىر كوشتى, قانشاما مادەنيەت اۋىستى. ءتىپتى كىتاپتى جويىپ جىبەرۋگە ىقپال ەتكەن ينتەرنەت تە قوعامدا ۇلكەن كۇشكە يە بولدى. بىراق ادامدار جازۋدى ۇمىتقان جوق.
ماسەلەن, ءبىزدىڭ بۇگىنگى ادەبي ورتادا وتكەندى اڭساۋ ءھام قيماۋ سيمپتومى ءالى دە بەلەڭ الىپ تۇر. جۇرەككە سالماق سالىپ قانا قويماي, ءتىپتى «بۇقارالىق سانا» قالىپتاستىرعان بۇل ساعىنىشتىڭ باستى سەبەبى, ارينە اۆتوردىڭ ماتەريالدىق جاعدايى. تۆورچەستۆو ادامدارى, سالىستىرمالى تۇردە العاندا, تىم جاقسى ءومىر سۇرگەن كەشەگى داۋرەن, راسىندا, يت باسىنا ىركىت توگىلگەن زامان بولدى. ويتكەنى كەڭەس ۋاقىتىنىڭ كوزقاراسىندا ادەبيەت, ەڭ ءبىرىنشى, يدەولوگيانىڭ ناسيحاتشىسى ءرولىن اتقاردى. سول ءۇشىن دە ادەبيەتكە كوزسىز قوماقتى قارجى ءبولىندى. ءبىر جاعىنان, ول كەزدە اقىن-جازۋشىلاردىڭ حالىق الدىندا قادىرى دە بار-تىن. ال قازىر, مويىنداۋ كەرەك, قاراپايىم ادامداردىڭ اقىن-جازۋشىلاردى ابىروي كورمەيتىنى راس. سانادا «ولەڭ جازعانشا مۇعالىم بول, بالا وقىت» دەيتىن پسيحولوگيا قالىپتاسىپ, قاتىپ قالعان. كاسىبي تۇردە شىعارماشىلىقپەن اينالىسۋعا قولداۋدىڭ جوقتىعى ەكىباستان بەلگىلى. جۇرتتىڭ جاپا-تارماعاي كىتاپ وقىمايتىنى تاعى بار. مىنە, بۇگىنگى قوعامداعى وسىنداي جازباۋعا ءماجبۇر ەتەتىن جاعدايلار كوپ بولسا دا ادامداردىڭ ءالى كۇنگە جازۋعا قۇلشىنىسى بار ەكەنىن كورىپ تاڭعالاسىڭ. اقىن-جازۋشىلاردىڭ شاما-شارقىلارىنشا ەڭبەكتەنىپ جۇرگەنى ءوز الدىنا, ادەبيەتتەن تىم الىس جانداردىڭ اكەسى ءھام اتا-باباسى تۋرالى كىتاپ شىعارۋعا قۇمار ەكەندىكتەرى ويلاندىرادى. ادام قۋانسا دا, مۇڭايسا دا ىشكى ويىن, جان-دۇنيەسىن قاراجاياۋ بولسا دا جازعىسى كەلىپ تۇرادى. دەمەك, بۇل جازۋ دەگەنىڭىز, ادامنىڭ ساناسىمەن تىلسىم ءبىر بايلانىستاعى كۇش. مىسالى, ەلەكتروندى كىتاپتار قوسالقى ءرولدى اتقارادى دەمەسەڭىز, قاعاز كىتاپ ءالى ءوز بيىگىندە. الداعى بىرنەشە عاسىردىڭ جۇزىندە دە كىتاپتى ەشقانداي قۇدىرەت الماستىرا المايتىن سياقتى. ال جازۋدىڭ عۇمىرى ەڭ سوڭعى ادامعا دەيىن جالعاساتىنى ەكىباستان.
