قازىرگى تاڭدا وتاندىق كينويندۋسترياعا ارنالعان جاڭا كادرلار ۇستاحاناسىنىڭ تۇجىرىمداماسى, ماقساتتارى, مىندەتتەرى جانە وقۋ باعدارلاماسى ءازىر. قاتىسۋشىلارعا «رەجيسسۋرا», «كينو ونەرى», «كينو دراماتۋرگياسى», «مونتاج», «وپەراتورلىق ونەر» پاندەرى بويىنشا ءبىلىم بەرىلمەك. سونداي-اق «كينو جانە كينو تۋرالى 24 ساعات نەمەسە كينو ءوندىرىسىنىڭ نەگىزدەرى» جانە «مۋزىكالىق كليپ اكتەرى» اتتى قوس اۋقىمدى جوبا اياسىندا وقىتۋ جوسپارلانۋدا.
«كينو مەكتەبى – بارلىق ونەر ءتۇرىن قامتيتىن بىرەگەي الاڭ. جالپىعا ورتاق جاريالىلىق پەن جاھاندانۋ داۋىرىندە سمارتفونى بار ءار ادام مەديا تۇلعاعا اينالۋدا. مەديا كونتەنتتى قۇرۋ پروتسەسى ەداۋىر جەڭىلدەتىلدى, دەگەنمەن ون جىل بۇرىن وعان كەم دەگەندە ءبىر اي ۋاقىت كەتسە, بۇگىندە ەڭ كوپ دەگەندە ءبىر كۇنىڭدى الادى. ينتەرنەت كەڭىستىگى ساپاسى كۇن سايىن تومەندەپ بارا جاتقان مەديا كونتەنتكە تولى, ال وعان دەگەن سۇرانىس كەرىسىنشە وسۋدە. وسىعان بايلانىستى, كينو مەكتەبى ءبىلىم بەرە وتىرىپ, وندىرىستىك پروتسەستەردى قامتاماسىز ەتەدى», دەيدى جوبانى ۇيىمداستىرۋشىلار.
كينو مەكتەبىندە وقۋعا قىزىعۋشىلىق تانىتاتىندار ءۇشىن ارنايى تالاپتار بەكىتىلگەن. تىڭداۋشىنىڭ جاسى 16-دان كەم بولماۋى كەرەك. بولاشاق كينەماتوگرافيست كاسىبي قۇزىرەتتىلىككە يە بولۋعا جانە شىعارماشىلىق كۋرستاردان وتۋگە جاۋاپكەرشىلىكپەن قاراۋعا دايىن بولۋى ءتيىس. ال كۋرس وقىتۋشىلارىنا قاتىستى دا ناقتى تالاپتار قويىلعان, قازىر ۇلتتىق كينونى قولداۋ مەملەكەتتىك ورتالىعى مەن شاكەن ايمانوۆ اتىنداعى «قازاقفيلم» كينوستۋدياسى ىرىكتەۋ جۇمىستارىن جۇرگىزىپ جاتىر.
