– ميحال, كوپتەگەن ويىنشى ءارتۇرلى سەبەپپەن ويىنعا قاتىسا المايدى. تاجىريبەلى ورتالىق قورعاۋشى يۋري لوگۆينەنكونى شاقىرماي, سۇلتان ابىلعازىعا تاڭداۋ جاسادىڭىز. نەلىكتەن؟
– سۇلتان – سەنىمدى ويىن كورسەتەتىن جاس فۋتبولشى. ول جاقسى قىرىنان تانىلىپ, كوماندانىڭ باستى قورعاۋشىلارىنىڭ ءبىرى بولا باستادى. لوگۆينەنكو ۇزاق ۋاقىت بويى جاراقاتىنا بايلانىستى ويناماي, قالپىنا ەندى كەلە باستادى. ونىڭ ساپالى ءارى تاجىريبەلى قورعاۋشى ەكەنىن بىلەمىز. سونىمەن قاتار وتباسى جاعدايىنا بايلانىستى ماكسيم فەدين مينسكىگە كەلە المادى.
– بەلارۋس قۇراماسىنىڭ جانكۇيەرلەرى ستاديونعا كىرەتىنى بەلگىلى بولدى. جانكۇيەرلەردىڭ ستاديونعا ورالۋى ۇلكەن مەرەكە ەكەنى راس. بىراق جانكۇيەرلەردىڭ ستاديوندا بولۋى كومانداڭىز ءۇشىن قيىندىق تۋدىرماي ما؟
– قازاقستان چەمپيوناتىنىڭ ويىندارى جانكۇيەرلەرسىز وتەدى. ارينە, فۋتبولشىلار جانكۇيەرلەر ءۇشىن وينايدى. سول سەبەپتى جانكۇيەرلەردىڭ ستاديونعا ورالۋى – ۇلكەن مەرەكە. ويىنعا كەلەتىن بولساق, قيىن كەزدەسۋ كۇتىپ تۇر. قارسىلاستىڭ ويىنىن جاقسى زەردەلەدىك. ەكى كوماندا دا تەك جەڭىس ءۇشىن وينايدى.
– اتاقتى باپكەر ارسەن ۆەنگەر جاقىندا ۇلتتار ليگاسىنىڭ پايداسى جوق ەكەنىن مالىمدەدى. ءسىزدىڭ ويىڭىز قانداي؟
– قازاقستاندا ۇزاق ۋاقىت بويى كوماندالاردىڭ ويىن تاجىريبەسى بولمادى. سوندىقتان ۇلتتار ليگاسىنىڭ ماتچتارى – حالىقارالىق دەڭگەيدە مىقتى قارسىلاستارمەن باسەكەلەسۋگە جاقسى مۇمكىندىك. ماڭىزدى تۋرنير دەپ سانايمىن.
