جاستارىمىزدىڭ يسپانيا ورەندەرىنەن جەڭىلىپ قالعانى ءبىز ءۇشىن پالەندەي جاڭالىق ەمەس جانە بۇل جەڭىلىس وتاندىق فۋتبول ماماندارى مەن جانكۇيەرلەردىڭ جۇيكەسىنە تۇك تە اسەر ەتە قويعان جوق. دەي تۇرعانمەن, 1-تايمداعى ءبىزدىڭ فۋتبولشىلاردىڭ الاڭداعى ويىنى ەڭ قۇرىعاندا تەڭ ناتيجەگە قول جەتكىزۋگە بولادى-اۋ دەگەن ءۇمىت سىيلاعانى جاسىرىن ەمەس. ماتچ الدىنداعى ءباسپاسوز ءماسليحاتىندا باس باپكەر الماس قۇلشىنباەۆ شاكىرتتەرىنىڭ باس سالىپ العا قاراي ۇمتىلمايتىنىن, ايتسە دە قورعانا وتىرىپ قارسى شابۋىلعا يەك ارتاتىنىن ايتقان ەدى.
الاڭعا شىققان 11 فۋتبولشىمىز العاشقى تايمدا باپكەردىڭ تاپسىرماسىن بۇلجىتپاي ورىنداپ شىقتى. ياعني يسپانيانىڭ كەز كەلگەن شابۋىلىنا تويتارىس بەرىپ, وزدەرى وڭتايلى ءسات تۋعاندا جىلدام قارىمتا شابۋىل ۇيىمداستىردى. ناتيجەسىندە كەزدەسۋدىڭ العاشقى مينۋتتارىندا جەرلەستەرىمىز يسپانيا قۇراماسىنىڭ قاقپاسىنا ءبىر رەت قاۋىپتى سوققى جاساپ, ەكى رەت بۇرىشتاما دوبىن ورىنداۋعا مۇمكىندىك الدى. بۇل كەزدە ماتچتىڭ العاشقى 15 مينۋتى ارتتا قالعان ەدى. ەكىنشى بۇرىشتامادان كەيىن جاستارىمىزدىڭ گول سوعاتىن تاماشا مۇمكىندىگى بولعانىمەن قورعاۋشى الىبەك قاسىم ءوز مۇمكىندىگىن ءساتتى پايدالانا المادى. قازاقستان قۇراماسىنان مۇنداي قارقىندى كۇتپەگەن يسپانيالىقتار ويىننىڭ كەي ساتتەرىندە قورعانىسقا كوڭىل بولۋگە ءماجبۇر بولدى.
جالپى, 1-تايمدا ءبىزدىڭ جىگىتتەر جامان ونەر كورسەتكەن جوق. دوپقا يەلىك ەتۋ بويىنشا دا جاستارىمىز يسپانيادان قالىسپادى, ول بويىنشا پايىزدىق كورسەتكىش – 55:45. ادەتتە ازۋلى قارسىلاستارمەن ويناعاندا قازاقستان قۇراماسىنىڭ دوپقا يەلىك ەتۋ كورسەتكىشى 40 پايىزدان اسپايتىن. وسىلايشا كەزدەسۋدىڭ العاشقى تايمىندا قارسىلاستار ءبىر-ءبىرىنىڭ قاقپاسىنان ساڭىلاۋ تابا الماي, ۇزىلىسكە تەڭ ناتيجەمەن شىقتى.
2-تايمدا دا قازاقستان جاستارى العاشقى 45 مينۋتتاعى ويىنىن كورسەتەدى دەپ ۇمىتتەنگەن بولاتىنبىز. الايدا الەمدە فۋتبول دەرجاۆاسى رەتىندە مويىندالعان يسپانيا اياقدوپ ونەرىندە ازىرگە ەشقانداي جەتىستىگى جوق قازاقستان قۇراماسىنا ءبىر تايم بويى گول سوعا الماي اۋرەلەنگەنىنە نامىستانعان بولۋى كەرەك, اينالدىرعان 20 مينۋتتا قاقپامىزعا ءبىر ەمەس, ءۇش گول سوعىپ كەتتى. 2-تايمنىڭ العاشقى 20 مينۋتىنا دەيىن الىنباس قامالعا اينالعان قازاقستان قورعانىسى ءدال وسى ۋاقىتتا سىر بەرە باستادى. ستاندارتتى جاعدايدى ءتيىمدى پايدالانعان «سەۆيليا» قورعاۋشىسى ۋگو گيليامون سانمارتين 65-مينۋتتا ەسەپ اشىپ, يسپانيانى العا شىعاردى.
الاڭ قوجايىندارىنىڭ ەكىنشى گولى دا كوپ كۇتتىرگەن جوق. 2-تايمدا ويىنعا تىڭنان قوسىلعان «لەۆانتە» شابۋىلشىسى دانيەل گومەس 71-مينۋتتا ەسەپتى ەسەلەپ, تابلوداعى كورسەتكىشتى 2:0-گە جەتكىزسە, ارادا 14 مينۋت وتكەندە دۋبل اۆتورى اتانىپ, كەزدەسۋدىڭ نۇكتەسىن قويدى. العاشقى ەكى گول سوعىلعاندا دوپتى قايتارۋ بىلاي تۇرسىن, دوپقا ۇمتىلۋعا شاماسى جەتپەگەن قاقپاشىمىز بەكحان شايزادا بۇل جولى دوپتى قايتارۋعا تىرىسقانىمەن, ونىسىنان تۇك شىقپادى. ءسويتىپ, ويىندى ءساتتى باستاعان جەرلەستەرىمىز ماتچ سوڭىندا ازۋلى قارسىلاستارىنا ەش دارمەن كورسەتە الماي, 3:0 ەسەبىمەن جەڭىلۋگە ءماجبۇر بولدى.
ەندى قازاقستان جاستار قۇراماسى 2021 جىلعى ەۋروپا چەمپيوناتىنىڭ ىرىكتەۋ كەزەڭىندەگى سوڭعى ماتچىن ءوز الاڭىمىزدا فارەر ارالدارى فۋتبولشىلارىمەن وتكىزەدى. كەزدەسۋ 17 قاراشاعا جوسپارلانعان. ەكى قۇراما اراسىنداعى العاشقى ويىن 2019 جىلدىڭ ماۋسىم ايىندا فارەر ارالدارىندا ءوتىپ, جەرلەستەرىمىز سىرت الاڭدا 3:1 ەسەبىمەن جەڭىسكە جەتكەن ەدى.
