بولاشاق پوليتسيا قىزمەتكەرلەرىن دايىندايتىن وقۋ ورنىنان تاعى شۋ شىقتى. بەلگىسىز بىرەۋلەر جەلىگە ۆيدەو جاريالاعان. وندا پوگونداعى كۋرسانتتاردىڭ توبەلەسىپ جاتقانىن كورۋگە بولادى. ال بىرنەشە ساعاتتان سوڭ ينتەرنەتتە اكادەميا قىزمەتكەرلەرىنىڭ ۆيدەوۇندەۋى جاريالانعان. ولار اكادەميا كۇماندى مەملەكەتتىك ساتىپ الۋلاردى جۇرگىزىپ وتىرعانىنا شاعىمدانعان.
وسىعان بايلانىستى ەلوردادان قاراعاندىداعى ءىىم اكادەمياسىنا ارنايى كوميسسيا جىبەرىلىپتى. ىشكى ىستەر مينيسترلىگى جەلىدەگى بىرنەشە ۆيدەونى تەكسەرۋگە كىرىسكەن.
الدىمەن بەلگىسىز بىرەۋلەر جاپپاي توبەلەستىڭ ۆيدەوسىن جاريالاپ, وندا بولاشاق پوليتسيا قىزمەتكەرلەرىنىڭ بەينەلەنگەنىن ايتقان. ياعني اكادەميا كۋرسانتتارى بارداعى كۇزەتشىلەرمەن سوزگە كەلىپ, سالدارىنان بىرنەشە ادام پىشاق جاراقاتىن العان. الايدا قاراعاندىداعى ءىىم اكادەمياسى بۇل دەرەكتى جوققا شىعارىپ وتىر.
"جارالانعان كۋرسانتتار جوق. بارلىعى امان. ولار ءبىلىم الىپ جاتىر. ەشكىم كومەك سۇراپ كەلگەن جوق, ەشكىمدى ەمدەگەن دە جوقپىز. جارعىمەن بەلگىلەنگەن ءتارتىپ بويىنشا كۋرسانتتار جەكە ىسپەن اينالاسا الادى. الايدا قازىرگى تاڭدا ەكى كۋرسانت شەشەكپەن اۋرۋىنا بايلانىستى 15 قازانعا دەيىن كارانتين ەنگىزىلدى", - دەيدى بەيسەنوۆ اتىنداعى قاراعاندى اكادەمياسى باسشىسىنىڭ ورىنباسارى يۋري كولەسنيكوۆ.
ال باردىڭ يەسى كۋرسانتتاردىڭ توبەلەسكەنىن ايتىپ وتىر. بىراق بۇل وقيعا ەكى اپتا بۇرىن بولىپتى.
"سول كۇنى ادام كوپ بولدى. بىراق ءبىز ولاردىڭ كىم ەكەنىن جانە قايدا وقيتىنىن سۇراعان جوقپىز. ءبىز باسقالار سياقتى تۇنگى 12-گە دەيىن جۇمىس ىستەيمىز. ال توبەلەس تاڭعى 4:30-دا بولدى. مەن كۋرسانتتاردىڭ كۇزەتشىلەرمەن توبەلەسكەنىن ەستىدىم. بىراق مەنىڭ مەكەمەمدە كۇزەت قىزمەتى جوق. مۇندا مەن ءبارىن ءوزىم قاداعالايمىن", - دەيدى باردىڭ يەسى ەركەبۇلان سۇلەيمەنوۆ.
سونىمەن قاتار, جەلىدە تاعى ءبىر ۆيدەو جاريالانعان. وندا اكادەميا قىزمەتكەرلەرى رەكتوردىڭ پسيحولوگيالىق قىسىم جاسايتىنىنا شاعىمدانعان. سالدارىنان وقۋ ورنىنان تاجىريبەلى كادرلار كەتىپ جاتىر. سونداي-اق, قۇرىلىس ماتەريالدارىن ساتىپ الۋ بويىنشا تەندەر ولارعا كۇماندى بولىپ كورىنەدى ەكەن. وسىعان بايلانىستى اكادەمياعا نۇر-سۇلتاننان ارنايى كوميسسيا كەلگەن. تەكسەرۋدىڭ ناتيجەسىنە قاتىستى اقپارات جوق.
ايتا كەتەيىك, 2019 جىلدىڭ باسىندا قاراعانداعىدا ءىىم اكادەمياسىنان شۋ شىققان ەدى. وندا وقۋ ورنىنىڭ وقىتۋشىسى ارىپتەستەرىن جاڭا جىلمەن قۇتتىقتاي وتىرىپ, ءبارىن "براتۆا" دەپ اتاعان. سونىمەن قاتار, ول كينوداعى قىلمىس الەمىنىڭ سەركەلەرىن ەسىنە العان بولاتىن.
